Powl a Elow orth an Emperour

1Tri dydh wosa y dhevedhyans yn ranndir, Festus eth yn-bann dhe Yerusalem dhiworth Sesarea, 2ha'n bennoferysi ha ledyoryon an Yedhewon a ros dherivas dhodho erbynn Powl ha pysi, 3ow kovynn favour dhiworto, ma'n galwa dhe Yerusalem, rag yth esens ow mynnes kontrewaytya rag y ladha y'n hyns. 4Gans henna Festus a worthybis y fedha Powl synsys yn Sesarea, hag yth ervira ev y honan mos di a verr spys. 5‘Ytho’, yn-medh ev, ‘An re na yn agas mysk ha dhedha awtorita, ens yn-nans genev, ha mars eus neppyth kamm y'n gour, kuhudhens ev.’

6Wosa ev dhe wortos yn aga mysk namoy es eth po deg dydh, ev eth yn-nans dhe Sesarea; ha ternos ev a esedhas y'n barr ha gorhemmynna may fe Powl dres. 7Pan dheuth ev, an Yedhewon re dhothya yn-nans dhiworth Yerusalem a sevis a-dro dhodho ha dri orto lies kuhudhans poes, na allsons previ. 8Ena Powl a wrug y dhefens: ‘Kammenn na beghis vy erbynn lagha an Yedhewon nag erbynn an tempel nag erbynn Sesar.’ 9Mes Festus, ow mynnes diskwedhes favour dhe'n Yedhewon, a worthybis dhe Powl, ow leverel, ‘A vynn'ta mos yn-bann dhe Yerusalem dhe vos breusys ena a-ragov a-dro dhe'n taklow ma?’ 10Mes yn-medh Powl, ‘Yth esov vy ow sevel a-rag barr Sesar, may telledh ow bos breusys. Ny wrug vy drokoleth vyth dhe'n Yedhewon, dell wodhesta fest yn ta. 11Rakhenna mar kammwrav ha mar kwrug vy neppyth ow tervynn an mernans, ny skonyav a verwel; mes mar nyns eus travyth y'n taklow ma'm kuhudh an re ma, denvyth ny yll ow daskorr dhedha. Orth Sesar y halwav.’ 12Ena Festus, wosa ev dhe omgusulya gans y gonsel, a worthybis, ‘Ty re elwis orth Sesar; a-rag Sesar ty a wra mos.’

Festus a Omgusul gans Myghtern Agrippa

13Ha pan o passys niver a dhydhyow, myghtern Agrippa ha Bernike a dheuth dhe Sesarea rag salusi Festus. 14Ha drefenn i dhe wortos ena lies dydh, Festus a worras a-dherag an myghtern an maters a-dro dhe Powl, ow leverel, ‘Yma unn gour, gesys prisner gans Feliks, 15hag a-dro dhodho an bennoferysi ha henavogyon an Yedhewon a leveris dhymm ha my yn Yerusalem, ha govynn orthiv breus er y bynn. 16My a worthybis dhedha nag yw usadow Romanek daskorr denvyth kyns an den kuhudhys dhe vetya orth y guhudhysi fas orth fas, ha dhe gavoes spas dhe wul defens a-dro dhe'n kuhudhans. 17Rakhenna, pan dheuthons war-barth omma, ny gellis vy termyn, mes ternos, esedhys y'n barr, my a worhemmynnis may fe dres an gour. 18Pan sevis yn-bann an guhudhysi, ny'n kuhudhsons gans drogober vyth a dheseven vy, 19mes fowt akordyans a's teva ganso a-dro dh'aga kryjyans aga honan hag a-dro dhe unn Yesu re varwsa, mes Powl a dhestas y vos bew. 20Drefenn ow bos ankombrys orth an dhadhel a-dro dhe'n taklow ma, my a wovynnas mar vynnas ev mos dhe Yerusalem dhe vos breusys ena a-dro dhe'n taklow ma. 21Mes pan bysis Powl dhe vos synsys yn-dann with rag ervirans an Emperour, my a worhemmynnis may fe synsys bys pan allav y dhannvon dhe Sesar.’ 22Hag Agrippa a leveris dhe Festus, ‘My ow honan a garsa klewes an den.’ Yn-medh ev, ‘A-vorow y hwre'ta y glewes.’

Powl Dres a-rag Agrippa

23Rakhenna ternos Agrippa ha Bernike a dheuth, meur aga ryelder, ha pan entersens y'n vreuslys, gans an tribunyon ha gwelhevin an sita, Festus a worhemmynnis ha Powl a veu dres. 24Ha Festus a leveris, ‘Myghtern Agrippa, hag oll an wer eus omma genen ni, hwi a wel an den ma, hag a-dro dhodho oll an gemmynieth yedhowek a'm pysis, hag y'n Yerusalem hag omma, ow kria na dhelledh ev dhe vewa na fella. 25Byttegyns, my a gonvedhas na wrug ev travyth ow tervynn an mernans, mes pan elwis ev y honan orth an Emperour, my a erviras y dhannvon. 26Mes nyns eus dhymm travyth sertan dhe skrifa dhe'm arloedh yn y gever; rakhenna my re'n dros a-ragowgh, dres oll a-ragos tejy, myghtern Agrippa, may kyffiv neppyth dhe skrifa wosa y vos apposys. 27Rag, dell hevel dhymm, erbynn reson yw dannvon prisner heb diskwedhes an kuhudhansow er y bynn.’