Powl a-rag Feliks yn Sesarea

1Wosa pymp dydh an arghoferyas Ananias a dheuth yn-nans ha ganso niver a henavogyon hag unn Tertullus, den a'n lagha, hag i a dhug dustuni dhe'n governour erbynn Powl. 2Wosa Powl dhe vos gelwys, Tertullus a dhallathas y guhudha, ow leverel,

‘A-ban gevyn ni, dredhos, meur a gres, hag a-ban veu lies gwellheans gwrys rag an bobel ma dre dha ragbreder, 3yn pup-tra hag yn pub tyller ni a wolkomm hemma, bryntinna Feliks, down agan grasow. 4Mes heb dha lettya na fella, my a'th pys y'th perthyans a woslowes a verr dermyn orthyn. 5Ni re gavas bos an gour ma pla, ow kul strif yn mysk oll an Yedhewon dres an nor, penn-ledyer sekt an Nazarenys. 6Hag ev a assayas disakra an tempel, ytho ni a settyas dalghenn ynno, ha ni a vynnas y vreusi herwydh agan lagha. 7Byttegyns an tribun Lysias a dheuth ha gans fors meur ev a'n kemmeras mes a'gan diwla, 8ow korhemmynna dh'y guhudhoryon dos a-ragos.24:8 ha ni a vynnas y vreusi herwydh agan lagha. Byttegyns an tribun Lysias a dheuth ha gans fors meur ev a'n kemmeras mes a'gan diwla, ow korhemmynna dh'y guhudhoryon dos a-ragos: nyns usi an geryow ma yn re a'n dornskrifow. Orth y apposya, ty dha honan a yll diskudha yn tien a-dro dhe oll an taklow ma ma'n kuhudhyn.’

9Ha'n Yedhewon ynwedh a gemmeras rann y'n kuhudhans, ow testa bos an taklow ma gwir.

Defens Powl a-rag Feliks

10Pan wrug an governour sin dhodho dhe gewsel, Powl a worthybis,

‘Ow konvedhes dha vos dres lies blydhen breusyas war an bobel ma, yn lowen my a wra ow defens a-dro dhe'n taklow a-dro dhymm. 11Dell yllydh diskudha, nyns yw moy ages dewdhek dydh a-ban yth vy yn-bann rag gordhya yn Yerusalem. 12Ny'm kavsons ow tadhla gans denvyth y'n tempel nag ow kul dhe routh omguntell, po y'n synagys po dres an sita, 13na ny yllons i gul prov dhis a-dro dhe'n taklow ma'm kuhudhons lemmyn. 14Mes hemma my a gonfess dhis, my dhe wordhya Duw agan tasow, herwydh an Fordh a elwons i sekt, ow krysi pup-tra yw herwydh an lagha ha'n taklow skrifys y'n brofoesi. 15Yma dhymm govenek yn Duw, a waytyons i aga honan ynwedh, y fydh dasserghyans hag a'n re ewnhynsek hag a'n re gammhynsek. 16Rakhenna my ow honan a striv prest dhe synsi kowses divlam a-rag Duw ha tus oll. 17Lemmyn wosa lies blydhen my a dheuth rag dri alusenow dhe'm pobel ha rag gul offrynnow. 18Ha my ow kul hemma, i a'm kavas y'n tempel wosa ow glanheans, naneyl gans routh na gans deray, 19gans Yedhewon dhiworth Asia, hag y koedh dhedha i bos omma a-ragos rag ow huhudha, mars eus dhedha neppyth er ow fynn. 20Po an re ma, leverens aga honan py drogober a gavsons ha my ow sevel a-rag an konsel, 21marnas y feu an unn lavar ma a griis vy, ow sevel yn aga mysk, “Yth esov vy ow pos breusys a-ragowgh hedhyw a-dro dhe dhasserghyans a'n re varow.” ’

22Feliks, neb a'n jeva konvedhes da a-dro dhe'n Fordh, a astelas an kuntelles, ow leverel, ‘Pan dheu Lysias an tribun yn-nans, my a wra ervira agas mater.’ 23Ev a worhemmynnis dhe'n penn-kangour may fe synsys yn-dann with ha may fe grontys dhodho neb rydhses, ha ma na fe lettys mann re a'y gowetha a venystra dhodho.

24Wosa niver a dhydhyow pan dheuth Feliks ha ganso y wreg Drusilla o Yedhowes, ev a dhannvonas war-lergh Powl, ha goslowes orto a-dro dhe'n fydh yn Krist Yesu. 25Hag ev ow kul areth a-dro dhe ewnder hag omrewl ha'n vreus ow tos, Feliks eth ha bos ownek, ha gorthybi, ‘Y'n tor' ma, ty ke; mes my a wra dannvon war dha lergh pan eus dhymm spas.’ 26Y'n kettermyn ev a waytya y fe mona res dhodho gans Powl; ytho ev a dhannvona war y lergh yn fenowgh dhe geskewsel ganso.

27Ha wosa diw vlydhen dhe bassya, Feliks a veu holys gans Porkius Festus; hag ow mynnes diskwedhes favour dhe'n Yedhewon, ev a asas Powl yn prison.