Treylyans Sowl

1Mes Sowl, hwath owth anella godrosow ha denladh erbynn dyskyblon an Arloedh, eth dhe'n arghoferyas, 2ha pysi dhiworto lytherow dhe'n synagys yn Damaskus may trolla yn kelmys dhe Yerusalem myns a dus an Fordh a gaffa, ha gwer ha benynes. 3Lemmyn, hag ev ow mos, y hwarva pan esa ow tos nes dhe Damaskus, a-dhesempis golow mes a nev a splannas a-dro dhodho, 4hag ev a goedhas dhe'n dor, ha klewes lev ow leverel dhodho, ‘Sowl, Sowl, prag y'm helghydh vy?’ 5Yn-medh ev, ‘Piw osta, Arloedh?’ Hag ev a leveris, ‘My yw Yesu, neb a helghydh. 6Mes sav yn-bann, ke a-ji dhe'n sita, ha leverys vydh dhis an pyth a dhelledh ty dhe wul.’ 7Lemmyn an wer esa ow vyajya ganso a sevis avlavar, ow klewes an son, mes heb gweles denvyth. 8Sowl a sevis dhiworth an dor ha pan veu igerys y dhewlagas, ny welas travyth; hag orth y ledya er an leuv, i a'n dros yn Damaskus. 9Ha tri dydh ny ylli gweles, ha ny dhybris nag eva.

10Lemmyn yth esa yn Damaskus unn dyskybel henwys Ananias, ha'n Arloedh a leveris dhodho yn hunros, ‘Ananias.’ Hag yn-medh ev, ‘Ottavy, Arloedh.’ 11Ha'n Arloedh a leveris dhodho, ‘Sav yn-bann, ke dhe'n stret henwys Digamm, hag yn chi Yudas hwila den Tarsus, henwys Sowl, rag otta, yma ev ow pysi, 12hag ev re welas yn hunros gour henwys Ananias ow tos a-ji hag ow korra y dhiwla warnodho, may hwello arta.’ 13Hag Ananias a worthybis, ‘Arloedh, my re glewas dhiworth lies a-dro dhe'n gour ma, pygemmys drog re wrug ev dhe'th syns yn Yerusalem; 14hag omma ev a'n jeves awtorita dhiworth an bennoferysi dhe gelmi myns a grio war dha hanow.’ 15Mes an Arloedh a leveris dhodho, ‘Ty ke, drefenn bos hemma ow mayn dewisys rag doen ow hanow a-dherag an Jentilys ha myghternedh ha mebyon Ysrael; 16rag my a wra diskwedhes dhodho pygemmys y telledh ev dhe wodhav a-barth ow hanow.’ 17Hag Ananias eth dhe-ves hag entra y'n chi, hag ow korra y dhiwla warnodho ev a leveris, ‘Broder Sowl, an Arloedh re'm dannvonas, Yesu neb a omdhiskwedhas dhis y'n fordh may teuthys, may hwylli arta, ha bos lenwys a'n Spyrys Sans.’ 18Hag a-dhistowgh neppyth kepar ha skans a goedhas dhe-ves dhiworth y dhewlagas, hag ev a welas arta. Ena ev a sevis yn-bann hag a veu besydhys, 19hag ow kemmeres boes ev a veu krevhes.

Sowl a Bregoth yn Damaskus

Yth esa gans an dhyskyblon yn Damaskus niver a dhydhyow 20hag a-dhistowgh ev a bregowthas Yesu y'n synagys, y vos Mab Duw. 21Pubonan oll neb a'n klewas a's tevo marth, hag yn-medhons i, ‘A nyns yw hemma an gour re dhistruis an re na yn Yerusalem neb a gri war an hanow ma? Ha deuva omma rakhemma, ma's dokko i yn kelmys a-dherag an bennoferysi.’ 22Mes Sowl a veu lenwys moy ha moy a nerth, hag ev a worras yn deray an Yedhewon esa trigys yn Damaskus, ow previ bos hemma an Krist.

