Arghadow an Myghtern a-barth an Yedhewon

1Y'n jydh na, myghtern Ahasuerus a ros chi Haman, eskar an Yedhewon, dhe Ester an vyghternes. Ha Mordekay a dheuth a-dherag an myghtern; rag Ester a dherivsa fatell veu ev neskar dhedhi. 2Ena an myghtern a dennas yn-mes y vysow-sel a gemmersa dhiworth Haman ha'y ri dhe Mordekay. Hag Ester a ros dhe Mordekay an charj war ji Haman.

3Ena Ester a gewsis arta a-dherag an myghtern, ha hi a goedhas a-rag y dreys hag oela, orth y bysi a dreylya dhe-ves droktowl Haman an Agagyas, a dowlsa erbynn an Yedhewon. 4Ena, an myghtern a ystynnas dhe Ester an welenn owrek. Ytho, Ester a omdhrehevis, ha sevel a-dherag an myghtern. 5Yn-medh hi, ‘Mar pleg dhe'n myghtern, ha mar kaffen vy gras a-dheragdho, ha mars yw a'n dra ewn a-ragdho, ha my plegadow yn y wolok, bedhes skrifys bos defendys dhe-ves an lytherow devisys gans Haman mab Hammedatha an Agagyas, a skrifas rag distrui an Yedhewon usi yn oll rannvroyow an myghtern: 6rag fatell allav vy perthi gweles an drog a dheu dhe'm pobel? Ha fatell allav vy pesya ha my ow mires war derroes ow herens?’

7Ena yn-medh myghtern Ahasuerus dhe Ester an vyghternes ha dhe Mordekay an Yedhow, ‘Otta, my re ros dhe Ester chi Haman, hag i re'n krogas war an wydhenn, drefenn ev dhe settya dalghenn war an Yedhewon. 8Ha hwi, skrifewgh ynwedh a-dro dhe'n Yedhewon, dell bleg dhywgh, yn hanow an myghtern, ha'y selya gans bysow an myghtern: rag skrif skrifys yn hanow an myghtern, ha selys gans bysow an myghtern, ny yll bos daskelwys.’

9Ena, gelwys veu skrifwesyon an myghtern y'n eur na, y'n tressa mis, yw an mis Sivan, y'n tressa dydh warn ugens anodho; ha skrifys veu herwydh pup-tra a wrug Mordekay y erghi dhe'n Yedhewon, ha dhe'n wahalyethow, ha governours ha pennsevigyon an rannvroyow esa a-dhiworth Eynda bys yn Ethiopia, seyth rannvro ha hwegh ugens, dhe bub rannvro herwydh hy skrif, ha dhe bub pobel herwydh hy thaves, ha dhe'n Yedhewon herwydh aga skrif ha herwydh aga thaves. 10Ha skrifa a wrug ev yn hanow an myghtern Ahasuerus, ha'y selya gans bysow an myghtern, ha dannvon lytherow a wrug dre leuv kannasow war geyn margh, marghogyon owth ehwias war vergh skav, dineythys gans an kasegi ryel. 11Dre hemma an myghtern a ros kummyas dhe'n Yedhewon esa yn pub sita, dhe omguntell war-barth ha gwitha aga bewnans, dhe dhistrui, ladha, ha diswul oll an nerth a bobel hag a rannvro, a vynnas aga assaltya, ha'ga fleghes ha'ga benynes; hag a bylla aga fythow avel preydh, 12yn unn jydh, yn oll rannvroyow myghtern Ahasuerus, y'n trydhegves dydh a'n dewdhegves mis, yw an mis Adar.

Arghadow a Wul Restorita dhe'n Yedhewon

12a 8:12 Yn KJV gwersow 8:12a bys 8:12x yw niverys 16:1 bys 16:24. Yth yw hemma, par dell siw, dasskrif a lyther an arghadow:

12b ‘An myghtern meur, Ahasuerus, dhe wahalyethow an seyth rannvro ha hwegh-ugens a-dhiworth Eynda bys yn Ethiopia, ha dhe'n re yw lel dhyn ni, salusyans.’

12c ‘Lies huni, dhe voy menowgh yth yns i enorys gans kuvder aga masoberoryon, dhe voy yth yns i goethus. Ny assayons hepken dhe bystiga agan sojets mes kekeffrys i a assay dhe vrasa erbynn aga masoberoryon, rag ny yllons perthi bern aga hevoeth. 12d Ha ny gemmerons dhe-ves grasyans hepken dhiworth tus, mes ynwedh, dynys gans bostow tus yw estrenyon dhe bup-tra mas, tybi a wrons i dhe dhiank a vreus Duw, neb a gas drogober, ha prest a wel pup-tra. 12e Ha lieskweyth, meur a'n re neb yw settys yn soedhow renk re beu gwrys yn rann dhe vlamya rag skoellya goes gwiryon, hag i re beu maglennys yn droglammow na yllir aga ewnhe, dre gows teg kowetha re beu charjys gans menystrans materow poblek, 12f pan dhyn an dus ma, dre gammfydhweyth, an gwir volonjedh da a'ga rewloryon. 12g Lemmyn, y hyllir gweles hemma, na kemmys dhiworth derivadow kovskrifow kottha, mes dell eus yn agas kyrghynn pan hwithrowgh pana daklow re beu kollenwys yn tebel dre vilta tus ha dhedha soedhow mayth yns anwiw. 12h Hag y'n termyn a dheu ni a wayt gwitha agan gwlaskor yn kres didroblys rag tus oll, 12i ow tegemmeres chanjyow, hag ow preusi pup-prys an kasys a dheffo a-rag agan golok gans dyghtyans klorra.’

