Hunros Mordekay

1a 1:0 An rannow usi y'n Septuagint mes nag usi y'n tekst masoretek yw pryntys yn prynt italek. Niverow an gwersow y'n rannow ma a siw niveryans gwersow dyllans Rahlfs a'n Septuagint. Ny wra ev devnydh a'n lytherennow j ha v. Yn KJV gwersow 1:1a bys 1:1r yw niverys 11:2 bys 12:6.Y'n nessa blydhen a reyn Ahasuerus Veur, yn kynsa dydh Nisan, Mordekay mab Yair mab Shimei mab Kish, a loeth Benyamin, 1b Yedhow trigys yn Shushan an bennsita, den meur, ow servya yn klos an myghtern, a welas hunros. 1c Yth esa ev onan a'n gethyon degys gans Nebukadnessar myghtern Babylon dhiworth Yerusalem war-barth gans Yekonia myghtern Yudi.

1d Ha hemma a veu y hunros: Otta garmow ha tros, taran ha dorgrys, ha tervans war an norvys: 1e hag otta, diw dhragon veur a omdhiskwedhas, parys aga diw dhe omladh, ha meur aga garm. 1f Hag orth aga garm, yth o kenedhlow oll parys dhe vatalyas, mayth omlatthens erbynn an genedhel wiryon. 1g Hag otta, dydh tewlder ha tewolgow, poesyjyon hag angoes, galar ha tervans meur war an norvys.

1h Ha poenvosek o oll an genedhel wiryon ha dhedha own a'ga galarow aga honan, ha parys dhe verwel ens i. Ena, kria war Dhuw a wrussons, 1i hag orth aga kri, kepar ha pan ve dhiworth fenten vyghan, y teuth avon veur, dowrow pals. 1k Sevel a wrug an golow ha'n howl, ha'n re uvel a veu ughelhes, hag i a dhevoryas an re enorys. 1l Lemmyn, pan dhifunas Mordekay, neb a welsa an hunros na ha'n pyth a ervirsa Duw y wul, ev a'n gwitha yn y vrys ha dhodho hwans dres eghenn a'y dhysmygi, bys y'n nos. 1m Ha Mordekay a bowesas y'n chi ryel gans Bigthan ha Teresh, dew spadhesik an myghtern, o gwithysi an klos. 1n Hag ev a glewas a'ga heskusulyansow hag a hwilas aga ententys, ha dyski a wrug i dhe vos war boynt settya dalghenn yn myghtern Ahasuerus, hag ev a ros derivas dhe'n myghtern anedha. 1o Ena an myghtern a apposyas an dhew spadhesik, ha wosa i dh'y avowa, gorrys vons dhe'n mernans. 1p An myghtern a skrifas an taklow ma avel kovadh, ha Mordekay a skrifas a-dro dhedha. 1q Ytho an myghtern a erghis dhe Mordekay may serffya y'n chi, ha rakhemma ev a'n gobras gans rohow. 1r Mes Haman mab Hammedatha an Agagek, meur y enor gans an myghtern, a hwilas pystiga Mordekay ha'y bobel, drefenn dew spadhesik an myghtern.

Kevewi Myghtern Ahasuerus

1Lemmyn yn dydhyow Ahasuerus,1:1 Ahasuerus: Henn yw Xerxes I. Greka Artaxerxes. (hemm yw Ahasuerus esa ow reynya a-dhiworth Eynda bys yn Ethiopia, war seyth rannvro ha hwegh ugens): 2y'n dydhyow na, pan o an myghtern Ahasuerus esedhys war se y wlaskor, esa yn Shushan an bennsita, 3yn tressa blydhen y reyn, ev a wrug kevewi rag y bennsevigyon ha'y wesyon oll; hag yth esa a-ragdho nerth Persia ha Media, ugheloryon ha gwahalyethow an rannvroyow. 4Ev a dhiskwedhas rychys y wlaskor gloryus hag enor y veuredh bryntin lies dydh, kans dydh ha peswar-ugens.

