Ester a Ervir Ri Gweres dhe'n Yedhewon

1Lemmyn pan wodhva Mordekay pup-tra a via gwrys, ev a skwardyas y dhillas ha gwiska yskar ha lusu, ha mos yn-mes dhe gres an sita, ow kria gans garm ughel ha hwerow. 2Mos a wrug bys y'n barth a-rag yet an myghtern, rag na ylli denvyth entra dhe yet an myghtern gwiskys yn yskar. 3Hag yn pub rannvro, pyle pynag may teffa gorhemmynn hag arghadow an myghtern, yth esa drem meur yn mysk an Yedhewon, gans penys hag oelva ha kynvann; yth esa lies huni a'ga growedh yn yskar ha lusu.

4Pan dheuth maghtethyon ha spadhesigyon Ester ha derivas dhedhi, grevys yn town veu an vyghternes; dannvon dillas rag kwetha Mordekay a wrug hi yn le y yskar, mes ny vynna ev aga degemmeres. 5Ena, Ester a elwis war Hatak, onan a spadhesigyon an myghtern, neb a'n apoyntyas dh'y servya, ha hi a erghis dhodho mayth ella dhe Mordekay rag dyski an pyth o hemma ha'n praga anodho. 6Ytho, yth eth Hatak yn-mes dhe Mordekay bys yn plen an sita a-rag yet an myghtern. 7Ha Mordekay a dherivas dhodho oll an pyth re hwarvia dhodho ha'n myns kewar a arghans hag a wrussa Haman ambosa y be yn tresorvaow an myghtern rag distrui an Yedhewon. 8Ynwedh, ev a ros dhodho dasskrif a dekst an arghadow a via res yn Shushan rag aga distrui, ma'n diskwettha ev dhe Ester, ha'y dherivas orti; ha charjya dhedhi mayth ella hi a-ji bys y'n myghtern, dhe gonjorya ha dhe wul pysadow orto rag hy fobel: ‘Porth kov a dhydhyow dha uvelder, pan feus'ta megys y'm leuv. Rag Haman, yw nessa dhe'n myghtern, re gewsis er agan pynn, dh'agan gorra dhe'n mernans; ytho ty gelow war an Arloedh ha kows orth an myghtern a-barth dhyn, ha'gan selwel dhiworth an mernans.’4:8 Yma an geryow yn italek kevys y'n tekst greka, a-der y'n tekst ebrow.

9Ytho Hatak eth ha derivas orth Ester geryow Mordekay. 10Ena Ester a gewsis orth Hatak, ha ri dhodho messaj rag Mordekay, 11‘Oll gwesyon an myghtern ha pobel rannvroyow an myghtern a woer bos unn lagha rag peub, po gour po benyn, seul a dheffo bys y'n myghtern y'n klos a-bervedh, heb bos gelwys: gorrys vydh dhe'n mernans, marnas ev mayth ystynno an myghtern an welenn owrek dhodho may fewo; mes ny veuv vy gelwys dhe dhos a-ji bys y'n myghtern nans yw deg dydh warn ugens.’ 12Hag i a dherivas orth Mordekay geryow Ester. 13Mordekay a leveris dhedha may taskorrens gorthyp dhe Ester, ‘Na dyb y'th enev ty dhe skapya yn chi an myghtern, moy ages oll an Yedhewon. 14Rag mar tewydh yn tien y'n eur ma, ha difresyans ha selwyans a dheu dhe'n Yedhewon dhiworth tyller arall, ty ha chi dha das a vydh distruys: ha piw a woer na vesta devedhys dhe'th savla ryel rag termyn a'n par ma?’ 15Ena Ester a leveris dhedha may taskorrens gorthyp dhe Mordekay, 16‘Ke, kuntell oll an Yedhewon usi yn Shushan, ha gwrewgh penys ragov, ha na wrewgh hwi dybri nag eva tri dydh, nosweyth na dydhweyth: my ynwedh, ha'm maghtethyon, penys a wren ni yn kepar maner. Ena mos a-ji bys y'n myghtern a wrav vy kyn fo erbynn an lagha: ha mar pydhav distruys, distruys vydhav.’ 17Ytho, yth eth Mordekay yn y fordh, ha gul war-lergh pup-tra re arghsa Ester dhodho.

Pysadow Mordekay

17a 4:17 Yn KJV gwersow 4:17a bys 4:17z yw niverys 13:8 bys 14:19.Ena Mordekay a bysis war an Arloedh, ow meneges oberow oll an Arloedh, ha leverel:

17b ‘A Arloedh, Arloedh an myghtern ollgalloesek:

may ma oll an bys yn-dann dha rewl,

ha dha vodh mar pydh sawya Ysrael,

nyns eus nebonan a yll dha gontradia.’

17c ‘Rag ty re wrug an nev ha'n nor,

hag oll an marthusyon usi yn-dann an nev;

ha ty yw an Arloedh a bup-tra:

nyns eus denvyth a yll sevel orthis, an Arloedh.’

17d ‘Ty a woer pup-tra;

ty a woer, A Arloedh,

na veu drefenn despit na drefenn goeth,

na drefenn neb hwans a wormola,

na vynnis vy omblegya a-rag an Haman goethus.

