Peder a Yaghha Beggyer Evredhek

1Lemmyn yth esa Peder ha Yowann ow mos yn-bann dhe'n tempel dhe'n eur a bysadow, an nawves eur. 2Hag yth esa neb unn gour degys, evredhek a-dhia vrys y vamm, neb a worrens pub dydh ryb porth an tempel henwys Fethus, dhe wovynn alusen dhiworth an re esa owth entra y'n tempel. 3Ow kweles Peder ha Yowann parys dhe entra y'n tempel ev a bysis kavoes alusen. 4Peder, ow hwithra warnodho gans Yowann a leveris, ‘Mir orthyn.’ 5Hag ev a viras orta gans rach, ow kwaytya degemmeres neppyth dhiworta. 6Mes yn-medh Peder, ‘Ny'm beus nag arghans nag owr; mes an pyth a'm beus, henna a rov dhis: yn hanow Yesu Krist a Nazareth, sav, ha kerdh.3:6 sav, ha kerdh: War-lergh re a'n dornskrifow kerdh.’ 7Hag orth y dhalghenna er an leuv dhyghow ev a'n drehevis; hag a-dhistowgh y dhewdroes hag y dhewufern a veu gwrys krev, 8hag ow lamma yn-bann ev a sevis ha kerdhes hag entra gansa y'n tempel, ow kerdhes ha lamma ha gormel Duw. 9An dus oll a'n gwelas ev ow kerdhes hag ow kormel Duw; 10hag i a'n aswonnis avel an den o esedhys ryb Porth Fethus an tempel rag alusen, ha lenwys vons a varth ha sowdhan drefenn an pyth a hwarvia dhodho.

Peder a Gews yn Portal Solomon

11Hag ev ow synsi Peder ha Yowann, an dus oll, meur aga marth, a boenyas war-barth dhedha dhe'n golovenva henwys Portal Solomon. 12Pan welas Peder henna, ev a gewsis orth an bobel, ‘Gwer Ysrael, prag yma marth dhywgh a hemma, po prag y hwithrowgh warnan kepar ha pan y'n gwrussyn kerdhes der agan nerth po agan sansoleth agan honan? 13Duw Abraham, Ysak ha Yakob,3:13 Duw Abraham, Ysak ha Yakob: War-lergh re a'n dornskrifow Duw Abraham ha Duw Ysak ha Duw Yakob. Duw agan tasow, a ros golewder dh'y was3:13 was: Po flogh. Yesu, neb a dhaskorrsowgh ha nagha dherag Pilat pan ervirys o y livra. 14Mes hwi a naghas an Sans ha Gwiryon, ha govynn moldrer dhe vos grontys dhywgh, 15ha hwi a ladhas an Awtour a vewnans, neb a veu drehevys gans Duw dhiworth an re varow; dhe henna dustunioryon on ni. 16Ha'y hanow, dre fydh yn y hanow, a wrug krev an gour ma neb a welowgh hag aswonn, ha'n fydh dredho ev a ros dhodho an yeghes ma a-dheragowgh hwi oll.

17‘Ha lemmyn, breder, my a woer hwi dhe oberi dre dhiskians, kepar dell wrug agas rewloryon ynwedh, 18mes yndella Duw a gollenwis an taklow a dharganas ev dre anow an brofoesi oll, y Grist dhe wodhevel. 19Rakhenna kemmerewgh edrek, ha treylyewgh may fo defendys dhe-ves agas peghosow, 20may teffo dhiworth golok an Arloedh prysyow a dhifresyans ha may tannvonno ev an Krist ragordenys ragowgh, henn yw Yesu. 21Y telledh nev dh'y gemmeres bys yn prysyow daskorrans pup-tra oll, dell gewsis Duw dre anow y brofoesi sans nans yw pell. 22Yn tevri, Moyses a leveris, “An Arloedh agas Duw a dhrehav ragowgh profoes dhiworth agas breder, avelov vy; hwi a wra goslowes orto yn pup-tra a lavarro dhywgh. 23Hag y hwer, pub enev na wrello goslowes orth an profoes na dhe vos distruys yn tien mes a'n bobel.” 24Hag oll an brofoesi neb re gewsis, dhiworth Samuel ha'n re neb a dheuth war y lergh, i ynwedh a dharganas an dydhyow ma. 25Hwi yw mebyon an brofoesi ha'n kevambos a wrug Duw gans agan tasow, ow leverel dhe Abraham, “Y'th has pub teylu a'n norvys a vydh benniges.” 26Ragowgh hwi yn kynsa, Duw a dhrehevis y was3:26 was: Po flogh., ha'y dhannvon rag agas benniga orth agas treylya dhe-ves, yn kettep penn, dhiworth agas drogoberow.’