5Pan veu an dydhyow ma kollenwys, an myghtern a wrug kevewi rag oll an bobel a omgevi yn Shushan an bennsita, byghan ha bras, seyth dydh, yn klos lowarth palys an myghtern. 6Yth esa kroglennow a goton wynn ha pann glasrudh, kelmys gans kerdyn a lien fin ha purpur orth kylghyow a arghans ha kolovenyow a varbel. Yth esa growedhvaow a owr hag arghans war leur a veyn gwyrdh,1:6 veyn gwyrdh: Martesen malaghit. marbel, askell ha meyn glaswyrdh. 7Hag y feu res dhedha diwes yn lestri owr (ha'n lestri dihaval an eyl dh'y gila), ha palster a win ryel herwydh helder an myghtern. 8Ha lagha an eva o, na ve denvyth konstrynys; rag yndella yth arghsa an myghtern dhe oll soedhogyon y ji, may hwrella peub herwydh y vodh. 9Keffrys, Vashti an vyghternes a wrug kevewi rag an benynes y'n chi ryel esa dhe'n myghtern Ahasuerus.

10An seythves dydh, ha kolonn an myghtern heudh gans gwin, erghi a wrug ev dhe Mehuman, Biztha, Harbona, Bigtha, hag Abagtha, Zethar, ha Karkas, an seyth spadhesik a venystra yn golok myghtern Ahasuerus, 11may kyrghens Vashti an vyghternes a-rag an myghtern gans tulyfant ryel, rag diskwedhes hy thekter dhe'n poblow ha dhe'n bennsevigyon; rag y feu hy semlans da dh'y weles. 12Mes skonya a wrug an vyghternes Vashti a dhos orth gorhemmynn an myghtern der an spadhesigyon; hag yndella, pur serrys o an myghtern ha'y gonnar a loskas ynno.

Myghternes Vashti Gordhyllys a'y Soedh

13Ena an myghtern a hwilas kusul a'n dus fur a aswonni an termynyow (rag yndella yth o maner an myghtern war-tu oll a aswonni lagha ha breus; 14hag yth esa yn y ogas Karshena, Shethar, Admatha, Tarshish, Meres, Marsena, ha Memukan, an seyth pennsevik a Persia ha Media, a weli fas an myghtern, hag o esedhys yn kynsa renk an wlaskor): 15‘Herwydh an lagha, pandr'a wren ni dhe'n vyghternes Vashti rag na gollenwis hi an pyth re arghsa an myghtern Ahasuerus dhedhi der an spadhesigyon?’ 16Ha Memukan a worthybis a-rag an myghtern ha'n bennsevigyon, ‘Ny wrug Vashti an vyghternes kamm dhe'n myghtern hepken, mes ynwedh dhe oll an bennsevigyon, ha dhe oll an poblow usi yn oll rannvroyow an myghtern Ahasuerus. 17Rag y fydh an gweythres ma a'n vyghternes dyllys bys yn benynes oll, ha gul dh'aga gwer bos fiys yn aga dewlagas pan leverons, “Yth erghis an myghtern Ahasuerus may fe Vashti an vyghternes kyrghys a-dheragdho, mes ny dheuth hi”. 18Ha'n keth jydh ma, pennsevigesow Persia ha Media, neb re glewas a fara an vyghternes, a venek hemma erbynn oll pennsevigyon an myghtern. Ytho, y fydh kals a vismer hag a gonnar. 19Mara pleg dhe'n myghtern, des gorhemmynn ryel a-dhiworto, ha bedhes skrifys yn mysk laghys Persia ha Media na yll bos daskelwys, na dheffo Vashti namoy a-dherag myghtern Ahasuerus; ha res an myghtern hy studh ryel dhe nebonan a vo gwell agessi hi. 20Ytho, arghadow an myghtern hag a wra ev, pan vo dyllys dres oll y wlaskor, (rag meur yth yw), oll an gwragedh a re enor dh'aga gwer, ha dhe'n byghan ha dhe'n bras.’

21An lavar o plegadow dhe'n myghtern ha'n bennsevigyon; ha'n myghtern a wrug war-lergh ger Memukan. 22Ev a dhannvonas lytherow bys yn oll rannvroyow an myghtern, bys yn pub rannvro herwydh skrif an tyller na, ha dhe bub pobel oll herwydh aga yeth, may pe pub gour mester yn y ji y honan.