Rag lowen vien vy, a-barth selwyans Ysrael,

owth amma dhe wodhnow y dhewdroes.’

17e ‘Mes hemma, my a'n gwrug

ma na ve gwell gormola mab-den genev vy

a-ugh gormola Duw:

Omblegya my ny wrav a-rag denvyth

saw ty neb os ow Arloedh,

na hwath ny'n gwrav rag goeth.’

17f ‘Ha lemmyn, A Arloedh,

Duw ha myghtern, Duw Abraham,

salw dha bobel:

rag yma aga golok warnan ni

ma'gan drollons ni dhe derroes,

hag yma hwans dhedha a dhistrui an ertach

re beu dhiso a-dhia'n dalleth.

17g Na dhispres ty rann dha berghennogeth,

a wrussys hy dasprena yn-mes a bow Ejyp

a-barth dhis dha honan.

17h Klew ow fysadow,

ha bydh tregeredhus war-tu ha'th eretons:

ha treyl agan kyni dhe gevewya,

may fewyn ni, A Arloedh,

ha kana gormola dhe'th hanow;

ha na wra kisya ganow

an re a'th wormel, a Arloedh!’

17i Hag oll Ysrael a armas yn fen rag yth esa aga mernans a-rag aga dewlagas.

Pysadow Ester

17k Ha'n vyghternes Ester ynwedh, kepar pan ve kemmerys gans gloes ankow, a hwilas skovva y'n Arloedh. 2 Ha wosa settya dhe-ves hy gwisk gloryus, hi a wiskas dillasennow angoes ha kyni; hag yn le urasow an moyha bryntin, kudha hy fenn gans lusenn ha teyl a wrug, ha hi a uvelhas hy horf yn feur hag a gudhas oll plasow a degynnow hy lowender gans hy gols kolmek. Ha hi a bysis war an Arloedh, Duw Ysrael, ow leverel:

17l ‘Ow Arloedh, ty unnsel yw agan Myghtern:

Gweres dhymm ha my yn ahwer,

pan nag eus dhymm gwereser vyth saw ty:

rag yma ow thenkys yn ow dorn.’

17m ‘Klewes re wrug vy a'm yowynkneth yn-rag,

yn loeth ow theylu, y tewissys jy, A Arloedh,

Ysrael a-dhiworth oll an kenedhlow,

ha'gan tasow a-dhiworth oll aga hendasow

may fens i eretons heb worfenn;

ha ragdha y hwrussys pypynag a ambossys.’

17n ‘Mes lemmyn ni re beghas a-dheragos,

ha ty re'gan daskorras yn diwleuv agan eskerens,

drefenn ni dhe wordhya aga duwow:

A Arloedh, ty yw gwiryon.’

17o ‘Byttegyns dhedha nyns yw lowr agan bos

yn-dann wasonieth hwerow:

i re worras aga diwleuv yn diwleuv aga idolys

rag defendya an dra may hwrussys

gans dha anow jy y ordena,

dhe dhistrui dha eretons,

ha degea ganow an re a'th wormel,

ha difeudhi glori dha ji ha'th alter,

17p dhe igeri ganow an kenedhlow

rag gormola imajys euver

hag enora myghtern marwel bynitha.’

17q ‘Na hepkorr, A Arloedh, dha welenn

dhe daklow na's teves bosva,

ha na hwerthens orth agan koedh;

saw treyl aga thowl warnedha i,

ha gwra ensampel anodho

neb re dhallathas hemma er agan pynn.

17r Porth kov, A Arloedh;

omdhiskwa yn termyn agan galar.’

‘Ha dhymmo vy ro bolder,

A Vyghtern an duwow hag Arloedh galloes oll.

17s Ro dhymm kows freth y'm ganow a-rag an lew:

treyl y golonn may fo ynno kas

a'n den a omladh er agan pynn,

may fo diwedh anodho hag a'y geffrysysi ev.’

17t ‘Mes delirv ni dre dha leuv,

ha gweres dhymm ha my yn ahwer,

pan nag eus dhymm gwereser vyth saw ty, Arloedh.

17u Godhvos a bup-tra ty a'th eus,

ha ty a woer bos kas genev gormola an re dhrog,

ha kasadow dhymm gweli an re antrodreghys,

ha kettep estren.

17w Ty a woer an edhomm a'm beus:

y hasav tokyn ow gre ughel usi war ow fenn

y'n dydhyow mayth omdhiskwedhav.

Kasadow yw genev avel kweth goesva visyek

ha ny's gwiskav ha my yn privedh a'm honan.

17x Ha ny dhybris dha vaghteth orth moes Haman,

na hwath ny enoris vy kevewi an myghtern

na eva gwin offrynnow diwes.

17y Na hwath nyns esa dhe'th vaghteth

heudhder vyth bys y'n eur ma,

a-dhia'n jydh may feuv vy kyrghys omma,

saw dredhos jy, A Arloedh, Duw Abraham.

17z A Dhuw, neb yw galloesek a-ugh oll,

klew orth lev an re heb govenek,

ha delirv ni yn-mes a dhiwdhorn an re dhrog,

ha delirv vy dhiworth ow own vy.’