Areth Stefan orth an Konsel

1Ha'n arghoferyas a wovynnas, ‘Yw gwir an taklow ma?’ 2Hag yn-medh ev:

‘Breder ha Tasow, goslowewgh. An Duw a wolewder a omdhiskwedhas dhe Abraham hag ev yn MesopChuotamia, kyns ev dhe driga yn Haran, 3hag a leveris dhodho, “Ke yn-rag mes a'th tir hag a'th neshevin, ha deus y'n tir a dhiskwedhav dhis.” 4Ena ev eth mes a bow an Kaldeanys ha triga yn Haran. Hag alena, wosa y das dhe verwel, Duw a'n tennas yn-mes y'n tir ma mayth esowgh hwi trigys lemmyn. 5Hwath ny ros dhodho eretons ynno, na kyn fe troesla, mes ev a dhedhewis y ri rag perghennogeth dhodho ev ha dh'y henedh war y lergh, kyn nag esa flogh dhodho. 6Ha Duw a gewsis yndella, y fedha y henedh alyons yn tir tus erell; hag i a's gwre kethyon ha'ga thebeldhyghtya dres peswar kans blydhen; 7“Ha my a wra breusi an genedhel a servyons”, yn-medh Duw, “ha wosa an taklow ma i a wra dos yn-mes, hag i a wra ow gordhya y'n tyller ma.” 8Hag ev a ros dhodho kevambos a drodreghi; hag Abraham a dhineythis Ysak, ha'y drodreghi dhe'n ethves dydh, hag Ysak a dheuth ha bos tas Yakob, ha Yakob a dheuth ha bos tas an dewdhek ugheldas.

9‘Ha'n ugheldasow, lenwys a avi, a werthas Yosep yn Ejyp; mes yth esa Duw ganso, 10hag ev a'n sawyas mes a'y boenvos oll, ha ri dhodho favour ha furneth dherag Faro myghtern Ejyp, neb a'n ordenas governour dres Ejyp ha dres y goskordh oll. 11Lemmyn y teuth divoetter dres oll Ejyp ha Kanan, ha poenvotter meur, ha ny ylli agan tasow kavoes boes. 12Mes pan glewas Yakob bos ys yn Ejyp, ev a dhannvonas yn-rag agan tasow an kynsa gweyth; 13ha'n nessa gweyth Yosep a veu aswonnys gans y vreder, ha Faro a wodhya a-dro dhe deylu Yosep. 14Ena Yosep a dhannvonas ha gelwel Yakob y das ha'y neshevin oll, pymthek enev ha tri-ugens. 15Ytho Yakob eth yn-nans dhe Ejyp, hag ev ha'gan tasow a verwis, 16hag a veu degys dhe Shekem ha gorrys y'n bedh a brenas Abraham a bris arghans dhiworth mebyon Hamor yn Shekem.

17‘Pan nesas termyn an dedhewadyow a ros Duw dhe Abraham, an bobel a devis hag a veu lieshes yn Ejyp, 18bys pan sevis ken myghtern dres Ejyp, na aswonnis Yosep. 19Ev a dhyghtyas agan agh yn fel, hag arwaska agan tasow, ow kul dhedha gorra aga fleghesigow yn-mes ma na vens gwithys yn few. 20Y'n termyn ma y feu Moyses genys, ha teg o a-wel dhe Dhuw. Ev a veu megys tri mis yn chi y das, 21ha pan veu gorrys yn-mes, myrgh Faro a'n kemmeras yn-bann ha'y veythrin avel hy mab hy honan. 22Ha Moyses a veu dyskys yn oll skentoleth an Ejyptianys, ha nerthek o yn y eryow ha'y oberow.

23‘Mes pan o dew-ugens bloedh, y teuth yn y golonn mos dhe weles y vreder, mebyon Ysrael. 24Pan welas onan anedha ow pos kammdhyghtys, ev a dheuth dh'y weres, hag ow kweskel an gour ejyptek, ev a dhiallas an gour a veu kammdhyghtys. 25Lemmyn ev a dybis y vreder dhe gonvedhes Duw dhe ri selwyans dhedha der y leuv; mes ny gonvedhsons. 26Ha ternos ev a omdhiskwedhas dhedha, hag i owth omladh, hag ev a assayas aga unnverhe yn kres, ow leverel, “Gwer, breder owgh hwi; prag y kammdhyghtyowgh an eyl y gila?” 27Mes an gour esa ow kammdhyghtya y gentrevek a'n herdhyas dhe-ves, ow leverel, “Piw a'th ordenas dhe vos rewler ha breusyas dreson? 28A vynn'ta ow ladha vy par dell ledhsys an gour ejyptek de?” 29Ytho orth an ger ma Moyses a fias, ha mos ha bos alyon yn pow Midyan, may tineythis dew vab dhodho.

