Ananias ha Saffira

1Mes unn gour, Ananias y hanow, ha'y wreg Saffira a werthas park, 2ha'y wreg ow kodhvos, ev a withas dhodho y honan rann a'n pris, ha dri an remenant, ha'y gorra orth treys an abesteli. 3Mes yn-medh Peder, ‘Ananias, prag y lenwis Satnas dha golonn, rag leverel gow dhe'n Spyrys Sans ha kemmeres dhis dha honan rann a bris an tir? 4Hag ev heb y wertha, a ny veu dhiso jy, ha wosa y vos gwerthys, a ny veu an mona dhiso jy? Prag y tewlsys an ober ma y'th kolonn? Ny leversys gow dhe dus, mes dhe Dhuw.’ 5Pan glewas Ananias an geryow ma, ev a goedhas dhe'n leur, hag ev a verwis; hag own meur a dheuth war beub a glewas anedhi. 6An wer yowynk a sevis ha'y vaylya, ha'y dhoen yn-mes ha'y ynkleudhyas.

7Hag y feu spas a-dro dhe dri our, ha'y wreg a dheuth a-ji, heb godhvos an pyth a hwarvia. 8Peder a leveris dhedhi, ‘Lavar dhymm mar kwerthsowgh an tir a'n sommenn ma?’ Ha hi a leveris, ‘Gwerthsyn, a'n sommenn na.’ 9Yn-medh Peder dhedhi, ‘Prag y fewgh unnver dhe demptya Spyrys an Arloedh? Otta, treys an re neb re ynkleudhyas dha wour ymons orth an daras, hag i a wra dha dhoen jy yn-mes.’ 10A-dhesempis hi a goedhas orth y dreys ha merwel. Pan dheuth an wer yowynk a-ji, i a's kavas marow, hag i a's dug yn-mes ha'y ynkleudhyas ryb hy gour. 11Hag own meur a dheuth war oll an eglos ha war oll an re a glewas a'n taklow ma.

An Abesteli a Yaghha Meur a Dus

12Lemmyn dre dhiwla an abesteli meur a doknys ha marthusyon a hwarva yn mysk an bobel; hag yth esens oll war-barth yn Portal Solomon; 13ha ny vedhas nagonan a'n re erell junya gansa, mes an bobel a's synsis yn enor meur. 14Ha moy a gryjygyon a veu keworrys dhe'n Arloedh, niverow bras hag a wer hag a venynes. 15Keffrys i a dhros yn-mes an glevyon y'n stretow, ha'ga gorra war weliow ha strelyow, may koettha skeus Peder dhe'n lyha war rann anedha hag ev ow passya. 16Hag ynwedh routh vras a'n sitys a-dro dhe Yerusalem a omguntellas, ow toen klevyon ha'n re o plagys gans tebel spyrysyon, hag i oll a veu yaghhes.

An Abesteli yw Helghys

17Ena y sevis an arghoferyas ha myns esa ganso, henn yw parti an Sadukeow, lenwys a avi, 18hag i a dhalghennas an abesteli ha'ga gorra y'n prison kemmyn. 19Mes nosweyth el an Arloedh a igoras darasow an prison, ha'ga hembronk yn-mes, ha leverel, 20‘Kewgh, sevewgh y'n tempel ha kewsewgh dhe'n bobel oll an geryow a'n bewnans ma.’ 21Pan glewsons hemma, i a entras y'n tempel a-dro dhe vora, ha dyski.

Lemmyn y teuth an arghoferyas ha'n re esa ganso, hag i a elwis an konsel hag oll an senedh a vebyon Ysrael, hag i a dhannvonas dhe'n prison may fens dres. 22Mes pan dheuth an soedhogyon, ny's kavsons y'n prison; ytho i a dhehwelis ha derivas, 23ow leverel, ‘Ni a gavas an prison deges fast yn tien, ha'n withysi ow sevel orth an darasow, mes pan igersyn ny gevsyn denvyth a-ji.’ 24Lemmyn pan glewas kapten an tempel ha'n bennoferysi an geryow ma, penndegys meur ens i, owth omwovynn pandr'a vedha siwyans hemma. 25Ha nebonan a dheuth ha derivas dhedha, ‘Otta, yma'n wer a worrsowgh y'n prison ow sevel y'n tempel, hag ow tyski an bobel.’ 26Ena an kapten ha ganso an withysi eth hag i a's dros heb nell, rag own a's teva a'n bobel, na vens labydhys.

27I a's dros ha'ga gorra a-dherag an konsel; ha'n arghoferyas a wovynnas orta, 28ow leverel, ‘Ni a erghis dhywgh yn stroeth ma na dhyskewgh y'n hanow ma, mes5:28 Ni a erghis dhywgh yn stroeth ma na dhyskewgh y'n hanow ma, mes: War-lergh re a'n dornskrifow A ny wrussyn erghi dhywgh yn stroeth ma na dhyskewgh y'n hanow ma? Mes otta, hwi re lenwis Yerusalem a'gas dyskas, hag ervirys owgh dhe dhri warnan ni goes an gour ma.’ 29Mes Peder ha'n abesteli a worthybis ha leverel, ‘Y koedh dhyn obaya dhe Dhuw, a-der dhe dus. 30Duw agan tasow a dhrehevis Yesu, neb a ladhsons orth y gregi yn gwydhenn; 31Duw a ughelhas an gour ma dh'y barth dhyghow avel Rewler ha Selwyas, rag ri edrek dhe Ysrael ha dehwelyans peghosow. 32Ha dustunioryon on ni dhe'n taklow ma, keffrys an Spyrys Sans res gans Duw dhe'n re a obay dhodho.’

33Ha pan glewsons hemma, i a veu serrys meur, ha mynnes aga ladha. 34Mes unn Farise y'n konsel henwys Gamaliel, dyskador a'n lagha hag enorys gans oll an bobel, a sevis yn-bann, hag erghi may fe an wer gorrys yn-mes termyn berr, 35hag yn-medh ev dhedha, ‘Gwer Ysrael, kemmerewgh with a'gas honan a-dro dhe'n pyth a vynnowgh dhe wul gans an dus ma. 36Rag nans yw neb termyn Thewdas a sevis, ow leverel y vos nebonan, ha dhodho niver a wer a junyas, a-dro dhe beswar kans anedha; ev a veu ledhys, ha kemmys a obaya dhodho a veu skoellys a-les ha ny dheuthons dhe dravyth. 37Wosa hemma Yudas a Alile a sevis yn dydhyow an niveryans, ha dynya rann a'n bobel war y lergh; hag ev ynwedh a verwis, ha kemmys a obaya dhodho a veu skoellys a-les. 38Ytho, lemmyn my a lever dhywgh, sevewgh a-ves dhiworth an dus ma ha gesewgh i; rag mars yw a dhensys an towl ma po an ober ma, distruys vydh, 39mes mars yw a Dhuw, ny yllowgh hwi aga distrui, na vowgh kevys yn tevri bos ow sevel erbynn Duw.’

Ytho i a obayas dhodho, 40ha pan alwsens an abesteli, i a's kronkyas hag erghi dhedha na gowssens yn hanow Yesu, ha'ga livra. 41Rakhenna, i eth yn-mes dhiworth an konsel ow lowenhe, drefenn aga bos reknys gwiw dhe berthi disenor a-barth an hanow. 42Ha pub dydh y'n tempel hag y'n chiow ny hedhsons dyski ha pregoth Yesu, an Krist.