Dedhewadyow an Spyrys Sans

1Y'n kynsa lyver, O Theofilus, my a skrifas a-dro dhe'n taklow oll hag a dhallathas Yesu ha gul ha dyski 2bys y'n jydh may feu kemmerys yn-bann, wosa ev dhe ri gorhemmynnow der an Spyrys Sans dhe'n abesteli neb re dhewissa; 3dhedha ynwedh ev a omdhiskwedhas yn few dre lies prov wosa ev dhe wodhevel, dres dew-ugens dydh owth omdhiskwedhes dhedha hag ow kewsel a-dro dhe wlaskor Duw; 4hag owth omguntell gansa,1:4 hag owth omguntell gansa: War-lergh re a'n dornskrifow hag orth aga huntell war-barth. ev a erghis dhedha ma na dhibarthens a Yerusalem, mes gortos dedhewadyow an Tas, ‘hag a glewsowgh ahanav’, yn-medh ev; 5‘Rag Yowann a vesydhyas gans dowr, mes kyns lies dydh besydhys vydhowgh gans an Spyrys Sans.’

Assenshyon Yesu

6Ytho, hag i kuntellys war-barth, i a wovynnas orto, ow leverel, ‘Arloedh, a wre'ta y'n tor' ma daskorr an wlaskor dhe Ysrael?’ 7Ev a leveris dhedha, ‘Nyns yw dhywgh hwi godhvos na prysyow na sesonyow re settyas an Tas der y awtorita y honan. 8Mes hwi a dhegemmer nerth pan dheu an Spyrys Sans warnowgh, ha dustunioryon vydhowgh dhymm, hag yn Yerusalem hag yn oll Yudi ha Samaria ha bys penn pella an norvys.’ 9Ha pan lavarsa hemma, hag i ow mires, ev a veu kemmerys yn-bann ha kommolenn a'n degemmeras mes a'ga golok. 10Ha pan esens ow mires stark troha nev, hag ev ow mos, otta dew wour a sevis rybdha, gwynn aga dillas, 11neb a leveris, ‘Gwer Galile, prag y sevowgh hwi ow mires troha nev? An Yesu ma, neb re beu kemmerys yn-bann dhiworthowgh yn nev, a dheu y'n keth vaner ma'n gwelsowgh ow mos yn nev.’

Matthias Dewisys yn le Yudas

12Ena i a dhehwelis dhe Yerusalem dhiworth an menydh henwys Oliv, usi ogas dhe Yerusalem, pellder kerdh an sabot. 13Ha pan entersens, i eth yn-bann dhe stevell an soler mayth esens i trigys, Peder ha Yowann ha Jamys hag Androw, Felip ha Tommas, Bertyl ha Matthew, Jamys mab Alfeus ha Simon Zelotes ha Yudas mab Jamys. 14Oll an re ma gans unn akord a omri dhe bysadow, gans an benynes ha Maria mamm Yesu ha gans y vreder.

15Hag y'n dydhyow na Peder a sevis yn-bann yn mysk an vreder – niver an routh kuntellys war-barth o a-dro dhe hwegh-ugens – ha leverel, 16‘Breder, res o an skryptor dhe vos kollenwys, a dharganas an Spyrys Sans dre anow Davydh a-dro dhe Yudas, neb a dheuth ha bos gidyer dhe'n re a dhalghennas Yesu, 17rag niverys o yn agan mysk, hag ev a gavas gevrenn y'n menystrans ma. 18Lemmyn hemma a brenas park gans an gober a gammweyth, hag ow koedha sket, y dorr ev a veu folsys a-les yn y gres, hag oll y golodhyon a frosas yn-mes; 19hag y teuth ha bos godhvedhys oll dhe drigoryon Yerusalem, may feu henwys an park na yn aga yeth aga honan Hakeldama, henn yw, Park Goes. 20Rag skrifys yw yn Lyver an Salmow,

“Bedhes y annedh ynyal,

na vedhes denvyth dhe driga ynno”;

ha

“Kemmeres ken onan y soedh.”

21Rakhenna y telledh, a'n wer ow kowethya genen dres oll an termyn mayth e an Arloedh Yesu a-ji hag yn-mes yn agan mysk 22ow talleth dhiworth besydh Yowann bys y'n jydh may feu kemmerys yn-bann dhiworthyn, onan a'n re ma dhe dhos ha bos dustunier genen ni a'y dhasserghyans.’ 23Hag i a settyas yn-rag dew, Yosep henwys Barsabbas, les-henwys Yustus, ha Matthias. 24I a bysis ha leverel, ‘Ty, Arloedh, neb a aswonn kolonnow tus oll, diskwa pyneyl re dhewissys 25dhe gemmeres an tyller1:25 an tyller: War-lergh re a'n dornskrifow an rann. y'n menystrans ma hag y'n abostolieth ma, may koedhas Yudas rag mos dh'y le y honan.’ 26Hag i a dewlis prenn ragdha, ha'n prenn a goedhas war Matthias, ha reknys o yn mysk an unnek abostol.