30‘Lemmyn pan o tremenys dew-ugens blydhen, el a omdhiskwedhas dhodho yn gwylvos menydh Sinay yn flamm bos ow tewi. 31Moyses pan y'n gwelas, marth a'n jeva a'n wel; hag ev ow nesa rag mires, y teuth lev an Arloedh: 32“Duw dha dasow ov vy, Duw Abraham hag Ysak ha Yakob.” Mes Moyses a grenas, ha ny vedhas mires. 33Hag yn-medh an Arloedh dhodho, “Lows dha sandalyow a'th treys; rag an tyller may sevydh yw dor sans. 34My re welas arwask ow fobel yn Ejyp, ha my re's klewas ow kyni, ha my re dheuth yn-nans rag aga sawya; lemmyn, deus, dha dhannvon dhe Ejyp a wrav.”

35‘An Moyses ma, neb a naghsons, ow leverel, “Piw a'th ordenas bos rewler ha breusyas?” Duw a'n dannvonas dhe vos ha rewler ha selwyas dre leuv an el neb a omdhiskwedhas dhodho y'n bos. 36An gour ma a's hembronkas yn-mes, ow kul marthusyon hag toknys yn pow Ejyp, hag orth an Mor Rudh, hag y'n gwylvos dres dew-ugens blydhen. 37Hemm yw an Moyses a leveris dhe vebyon Ysrael, “Duw a dhrehav ragowgh profoes dhiworth agas breder, dell y'm drehevis vy.” 38Hemm yw neb esa y'n kuntelles y'n gwylvos gans an el a leveris dhodho yn menydh Sinay, ha gans agan tasow; hag ev a dhegemmeras lavarow bew dhe ri dhyn, 39dhe neb ny vynnas agan tasow bos gostydh, mes i a'n herdhyas dhe-ves ha treylya dhe Ejyp yn aga holonnow, 40ow leverel dhe Aron, “Gwra formya ragon ni duwow neb a wra mos a-dheragon; ha'n Moyses ma neb a'gan hembronkas yn-rag mes a bow Ejyp, ny wodhon an pyth re hwarva dhodho.” 41Hag y'n dydhyow na i a formyas leugh hag offrynna sakrifis dhe'n idol ha lowenhe yn oberow aga diwla. 42Mes Duw a dreylyas ha'ga daskorr dhe wordhya lu nev, par dell yw skrifys yn lyver an brofoesi:

“A dhresowgh hwi dhymm offrynnow ledhys ha sakrifisow

dew-ugens blydhen y'n gwylvos, A ji Ysrael?

43Hwi a gemmeras yn-bann tylda Molok

ha sterenn agas duw Refan,

an imajys hag a formsowgh rag aga gordhya;

ha my a wra agas divroa dhe'n tu arall dhe Babylon.”

44‘Yth esa dh'agan tasow tylda an dustuni y'n gwylvos dell erghis ev neb a leveris dhe Moyses, may fe gwrys war-lergh an patron re welsa. 45Pan y'n degemmersens, agan tasow a'n dros gans Yoshua pan fessons an kenedhlow hag a dewlis Duw yn-mes a-dherag agan tasow, bys yn dydhyow Davydh, 46a gavas favour gans Duw, ha govynn kummyas dhe gavoes trigva rag chi Yakob.7:46 rag chi Yakob: War-lergh re a'n dornskrifow rag Duw Yakob. 47Mes y feu Solomon neb a dhrehevis chi ragdho. 48Mes ny drig an Ughella yn annedhow gwrys gans diwla; dell lever an profoes,

49“Nev yw ow se,

ha'n norvys skavell-droes ow threys;

py par chi a wrewgh hwi y dhrehevel ragov, yn-medh an Arloedh,

po pyth yw tyller ow fowesva?

50A ny wrug ow leuv oll an taklow ma?”

51‘A hwi kales agas kilbenn, hag antrodreghys yn agas kolonn hag yn agas diwskovarn, pup-prys y sevowgh erbynn an Spyrys Sans, kepar dell wre agas tasow, yndella hwi ynwedh a wra. 52Py re a'n brofoesi ny veu helghys gans agas tasow? Hag i a ladhas an re a dharganas an Den Gwiryon dhe dhos, hag anodho ev hwi lemmyn res eth ha bos traytours ha moldroryon, 53hwi neb a dhegemmeras an lagha dell veu res gans eledh, ha neb na'n gwithas.’

Labydha Stefan

54Lemmyn pan glewsons an taklow ma, konneryek vons yn aga holonnow, hag i a dheskornas orto. 55Mes leun a'n Spyrys Sans, hag ow mires stark yn nev, ev a welas golewder Duw ha Yesu ow sevel dhe'n barth dhyghow dhe Dhuw; 56hag ev a leveris, ‘Otta, my a wel an nevow igerys, ha Mab an den ow sevel dhe'n barth dhyghow dhe Dhuw.’ 57Mes i a skrijas, ughel aga lev, ha stoppya aga diwskovarn, ha fyski war-barth bys dhodho. 58Ena i a'n tewlis mes a'n sita ha'y labydha; ha'n dhustunioryon a worras aga dillas orth treys gour yowynk henwys Sowl. 59Hag i ow labydha Stefan, ev a elwis war Dhuw, ow leverel, ‘Arloedh Yesu, degemmer ow spyrys’, 60hag ow mos war benn-dewlin ev a grias, ughel y lev, ‘Arloedh, na syns an pegh ma er aga fynn.’ Pan lavarsa hemma, ev a goedhas yn kosk.