Seyth Dewisys rag Servya

1Lemmyn y'n dydhyow ma, ha niver an dhyskyblon ow kressya, yth esa krodhvol gans an Hellenistyon war an Ebrowyon, drefenn bos aga gwedhwesow gesys a-denewen y'n lesrannans pub dydh oll. 2Ha'n dewdhek a elwis war-barth kowethyans an dhyskyblon, ha leverel, ‘Ny dhelledh ni dhe asa ger Duw rag servya orth moesow. 3Rakhenna, breder, hwilewgh yn agas mysk seyth gour gerys-da, leun a'n Spyrys hag a furneth, neb a wren ni apoyntya dhe'n charj ma; 4mes ni a wra omri dhe bysadow hag yn menystrans an ger.’ 5Ha'n lavar a blesyas an gemmynieth oll, hag i a dhewisas Stefan, gour leun a fydh hag a'n Spyrys Sans, ha Felip ha Proghorus ha Nikanor ha Timon ha Parmenas ha Nikolas, proselyt a Antiogh. 6I a settyas an re ma a-dherag an abesteli, hag i a bysis ha gorra aga diwla warnedha.

7Ha ger Duw a devis, ha niver an dhyskyblon yn Yerusalem a veu kressys meur, hag yth esa routh vras a'n oferysi ow tos ha bos gostydh dhe'n fydh.

Stefan yw Dalghennys

8Ha Stefan, leun a ras hag a nell, a wrug marthusyon meur hag toknys yn mysk an bobel. 9Mes rann a'n re esa dhe synaga an Rydhyon, dell o henwys, tus a Kyrene, hag Aleksandria, ha tus dhiworth Kilikia hag Asia, a sevis hag argya orth Stefan, 10mes ny allsons sevel erbynn an furneth ha'n Spyrys mayth esa ow kewsel. 11Ena i a vovyas gwer yn-dann gel dhe leverel, ‘Ni re'n klewas ow kewsel geryow blasfemus erbynn Moyses ha Duw.’ 12Hag i a ynnias war an bobel ha'n henavogyon ha'n skribys, hag i a dheuth dhodho ha'y dhalghenna ha'y ledya dhe'n konsel, 13hag i a dhros fals dhustunioryon, neb a leveris, ‘Ny hedh an den ma kewsel geryow erbynn an tyller sans ma ha'n lagha. 14Rag ni re'n klewas ow leverel y hwra an Yesu ma a Nazareth distrui an tyller ma ha chanjya an usyow a ros Moyses dhyn.’ 15Hag ow hwithra orto, oll an re esa owth esedha y'n konsel a welas bos y fas kepar ha fas el.