Powl a-rag Feliks yn Sesarea

1Powl, ow mires gluw orth an konsel, a leveris, ‘Breder, bys y'n jydh ma my re vewas gans kowses da a-rag Duw.’ 2Ha'n arghoferyas Ananias a erghis dhe'n re esa ow sevel yn y ogas gweskel yn ganow Powl. 3Ena Powl a leveris dhodho, ‘Duw a wra dha weskel tejy, ty fos wynnhes; a esedhydh jy orth ow preusi herwydh an lagha, hag erbynn an lagha ty a worhemmynn may fiv gweskys?’ 4An re esa ow sevel yn ogas a leveris, ‘A dhespitydh jy an arghoferyas a Dhuw?’ 5Hag yn-medh Powl, Ny wodhvev, breder, y vos arghoferyas; rag skrifys yw ‘Ny wrewgh kewsel drog a-dro dhe rewler a'gas pobel.’

6Ena Powl, ow kodhvos bos re Sadukeow ha re erell Fariseow, a grias y'n konsel, ‘Breder, Farise ov vy, mab Fariseow; yth esov vy ow pos breusys a-dro dhe wovenek dasserghyans an re varow.’ 7Pan leveris hemma, yth esa strif ynter an Fariseow ha'n Sadukeow, ha rynnys veu an kuntelles. 8Rag Sadukeow a lever nag eus dasserghyans nag el na spyrys, mes Fariseow a's aswonn oll. 9Hag yth esa garma bras, ha re a'n skribys yn bagas an Fariseow a sevis yn-bann ha kenkia yn krev, ‘Ny gevyn ni travyth kamm y'n den ma. Fatla mar kwrella spyrys po el kewsel orto.’ 10Ha pan sevis strif bras, an tribun, ow perthi own y fedha Powl skwardys a-les gansa, a worhemmynnis dhe'n soudoryon dos yn-nans ha'y denna yn-mes a'ga mysk ha'y dhri y'n kastell.

11An nessa nos, an Arloedh a dheuth dhodho ha leverel, ‘Gwellha dha jer, rag dell dhuges dustuni dhe'n taklow a-dro dhymm yn Yerusalem, yndella y telledh ty dhe dhoen dustuni yn Rom ynwedh.’

An Bras dhe Ladha Powl

12Pan dheuth an jydh an Yedhewon a wrug bras yn-dann li a vollethi, na wrens dybri nag eva kyns i dhe ladha Powl. 13Yth esa moy es dew-ugens a wrug an bras ma; 14i eth dhe'n bennoferysi ha'n henavogyon ha leverel, ‘Ni re omgolmas yn-dann li a vollethi na dhyppryn boes bys pan lytthyn Powl. 15Lemmyn ytho hwi war-barth gans an konsel, pysewgh an tribun a'y dhri yn-nans dhywgh, kepar ha pan esowgh ow mynnes eksamnya y gen yn leunna; ha ni agan honan yw parys dh'y ladha kyns ev dhe nesa.’

16Pan glewas mab hwoer Powl a-dro dhe'n bras ma, ev a dheuth hag entra y'n kastell ha'y dherivas dhe Powl. 17Ha Powl a elwis dhe onan a'n bennow-kangour, ha leverel, ‘Gid an gour yowynk ma dhe'n tribun, rag ev a'n jeves neppyth dhe dherivas dhodho.’ 18Rakhenna ev a'n kemmeras ha'y ledya dhe'n tribun ha leverel, ‘An prisner Powl a elwis dhymm ha govynn orthiv dri dhis an gour yowynk ma; ev a'n jeves neppyth dhe dherivas dhis.’ 19An tribun, orth y gemmeras er an leuv a-denewen yn privedh, a wovynnas, ‘Pyth eus dhis dhe dherivas dhymm?’ 20Hag yn-medh ev, ‘Unnverhes yw an Yedhewon dhe wovynn orthis dhe dhri Powl yn-nans dhe'n konsel a-vorow war skeus i dhe ervira diskudha yn leunna neppyth a-dro dhodho. 21Ty ytho, na vydh toellys gansa; rag moy es dew-ugens gour anedha a vynn y gontrewaytya, neb re omgolmas yn-dann li na wrellens dybri nag eva bys pan y'n latthens, ha lemmyn parys yns i, ow kortos dha ervirans.’ 22Rakhenna an tribun a dhannvonas dhe-ves an gour yowynk, orth y erghi, ‘Na lavar dhe dhenvyth ty dhe dherivas dhymm an taklow ma.’

Powl Dannvenys dhe Feliks an Governour

23Ena ow kelwel dew a'n bennow-kangour, ev a leveris, ‘Darbarewgh dew kans souder, gans deg marghek ha tri-ugens, ha dew kans guwwas, mayth ellons bys yn Sesarea yn tressa eur an nos, 24ha proviewgh enyvales rag Powl dhe varghogeth, ma'n drollons yn saw dhe Feliks an governour.’ 25Ev a skrifas lyther, war-lergh an patron ma:

26‘Klawdius Lykias dhe'n moyha bryntin governour Feliks, salusyans. 27An gour ma re beu dalghennys gans an Yedhewon hag yth esens i ow pareusi y ladha, mes pan dhyskis y vos Roman, my a dheuth gans soudoryon ha'y selwel. 28Hag ow mynnes godhvos an acheson ma'n kuhudhens, my a'n dros yn-nans dh'aga honsel. 29My a gavas y vos kuhudhys a-dro dhe wovynnow a'ga lagha, mes na veu kuhudhys a dravyth a dhervynnas na'n mernans na prisonyans. 30Ha pan veu derivys dhymm bos bras erbynn an gour, a-dhistowgh my a'n dannvonas dhis, ha gorhemmynna dhe'n guhudhoryon leverel a-ragos pandr'eus gansa er y bynn.’

31Rakhenna an soudoryon, herwydh aga arghadowyow, a gemmeras Powl ha'y dhri dres an nos dhe Antipatris. 32Ha ternos i a asas an varghogyon dhe vones yn-rag ganso, hag i a dhehwelis dhe'n kastell. 33Pan entersons yn Sesarea i a ros an lyther dhe'n governour hag ynwedh dri Powl a-ragdho. 34Hag ow redya an lyther ev a wovynnas py rannvro y teuth anodho, ha pan dhyskas y vos a Kilikia 35ev a leveris, ‘My a wra goslowes orthis pan dheu dha guhudhoryon ynwedh.’ Ena ev a worhemmynnis may fe synsys yn pretorium Herod.