Defens Powl a-rag Agrippa

1Yn-medh Agrippa dhe Powl, ‘Kummyas yw res dhis a gewsel a-barth dhis dha honan.’ Ena Powl a ystynnas y leuv ha gul y dhefens:

2‘A-dro dhe'n taklow oll mayth ov vy kuhudhys gans an Yedhewon, myghtern Agrippa, my a breder bos gwynn ow bys ow kul ow defens a-ragos hedhyw, 3dres oll drefenn bos meur dha skians yn pub usadow ha disputyans a'n Yedhewon. Rakhenna my a'th pys a woslowes orthiv gans perthyans.

4‘Ytho, oll an Yedhewon a woer gis ow bewnans a-dhia'm yowynkneth, bewnans spenys dhiworth an dalleth yn mysk ow henedhel hag yn Yerusalem. 5I re'm aswonnis termyn hir, mar mynnons desta, my dhe vewa avel Farise, herwydh an sekt an moyha straght yn agan kryjyans. 6Ha lemmyn my a sev ow pos breusys, drefenn ow govenek y'n dedhewadyow gwrys gans Duw dh'agan tasow 7may hwayt agan dewdhek loeth dos dhodho, ow kordhya yn tiwysyk nos ha dydh. A-dro dhe'n govenek ma yth ov kuhudhys gans an Yedhewon, A vyghtern. 8Prag yth yw breusys genowgh avel pyth na yllir y grysi, Duw dhe dhrehevel an re varow?

9‘Yn hwir, kyns my ow honan o sur y koedhva dhymm gul lies tra erbynn hanow Yesu a Nazareth. 10Hag yn tevri my a wrug hemma yn Yerusalem; ha pan dhegemmersen awtorita dhiworth an bennoferysi my a geas yn prison meur a'n syns, ha pan vons dampnys dhe'n mernans my a dewlis ow raglev er aga fynn, 11owth assaya aga ynnia dhe wul blasfemi; ha my a's kessydhyas yn fenowgh dres oll an synagys, hag y'm sorr konneryek er aga fynn my a's helghyas bys yn sitys estren.

Powl a Gews a'y Dreylyans

12‘Hag ow kul hemma, yth esen vy ow vyajya dhe Damaskus gans awtorita ha kummyas an bennoferysi; 13a-dro dhe hanter-dydh y'n hyns, A vyghtern, my a welas golow dhiworth nev, splanna ages an howl, ow kolowi a-dro dhymm hag a-dro dhe'n re esa ow vyajya genev. 14Pan goedhsen ni oll dhe'n dor, my a glewas lev ow leverel dhymm yn Ebrow, “Sowl, Sowl, prag y'm helghydh? Kales yw ragos potya orth an garthowyow.” 15Hag yn-medhav, “Piw osta, Arloedh?” Hag yn-medh an Arloedh, “Yesu ov vy, neb a helghydh. 16Mes sav yn-bann, ha sav war dha dreys; rag my re omdhiskwedhas dhis rag an entent ma, dha ordena gwas ha dustunier hag a'n taklow a welsys hag a'n taklow may hwrav omdhiskwedhes dhis ynna, 17orth dha livra dhiworth dha bobel ha dhiworth an Jentilys, dhe neb my a'th tannvon, 18rag igeri aga dewlagas, may treyllyons dhiworth tewlder dhe wolow, ha dhiworth awtorita Satnas dhe Dhuw, may tegemmerrons gevyans a beghosow, ha kevrenn yn mysk an re sanshes dre fydh ynnov vy.”

Powl a Gews a'y Bregoth

19‘Rakhenna, myghtern Agrippa, nyns en vy diwostydh dhe'n welesigeth nevek, 20mes my a dherivas yn kynsa dhe'n re na yn Damaskus hag ena yn Yerusalem ha dres oll an pow a Yudi, y koedh dhedha kemmeres edrek ha treylya dhe Dhuw, ow kul oberow dhe edrek. 21Drefenn an taklow ma, an Yedhewon a settyas dalghenn ynnov y'n tempel hag assaya ow ladha. 22Bys y'n jydh ma my re gavas sokor dhiworth Duw, ha rakhenna my a sev ow tustunia orth byghan ha bras, heb leverel travyth marnas an taklow a leveris ha'n brofoesi ha Moyses y hwrens hwarvos, 23y koedh dhe Grist godhav, may fe an kynsa, der y dhasserghyans dhiworth an re varow, dhe dherivas golow ha dh'agan pobel ha dhe'n Jentilys.’

Powl a Elow orth Agrippa dhe Grysi

24Hag ev ow kul y dhefens y'n for' ma, Festus a leveris, ughel y lev, ‘Mes a'th rewl osta, Powl; yma meur a lyenn orth dha dreylya gorboellek.’ 25Mes yn-medh Powl, ‘Nyns ov vy mes a'm rewl, bryntinna Festus, mes my a gews geryow a wiryonedh ha skians da. 26Rag an myghtern a gonvedh a-dro dhe'n taklow ma, hag orto ev my a gews, hardh ow lavarow, rag sur ov vy nag yw nagonan a'n taklow ma kudhys dhiworto, rag ny veu hemma gwrys yn kornell. 27Myghtern Agrippa, a grysydh jy an brofoesi? My a woer ty dhe grysi.’ 28Hag yn-medh Agrippa dhe Powl. ‘Hwath spys berr, ty a wra ow dynya dhe vos ha bos Kristyon.’ 29Hag yn-medh Powl, ‘Spys po berr po hir, my a bys Duw, ty hag ynwedh keniver a'm glew hedhyw mayth ellons ha bos kepar ha my, marnas an chaynys ma.’

30Ena an myghtern a sevis yn-bann, hag ynwedh an governour ha Bernike ha'n re esedhys gansa, 31ha pan esens owth omdenna, i a leveris an eyl orth y gila, ‘Nyns usi an den ma ow kul travyth ow tervynn an mernans po chaynys.’ 32Hag yn-medh Agrippa dhe Festus, ‘An den ma a allsa bos livrys, mar ny alwa orth Sesar.’