12k ‘Rag Haman mab Hammedatha, Makedonek, (yn hwir estren dhe woes an Persianys, ha neb a omsyns a-bell dhiworth agan kuvder), war-lergh ev dhe vos agan gwester, 12l a'n jevo plesour a'n bolonjedh da eus genen a-barth pub kenedhel, kemmys mayth o ev henwys agan tas prest avel nessa person dhe'n se ryel may hwre pubonan omblegya a-dheragdho. 12m Mes gorlenwys a woeth, ev a assayas dhe gemmeres dhiworthyn agan mestrynses ha'gan bewnans; 12n ha gans gweyth fel ha gwius, ev a hwilas orthyn an gollva a Mordekay, agan selwyas ha prest agan masoberer, hag a Ester, kevrennores dhivlam a'n myghternsys, keffrys ha'ga fobel dhien. 12o Rag ev a brederi y'n fordhow ma y hwrussa agan sowdhanas diwith ha treusperthi mestrynses an Persianys dhe'n Makedonianys.’

12p ‘Mes orth agan brys, an Yedhewon neb re beu dampnys dhe gollva gans an adla triflek ma, nyns yns i drogoberoryon, mes y fewons herwydh laghys a'n moyha gwiryon, 12q ha'ga bos mebyon an Duw bew, an ughella ha'n galloesekka, neb re lewyas an wlaskor ragon ni, keffrys ha rag agan hendasow, yn studh a'n bryntinna.’

12r ‘Hwi a wra yn ta ow skonya a obaya an lytherow dannvenys gans Haman mab Hammedatha, drefenn ev dhe vos neb re wrug an taklow ma, kregys gans oll y deylu ryb yetys Shushan, rag Duw, an rewler war bup-tra, dhe dyli yn uskis dhodho an gober gwiw. 12s Ytho, ha hwi ow tyllo yn efan dasskrif an lyther ma yn pub plas, rewgh kummyas dhe'n Yedhewon may tevnytthyons aga gisyow laghel aga honan, ha rewgh krevder dhedha mayth omdhifressons, y'n trydhegves dydh a'n dewdhegves mis Adar, poran y'n jydh na, erbynn an re a omsettyens warnedha yn termyn galar. 12t Rag yn le kollva an bobel dhewisys, Duw, neb a rewl pup-tra, re wrug an jydh ma heudhder ragdha. 12u Ha rakhenna hwi a'n with yn mysk agas dy'goelyow a govheans avel dydh arbennik pan vo fest da agas cher, hag y'n eur ma hag alemma rag, may fo selwyans ragon ni ha rag an Persianys lel, mes may fo kovadh a gollva rag an re neb a vras er agan pynn.’

12x ‘Pub sita ha pub pow heb namm na wrello yndella, a vydh distruys gans konnar dre wuw ha tan: ny vydh gwrys difeyth hepken ma na allo tus y dremena mes ynwedh may fo ev kasadow dhe viles ha dhe ydhyn, bys vykken.’

13Res veu dasskrif a'n tekst, dhe vos dyllys yn arghadow yn pub rannvro dhe'n poblow oll, ha may fe an Yedhewon parys erbynn an jydh na dhe omdhialla a'ga eskerens. 14An kannasow, marghogyon war vergh skav, askorr ryel, a ehwias yn-mes toeth da, ynniys gans gorhemmynn an myghtern. An arghadow a veu dyllys yn Shushan an bennsita. 15Ena Mordekay eth yn-mes dhiworth golok an myghtern, yn gwisk ryel, glas ha gwynn y liw, ha dhodho kurun vras a owr ha goen a lien fin ha purpur: ha'n sita Shushan a arma hag a lowenhi. 16Dhe'n Yedhewon yth esa golow ha heudhder, ha lowender hag enor, 17hag yn pub rannvro, hag yn pub sita, plepynag y teffa gorhemmynn an myghtern ha'y arghadow, dhe'n Yedhewon yth esa heudhder ha lowender, kevewi ha dydh da. Ha lies huni dhiworth poblow an tir eth ha bos Yedhewon rag own a'n Yedhewon.