Sowl a Dhienk dhiworth an Yedhewon

23Pan o tremenys lies dydh an Yedhewon a vrasas war-barth rag y ladha; 24mes aga bras a dheuth ha bos godhvedhys dhe Sowl. I a aspias gluw orth an porthow, ha dydhweyth ha nosweyth, ma'n distruens; 25mes an dhyskyblon a'n kemmeras nosweyth, ha'y worra yn-nans dres an fos yn kanstell.

Sowl yn Yerusalem

26Pan dhothya yn Yerusalem, ev a assayas junya gans an dhyskyblon; mes yth esa dhedha i oll own anodho rag ny gryssons y vos dyskybel. 27Mes Barnabas a'n kemmeras, ha'y dhri dhe'n abesteli ha derivas dhedha fatell welsa an Arloedh y'n fordh, neb a gowssa orto, ha fatell arethsa yn hardh yn Damaskus yn hanow Yesu. 28Ytho ev eth a-ji hag yn-mes gansa yn Yerusalem, owth arethya yn hardh yn hanow an Arloedh, 29hag ev a gewsis ha disputya orth an Hellenistyon; mes i a assayas y ladha. 30Mes pan wodhva an vreder, i a'n dros yn-nans dhe Sesarea ha'y dhannvon yn-rag dhe Tarsus.

31Ytho, yth esa kres dhe'n eglos dres oll Yudi ha Galile ha Samaria, ha drehevys veu; ow kerdhes yn own an Arloedh hag yn konfort an Spyrys Sans, hi a balshas.

Yaghheans Ayneas

32Lemmyn, dell hwarva, Peder, hag ev ow mos a-dro yn pub le, a dheuth ynwedh dhe'n syns trigys yn Lydda. 33Ena ev a gavas unn den henwys Ayneas, neb re bia a'y wrowedh war weli eth blydhen, rag palsyes ova. 34Yn-medh Peder dhodho, ‘Ayneas, Yesu Krist a'th yaghha; sav yn-bann ha kempenn dha weli.’ Hag a-dhistowgh ev a sevis yn-bann. 35Ha pubonan trigys yn Lydda ha Sharon a'n gwelas, ha treylya dhe'n Arloedh.

Peder yn Lydda ha Yoppa

36Lemmyn yn Yoppa yth esa unn dhyskybles henwys Tabitha, henn yw dhe styrya Dorkas;9:36 Dorkas: Po Gavrewik. an venyn ma o leun a oberow da hag a rians alusenow. 37Ha dell hwarva y'n dydhyow na klav o hi, ha hi a verwis; ha wosa hy golghi i a's gorras a'y growedh yn soler. 38Lemmyn rag bos Lydda ogas dhe Yoppa, an dhyskyblon a glewas bos Peder ena ha dannvon dew wour dhodho, ow pysi, ‘Heb strechya, deus dhyn ni.’ 39Ytho Peder a sevis yn-bann ha mos gansa; pan dhothya, i a'n ledyas yn-bann dhe'n stevell wartha, ha'n gwedhwesow oll a sevis rybdho, owth oela hag ow tiskwedhes krysyow ha dillas re wrussa Dorkas ha hi gansa. 40Mes Peder a's gorras i oll yn-mes, ha mos war benn-dewlin ha pysi; ena ow treylya dhe'n korf ev a leveris, ‘Tabitha, sav yn-bann.’ Ha hi a igoras hy dewlagas, ha pan welas hi Peder hi a esedhas yn-bann. 41Hag ev a ros dhedhi y leuv ha'y drehevel; hag ow kelwel an syns ha'n gwedhwesow, ev a's diskwedhas yn few. 42Hag y teuth ha bos godhvedhys dres oll Yoppa, ha lies a grysis y'n Arloedh. 43Hag y hwarva ev dhe wortos yn Yoppa lies dydh gans unn Simon, dyghtyer kreghyn.