Bras Haman dhe Dhistrui an Yedhewon

1Wosa an taklow ma, myghtern Ahasuerus a ughelhas Haman mab Hammedatha an Agagyas, ha'y avonsya, ha settya y se dres an bennsevigyon oll esa ganso. 2Hag oll gwesyon an myghtern esa yn yet an myghtern, e war benn-glin hag omblegya dhe Haman: rag yndella yth arghsa an myghtern a-dro dhodho. Mes ny wrug Mordekay mos war benn-glin nag omblegya dhodho. 3Ena gwesyon an myghtern, esa yn yet an myghtern, a leveris dhe Mordekay, ‘Prag y kammdremenydh erbynn gorhemmynn an myghtern?’ 4Lemmyn pub dydh pan gewsens dhodho, ha ny woslowi ev orta, i a'n derivas dhe Haman, rag gweles mar pe geryow Mordekay godhevys, rag ev a lavarsa dhedha y vos Yedhow. 5Ha pan welas Haman nag e Mordekay war benn-glin nag omblegya dhodho, Haman a veu lenwys a sorr. 6Mes ev a skornyas settya dalghenn yn Mordekay y honan heb denvyth arall; rag i a dherivsa dhodho piw o pobel Mordekay. Ytho Haman a hwilas distrui oll an Yedhewon esa yn oll gwlaskor Ahasuerus, pobel Mordekay.

7Y'n kynsa mis, yw an mis Nisan, y'n dewdhegves blydhen a vyghtern Ahasuerus, tewlel Pur a wrussons, henn yw an prenn, a-dherag Haman dhe dhewis an jydh ha'n mis, ha'n prenn a goedhas war drydhegves dydh3:7 ha'n prenn a goedhas war drydhegves dydh: Amendys, ow siwya an Septuagint. Drydhegves: Cf 8:12 ha 9:1. an dewdhegves mis, yw an mis Adar. 8Ena yn-medh Haman dhe'n myghtern Ahasuerus, ‘Yma unn bobel skattrys a-les ha diberthys yn mysk an poblow yn oll rannvroyow dha wlaskor; ha'ga laghys yw dihaval dhe laghys pub pobel arall, ha ny withons laghys an myghtern. Ytho nyns yw ewn an myghtern dh'aga godhav. 9Mara pleg dhe'n myghtern, bedhes skrifys y fydhons distruys: ha my a wra poesa deg mil dalent a arghans yn diwla an re charjys gans an ober, rag y dhri a-berth yn tresorvaow an myghtern.’ 10Ytho an myghtern a gemmeras y vysow-sel dhiworth y leuv, ha'y ri dhe Haman mab Hammedatha an Agagyas, eskar an Yedhewon. 11Yn-medh an myghtern dhe Haman, ‘An arghans yw res dhis, ha'n bobel ynwedh, rag gul gensi an pyth a vo da y'th wolok.’

12Ena skrifwesyon an myghtern a veu gelwys y'n kynsa mis, y'n trydhegves dydh, ha skrifys veu poran dell arghsa Haman, dhe wahalyethow an myghtern ha dhe wovernours pub rannvro, ha dhe bennsevigyon pub pobel; dhe bub rannvro herwydh y skrif, ha dhe bub pobel herwydh hy thaves; y feu skrifys yn hanow an myghtern Ahasuerus, ha selys veu gans bysow an myghtern. 13Lytherow a veu dannvenys dre leuv poenyoryon bys yn oll rannvroyow an myghtern, dhe dhistrui, ladha ha diswul oll an Yedhewon, ha yowynk ha hen, fleghes ha benynes, yn unn jydh, y'n trydhegves dydh a'n dewdhegves mis, yw an mis Adar, ha may fe aga fythow pyllys.

Lyther Haman yn Hanow an Myghtern

13a 3:13 Yn KJV gwersow 3:13a bys 3:13g yw niverys 13:1 bys 13:7.Ottomma dasskrif an lyther:

‘An myghtern meur Ahasuerus a skrif an taklow ma dhe bennsevigyon seyth rannvro ha hwegh-ugens dhiworth Eynda bys Ethiopia, ha dhe'n wovernours yw gorrys yn-danna.’

13b ‘Ha my devedhys ha bos rewlyas a-ugh lies kenedhel, ha dhymm mestrynses a-ugh oll an bys, heb bos ughelhes dre volder ow roweth, mes owth omdhegi pup-prys gans kuvder ha klorder, my a erviras settya ow sojets prest yn bewnans a gosoleth, ow kul ow gwlaskor onan a galmynsi hag igor dhe dremenyans hys-ha-hys, hag ow nowydhhe an kres may ma tus oll hwansek dhodho. 13c Lemmyn, ha my ow kovynn orth ow husulyoryon fatell via hemma kollenwys, Haman, mayth o bryntin y furneth yn agan mysk ha neb a dhiskwedhas bolonjedh da heb hedhi, gans lelder furv, ha kavoes an nessa le a enor y'n wlaskor, 13d ev a dherivas dhyn bos skattrys dre loethow oll an bys unn bobel ha dhedha atti, a's tevo laghys konter dhe genedhlow oll, ha neb a worra a-denewen heb hedhi gorhemmynnow myghternedh ma na yll kesrewl, ordenys yn wordhi genen, bos avonsys.’

13e ‘Owth aswonn ytho bos unnsel an genedhel ma settys heb worfenn erbynn tus oll, hag ow siwya yn aga bewnans laghys estren ha gans atti owth oberi dregynn erbynn agan negysyow, ma na vo surhes faster an wlaskor:’

13f ‘Yndella, gorhemmynna a wrussyn ni dhe'n re diskwedhys dhywgh dre skrif gans Haman, hag ev charjys gans an materow avel nessa tas dhyn, re bons i oll gans aga gwragedh ha'ga fleghes kowal distruys dre gledha aga eskerens, heb oll truedh na sparya, y'n peswardhegves dydh a'n dewdhegves mis Adar a'n vlydhen ma: 13g may fons i, an re spitus seuladhydh keffrys ha lemmyn, yn unn jydh konstrynys dre nerth dhe dhiyskynna dhe ifarn, hag yndella, bys vynnari, gul dh'agan materow bos fastys ha didroblys.’

14Y feu dasskrif a dekst an arghadow dhe vos dyllys yn pub rannvro dhe'n poblow oll, may fens i parys erbynn an jydh na. 15An boenyoryon eth dhe-ves toeth men herwydh gorhemmynn an myghtern, ha dyllys veu an arghadow yn Shushan an bennsita. An myghtern ha Haman a esedhas rag eva; mes penndegys o an sita Shushan.