1‘Breder ha tasow, goslowewgh orth ow defens a wrav lemmyn dhywgh.’

2Pan glewsons ev dhe gewsel orta yn Ebrow, i eth ha bos hwath kosella. Ena ev a leveris:

3‘Yedhow ov vy, genys yn Tarsus yn Kilikia, mes meythrys y'n sita ma, dyskys orth treys Gamaliel, straght herwydh lagha agan tasow, diwysyk rag Duw kepar ha hwi oll hedhyw. 4My a helghyas an Fordh ma bys y'n mernans, ow kelmi ha gwer ha benynes hag orth aga gorra yn prison, 5dell yll an arghoferyas hag oll konsel an henavogyon dustunia a-dro dhymm. Dhiworta my a dhegemmeras ynwedh lytherow dhe'n vreder yn Damaskus, ha mos di rag kelmi an re esa ena ha'ga dri omma dhe Yerusalem, may fens kessydhys.

Powl a Gews a'y Dreylyans

6‘Lemmyn dell hwarva, ha my y'm hyns ow tos nes dhe Damaskus a-dro dhe hanter-dydh, a-dhesempis mes a nev golow meur a splannas y'm kyrghynn, 7ha my a goedhas dhe'n dor, ha klewes lev ow leverel dhymm, “Sowl, Sowl, prag y'm persekutydh?” 8Ha my a worthybis, “Piw osta, Arloedh?” Hag yn-medh ev dhymm, “Yesu a Nazareth ov vy, neb a bersekutydh.” 9Lemmyn an re esa genev a welas devri an golow, mes ny glewsons an lev anodho ev neb esa ow kewsel orthiv. 10Hag yn-medhav, “Pandr'a goedh dhymm y wul, Arloedh?” Ha'n Arloedh a leveris dhymm, “Sav yn-bann, ke yn Damaskus, hag ena y fydh leverys dhis a-dro dhe oll an taklow re beu ordenys dhis dhe wul.” 11A-ban na yllis vy gweles drefenn splannder an golow na, my eth yn Damaskus, ledys er an leuv gans an re esa genev.

12‘Hag unn Ananias neb o gour kryjyk herwydh an lagha ha gerys-da gans oll an Yedhewon esa trigys ena, 13a dheuth dhymm, hag ow sevel rybov ev a leveris dhymm, “Broder Sowl, mir war-vann.” Hag y'n eur na my a viras war-vann orto. 14Hag yn-medh ev, “Duw agan tasow re'th tewisas seulabrys rag aswonn y vodh ha gweles an Gwiryon ha klewes lev yn-mes a'y anow, 15rag ty a vydh dustunier ragdho, dhe dus oll, a-dro dhe'n taklow re welsys ha klewes. 16Lemmyn, prag y hokydh? Sav yn-bann, bydh besydhys ha golgh dhe-ves dha beghosow, ow kelwel war y hanow.”

Powl Dannvenys dhe'n Jentilys

17‘Dell hwarva, wosa my dhe dhehweles dhe Yerusalem ha pan esen ow pysi y'n tempel, my a goedhas yn transyek, 18ha my a'n gwelas ow leverel dhymm, “Fisten, ha ke yn-mes a Yerusalem yn skon, drefenn na wrons i degemmeres dha dhustuni a-dro dhymm.” 19Hag yn-medhav, “Arloedh, i a woer ow bos ow prisonya hag ow kweskel yn pub synaga an re a grysis ynnos. 20Ha pan veu skoellys goes dha dhustunier Stefan, yth esen evy ow sevel yn ogas owth assentya hag ow kwitha dillas an re esa orth y ladha.” 21Ena ev a leveris dhymm, “Ke, rag my a wra dha dhannvon a-bell dhe'n Jentilys.” ’

Powl ha'n Tribun Romanek

22Bys y'n ger ma i a woslowas orto, mes ena i a dhrehevis aga levow, ow leverel, ‘Dhe-ves gans den a'n par ma a'n nor; ny dhelledh ev dhe vewa.’ 23Hag i ow karma hag ow tewlel aga mantelli dhe-ves hag ow tewlel doust y'n ayr, 24an tribun a worhemmynnis may fe hembrenkys y'n kastell, hag ev a erghis may fe apposys dre skorjya, rag dysmygi yn tien an reson i dhe garma orto y'n for' ma. 25Mes pan y'n tennsens a-hys rag an skorjys, Powl a leveris dhe'n penn-kangour esa ow sevel yn ogas, ‘Yw lafyl ragos dhe skorjya burjes romanek nag yw dampnys?’ 26Pan glewas henna an penn-kangour eth dhe'n tribun ha leverel, ‘Pandr'a vynnydh dhe wul? Rag an gour ma yw burjes romanek.’ 27An tribun a dheuth dhe Powl ha leverel dhodho, ‘Lavar dhymm, osta burjes romanek?’ Hag yn-medh ev, ‘Ov.’ 28An tribun a worthybis, ‘My a gavas an sitysanses a bris meur.’ Ytho Powl a leveris, ‘Mes yn tevri, genys veuv yndella.’ 29Rakhenna an re neb o parys dh'y apposya a omdennas anodho a-dhistowgh; hag ynwedh an tribun a'n jeva own pan wodhva y vos Roman hag y'n kolmsa.

Powl a-rag an Konsel

30Ternos, ow mynnes godhvos yn sertan prag yth o Powl kuhudhys gans an Yedhewon, ev a'n livras hag ev a worhemmynnis dhe'n bennoferysi hag oll an konsel dos war-barth, ha pan dhrosa Powl yn-nans ev a'n gorras a-ragdha.