Ester a Omdhiskwedh yn Klos an Myghtern

1Lemmyn y'n tressa dydh, 5:1 Yn KJV gwersow 5:1 bys 5:2b yw niverys 15:1 bys 15:16.pan veu gorfennys hy fysi, ha gorrys dhe-ves hy goenyow-gordhya, Ester a wiskas hy dillas ryel; 1a ha dillasys avel myghternes ha wosa hi dhe elwel war an Duw ha'n Selwyas a wel pup-tra, hi a gemmeras gensi diw vaghteth, ow poesa war an eyl avel benyn ydhil, ha'y gila ow toen hy lostenn. 1b Rudhys o hi dre'y thekter perfydh, ha lowenek hy cher, karadow dell ve, mes yth o tynn hy holonn rag own; ha sevel a wrug y'n klos pervedhel a balys an myghtern a-dal hel an myghtern. Yth esa an myghtern esedhys war y se ryel y'n hel ryel a-dal porth an palys. Pan welas an myghtern Ester an vyghternes ow sevel y'n klos, hi a gavas gras yn y wolok; 1c Ha wosa hi dhe dremena der oll an darasow, hi a sevis a-dherag an myghtern esedhys war y se ryel, hag ev gwiskys yn oll y dhillas a veuredh, kudhys kowal gans owr ha gemmow drudh, browagh dh'y weles. 1d Ena ow trehevel y fas, rudhys gans glori, ev a viras orti gans sorr fell ha'n vyghternes a goedhas, omdreylys hy liw ha hi ow klamdera; ha poesa a wrug war benn an vaghteth esa ow mos a-rygdhi. 1e Mes Duw a dreylyas spyrys an myghtern dhe onan a glorder; ha tynn y loes, ev a lammas dhiworth y se ha'y hemmeres yn y dhiwvregh bys pan omwellhas hi hag ev a's chershyas gans geryow hebask, ow leverel dhedhi, 1f ‘Pyth eus genes, Ester? Dha vroder ov vy; gwellha dha jer: ny wre'ta merwel rag nyns yw an lagha ma marnas rag tus kemmyn. Deus nes!’ 2hag ev a ystynnas dhe Ester an dernwelenn owrek esa yn y dhorn. Ena Ester a dheuth nes ha tochya penn an dernwelenn. Ha drehevys an welenn owrek, ev a's settyas orth hy honna ha'y byrla 2a Hag yn-medh hi dhodho, ‘Dha weles a wrugavy, a arloedh, avel el Duw, hag yth esa anken yn ow holonn rag own a'th veuredh; rag ty, a arloedh, barthusek osta, ha leun a ras yth yw dha fisment.’ 2b Ha hi ow kewsel, koedha a wrug hi yn unn glamdera. Ena, yth esa fienasow dhe'n myghtern, ha'y honfortya a wrug oll y wesyon.

Kevewi Ester

3Yn-medh an myghtern dhedhi, ‘Pyth eus dhis, a vyghternes Ester? Pyth yw dha vynnas? Kyn fo hanter an wlaskor y fydh res dhis.’ 4Yn-medh Ester, ‘Mar pydh plegadow dhe'n myghtern, gwres an myghtern ha Haman dos an jydh ma dhe gevewi re bareusis vy ragdho.’ 5Ena yn-medh an myghtern, ‘Gwrewgh dhe Haman fistena rag gul war-lergh ger Ester.’ Ytho an myghtern ha Haman a dheuth dhe'n kevewi re bareussa Ester. 6Hag yn-medh an myghtern dhe Ester pan esens owth eva gwin, ‘Pyth yw dha bysadow? Grontys vydh dhis. Ha pyth yw dha worholedh? Kyn fo hanter an wlaskor kollenwys vydh.’ 7Ester a worthybis, hag yn-medh hi, ‘Ow fysadow ha'm gorholedh yw: 8Mar kevis vy gras yn golok an myghtern, ha mar pydh plegadow dhe'n myghtern grontya ow fysadow, ha kollenwel ow gorholedh, gwres an myghtern ha Haman dos dhe'n kevewi a wrav vy y bareusi ragdha, hag a-vorow my a wra herwydh ger an myghtern.’

Haman a Wra Krogbrenn rag Mordekay

9Haman eth yn-mes an jydh na, lowen ha heudhik y golonn. Mes Haman pan welas Mordekay yn yet an myghtern ha na sevis ev na krena a-ragdho, ev a veu leun a gonnar erbynn Mordekay. 10Byttegyns, omfronna a wrug Haman, ha dos tre; hag ev a dhannvonas ha kyrghes y gowetha ha'y wreg Zeresh. 11Ha Haman a dherivas orta glori y rychys, ha palster y vebyon, ha'n taklow oll may hwrussa an myghtern dh'y voghhe ha'y avonsya a-ugh an bennsevigyon ha gwesyon an myghtern. 12Hag yn-medh Haman, ‘Hwath pella, ny dhros Ester an vyghternes denvyth a-ji gans an myghtern dhe'n kevewi a bareusis hi marnas my; hag a-vorow ynwedh my yw gelwys dhedhi gans an myghtern. 13Mes oll hemma ny dal travyth dhymm, peskweyth may hwelav Mordekay an Yedhow owth esedha yn yet an myghtern.’ 14Ena yn-medh Zeresh y wreg hag oll y gowetha dhodho, ‘Pareusens gwydhenn hanter-kans kevelin5:14 hanter-kans kevelin: A-dro dhe 25 meter. hy ughelder, ha ternos vyttin kows orth an myghtern may fo Mordekay kregys warnedhi: ena ke a-ji yn heudh gans an myghtern dhe'n kevewi.’ An gusul ma a blesyas Haman, ha pareusi an wydhenn a wrug.