Eskerens an Yedhewon Distruys

1Lemmyn y'n dewdhegves mis, yw an mis Adar, y'n trydhegves dydh anodho, pan veu gorhemmynn an myghtern ha'y arghadow dhe vos kollenwys, y'n jydh may hwaytsa eskerens an Yedhewon aga gorra yn-dann rewl, y hwarva an konter, may hwrug an Yedhewon gorra yn-dann rewl an re a's kasa i; 2an Yedhewon a omguntellas war-barth yn aga sitys der oll rannvroyow myghtern Ahasuerus, rag settya dalghenn y'n re a hwilsa aga fystiga: ha ny ylli denvyth sevel orta; rag koedhys veu own anedha war oll an poblow. 3Hag oll pennsevigyon an rannvroyow, ha'n wahalyethow, ha'n wovernours, ha menystoryon an myghtern, a weresas an Yedhewon; rag bos koedhys warnedha own a Mordekay. 4Rag bras yn chi an myghtern o Mordekay, hag yth esa y er-da ow mos der oll an rannvroyow: ha meuredh an gour Mordekay a devi moy ha moy.

5Ha gweskel oll aga eskerens a wrug an Yedhewon dre strokosow an kledha, ow ladha hag ow tistrui, hag i a wrug pynag ve da gansa orth an re a's kasa. 6Hag yn Shushan an bennsita an Yedhewon a ladhas hag a dhistruis pymp kans den. 7Ynwedh i a ladhas Parshandatha, ha Dalfon, hag Aspatha, 8ha Poratha, hag Adalia, hag Aridatha, 9ha Parmashta, hag Arisay, hag Ariday, ha Vayzatha, 10an deg mab a Haman mab Hammedatha, eskar an Yedhewon. Mes war an preydh ny settsons aga leuv.

11Y'n jydh na, niver an re ledhys yn Shushan an bennsita a veu derivys dhe'n myghtern. 12Hag yn-medh an myghtern dhe Ester an vyghternes, ‘An Yedhewon re ladhas ha distrui pymp kans gour yn Shushan an bennsita, ha'n deg mab a Haman; pandr'a wrussons i ytho yn ken rannvroyow an myghtern! Pyth ytho yw dha bysadow? Grontys vydh dhis. Pyth yw dha worholedh pella? Kollenwys vydh.’

13Ena yn-medh Ester, ‘Mar pleg dhe'n myghtern, bedhes grontys dhe'n Yedhewon usi yn Shushan may hwrellons a-vorow keffrys herwydh arghadow an jydh ma, ha bedhes an deg mab a Haman kregys war an wydhenn.’

14Ytho an myghtern a erghis gul yndella; arghadow a veu res yn Shushan, hag i a grogas an deg mab a Haman. 15An Yedhewon esa yn Shushan a omguntellas war-barth yn peswardhegves dydh an mis Adar, ha ladha tri hans gour yn Shushan; mes war an preydh ny settsons aga leuv.

16Ha'n Yedhewon erell esa yn rannvroyow an myghtern a omguntellas war-barth rag omdhefendya, ha powes i a's teva dhiworth aga eskerens, ha ladha an re a's kasa, pymthek ha tri-ugens mil; mes war an preydh ny settsons aga leuv. 17Yn trydhegves dydh an mis Adar veu hemma; hag yn y beswardhegves dydh i a bowesas ha gul anodho dydh a gevewya hag a heudhder.

Dy'goel Purim Fondys

18Mes an Yedhewon esa yn Shushan a omguntellas war-barth yn y drydhegves dydh, hag yn y beswardhegves; hag ena y'n pymthegves dydh anodho i a bowesas, ha gul anodho dydh a gevewya hag a heudhder.

19Rakhenna, Yedhewon an godrevi, usi trigys y'n trevow heb fosow, a syns peswardhegves dydh an mis Adar avel dydh a heudhder hag a gevewya, ha dydh da, hag a dhannvon rohow a voes an eyl dh'y gila.

20Mordekay a skrifas an taklow ma, ha dannvon lytherow dhe oll an Yedhewon esa yn oll rannvroyow myghtern Ahasuerus, ogas ha pell, 21rag charjya dhedha may synsens peswardhegves dydh an mis Adar, ha'n pymthegves dydh anodho pub blydhen, 22avel an dydhyow may feu dhe'n Yedhewon powes dhiworth aga eskerens, ha'n mis hag a veu treylys ragdha dhiworth ahwer dhe heudhder, ha dhiworth kynvann dhe dhydh da: ma's gwrellens dydhyow a gevewya hag a heudhder, hag a dhannvon rohow a voes an eyl dh'y gila, hag a dhannvon rohow dhe'n voghosogyon.

23Ytho an Yedhewon a omgemmeras gul par dell dhallathsens, ha par dell skrifsa Mordekay dhedha. 24Re wrussa Haman mab Hammedatha an Agagyas, eskar an Yedhewon oll, brasa erbynn an Yedhewon rag aga distrui, ha dhe dewlel Pur, henn yw an prenn, rag aga hisya, ha'ga distrui; 25mes pan veu hi devedhys a-rag an myghtern, ev a erghis dre lytherow may tehwella y dhroktowl a dowlsa erbynn an Yedhewon war y benn y honan, ha bos ev ha'y vebyon kregys war an wydhenn. 26Hemm yw prag yth yw gelwys an dydhyow ma Purim dhiworth an hanow Pur. Yndella, drefenn oll geryow an lyther ma ha drefenn oll a welsens a-dro dhe'n mater ma, ha'n pyth a dhothya bys dhedha, 27an Yedhewon a jarjyas hag omgemmeres a-barth dhedha i aga honan, hag a-barth aga has, hag oll an re a ve junys orta, i dhe woelya heb fyllel an dhew dhydh ma herwydh an skrif anedha, ha herwydh an eur ordenys ragdha, pub blydhen, 28ha'n dydhyow ma dhe vos goelys dre bub henedh, pub teylu, pub rannvro, ha pub sita; ha na goettha an dydhyow ma a Purim yn mysk an Yedhewon, ha na ve kellys aga hov yn mysk aga has.

29Ena Ester an vyghternes, myrgh Abihayl, ha Mordekay an Yedhow, a skrifas gans awtorita leun owth afydhya an nessa lyther ma a-dro dhe Purim. 30Ev a dhannvonas lytherow dhe oll an Yedhewon, dhe'n seyth rannvro ha hwegh ugens a wlaskor Ahasuerus, gans geryow a gres hag a wiryonedh 31rag fastya an dydhyow ma a Purim yn aga thermynyow ordenys, dell y's afydhsa Mordekay an Yedhow, hag Ester an vyghternes, ha dell y's afydhsens ragdha i aga honan ha rag aga has, materow ow tochya aga frysyow penys ha'ga hynvann. 32Ha gorhemmynn Ester a fastyas an materow ma a Purim; ha skrifys veu y'n lyver.