Sowl a Helgh an Eglos

1Hag yth esa Sowl owth assentya dh'y ladhva. Hag y'n jydh na yth esa helghyans meur erbynn an eglos yn Yerusalem, hag i oll a veu skattrys dres an powyow a Yudi ha Samaria, marnas an abesteli. 2Gwer gryjyk a ynkleudhyas Stefan ha gul dresto oelva veur. 3Mes yth esa Sowl ow ravna an eglos; hag owth entra yn chi wosa chi, ev a dhraylya dhe-ves ha gwer ha benynes ha'ga gorra yn prison.

Felip a Bregoth yn Samaria

4Lemmyn an re a veu skattrys eth a-derdro, ow pregoth an ger. 5Mes Felip eth yn-nans dhe'n sita a Samaria8:5 dhe'n sita a Samaria: War-lergh re a'n dornskrifow dhe sita a Samaria. ha pregoth dhedha an Krist, 6ha gans unn akord an routhow a goelas orth an pyth a veu leverys gans Felip pan y'n klewsons ha gweles an toknys esa orth aga gul. 7Rag lies spyrys avlan a dheuth yn-mes a'n dus a's tevo, ow kria ughel aga lev; ha lies o palsyes po evredhek a veu yaghhes; 8hag yth esa meur a lowena y'n sita na.

9Lemmyn yth esa unn gour henwys Simon neb a wre pystria seuladhydh y'n sita, ha gorra marth yn bobel Samaria, ow leverel y vos nebonan meur y vri; 10i oll, byghan ha bras, a goela orto, ow leverel, ‘An gour ma yw nerth Duw, henwys Meur.’ 11Hag i a goela orto drefenn ev dhe worra marth ynna der y bystri dres termyn hir. 12Mes pan gryssons i dhe Felip hag ev ow pregoth a-dro dhe wlaskor Duw ha hanow Yesu Krist, besydhys vons, ha gwer ha benynes. 13Hag ynwedh Simon y honan a grysis, ha wosa y vos besydhys ev a junyas gans Felip; hag ow kweles toknys ha marthusyon meur gwrys, marth a'n jeva.

14Ha'n abesteli yn Yerusalem, pan glewsons Samaria dhe dhegemmeres ger Duw, a dhannvonas dhedha Peder ha Yowann, 15neb eth yn-nans dhe bysi ragdha, may tegemmerrens an Spyrys Sans; 16hwath ny goedhsa war dhenvyth anedha, mes besydhys viens unnsel yn hanow an Arloedh Yesu. 17Ena i a worras aga diwla warnedha, hag i a dhegemmeras an Spyrys Sans. 18Lemmyn Simon, pan welas y feu res an Spyrys dre worra diwla an abesteli, a brofyas dhedha mona, ow leverel, 19‘Rewgh dhymm ynwedh an awtorita ma, may tegemmerro ev an Spyrys Sans piwpynag a worriv ow diwla warnodho.’ 20Mes yn-medh Peder dhodho, ‘Dhe goll re ylli ha genes dha arghans, drefenn ty dhe dybi y hyllydh kavoes ro Duw dre vona. 21Ny'th eus na rann na le y'n mater ma, rag nyns yw dha golonn ewn dherag Duw. 22Kemmer edrek, ytho, a'n sherewynsi usi dhis, ha pys war an Arloedh may fo gevys dhis, mar kyll bos, mynnas dha golonn. 23Rag, dell welav, yn bystel a hwerowder hag yn kolm a gammhynseth yth esos.’ 24Ha Simon a worthybis, ‘Pysewgh ragov war an Arloedh, ma na dheffo warnav nagonan a'n taklow re leversys.’

25Ena wosa doen dustuni ha kewsel ger an Arloedh, i a dhehwelis dhe Yerusalem, ow pregoth an aweyl yn lies tre a'n Samaritanys.

Felip ha'n Spadhesik a Ethiopia

26Mes el an Arloedh a gewsis orth Felip, ow leverel, ‘Sav yn-bann ha ke troha'n dyghow y'n fordh ow mos war-nans dhiworth Yerusalem dhe Gaza.’ Hemm yw difeythtir. 27Ytho ev a sevis ha mos. Hag otta, gour a Ethiopia, spadhesik, lyswas Kandake, myghternes tus Ethiopia, dhe neb esa charj dres hy thresor oll, re dhothya dhe Yerusalem rag gordhya, 28hag yth esa ow tehweles, esedhys yn y jarett, hag ow redya an profoes Ysay. 29Hag yn-medh an Spyrys dhe Felip, ‘Ke, gwra nesa ha junya gans an charett ma.’ 30Ha Felip a boenyas dhodho, ha'y glewes ow redya Ysay an Profoes, hag yn-medh ev, ‘A gonvedhydhta, ytho, an pyth a redydh?’ 31Hag yn-medh ev, ‘Yn tevri, fatell allav vy, marnas nebonan a'm gittyo?’ Hag ev a bysis Felip mayth yskynno dhe esedha ganso. 32Lemmyn rann an skryptor esa orth hy redya o homma,

‘Kepar ha davas ev a veu ledys dhe ladhva

ha kepar dell yw avlavar oen a-rag an knyver,

yndella ny iger ev y anow.

33Yn y sham gwirvreus a veu kemmerys dhiworto;

piw a wra derivas y henedh?

Rag y vewnans yw kemmerys dhe-ves dhiworth an norvys.’

34Yn-medh an spadhesik dhe Felip, ‘My a wovynn orthis, piw y lever an profoes hemma a-dro dhodho? A-dro dhodho y honan, po a-dro dhe dhen arall?’ 35Ena Felip a igoras y anow, hag ow talleth dhiworth an skryptor ma, ev a bregowthas Yesu dhodho.

36Hag i ow mos der an fordh, i a dheuth dhe dhowr, hag yn-medh an spadhesik, ‘Otta dowr; pandra'm lett rag bos besydhys?’ 37Hag yn-medh Felip, ‘Mar krysydh gans oll dha golonn, gwiw yw.’ Hag ev a worthybis, ‘My a grys bos Yesu Krist Mab Duw.’8:37 Nyns usi an wers ma y'n dornskrifow a-varra. 38Ena ev a worhemmynnis mayth hettha an charett, hag i eth yn-nans y'n dowr aga dew, ha Felip ha'n spadhesik, hag ev a'n besydhyas. 39Ha pan dheuthons yn-bann mes a'n dowr, Spyrys an Arloedh a gachyas Felip dhe-ves; ny'n gwelas an spadhesik na fella, hag ev eth y'n fordh yn unn lowenhe. 40Mes Felip a veu kevys yn Azotus, hag ow mos dres an pow8:40 mos dres an pow: Greka ow tremena ev a bregowthas an aweyl y'n sitys oll bys pan dheuth dhe Sesarea.