Geryow Amos

1Geryow Amos, neb esa yn mysk bugeledh Tekoa, a welas yn gwelesigeth a-dro dhe Ysrael yn dydhyow Uzzia myghtern Yuda hag yn dydhyow Yeroboam mab Yoash, myghtern Ysrael, diw vlydhen kyns an dorgrys.

Breus Duw erbynn an Kenedhlow

2Hag y leveris:

An Arloedh a us dhiworth Sion

ha dhiworth Yerusalem ev a re y lev;

peurvaow an vugeledh a dhesygh,

ha gwedhrys yw gwartha menydh Karmel.

3Yndellma y lever an Arloedh:

Rag tri hammweythres a Damaskus,

ha rag peswar, ny wrav vy hepkorr an kessydhyans;

drefenn i dhe dhrushya Gilead

gans draylellow-drushya a horn.

4Ytho my a dhannvon tan war ji Hazael,

dhe dhevorya palesyow Ben-hadad;

5dralya a wrav barr Damaskus,

ha terri an annedhyas dhiworth nans Aven,

ha'n den a syns an welenn dhiworth Beth-eden;

divres vydh pobel Aram bys yn Kir,

yn-medh an Arloedh.

6Yndellma y lever an Arloedh:

Rag tri hammweythres a Gaza,

ha rag peswar, ny wrav vy hepkorr an kessydhyans;

drefenn i dhe dhoen pobel gowal yn divroedh

orth aga delivra dhe Edom.

7Ytho my a dhannvon tan war fos Gaza,

dhe dhevorya hy falesyow.

8Terri a wrav an annedhyas dhiworth Ashdod,

ha'n den a syns an welenn dhiworth Ashkelon,

ha my a dreyl ow dorn erbynn Ekron;

ha remenant an Filistysi a dhe goll,

yn-medh an Arloedh Duw.

9Yndellma y lever an Arloedh:

Rag tri hammweythres a Tyr,

ha rag peswar, ny wrav vy hepkorr an kessydhyans;

drefenn i dhe dhelivra pobel gowal dhe Edom,

ha ny borthsons kov a'n kevambos a vrederedh.

10Ytho my a dhannvon tan war fos Tyr

dhe dhevorya hy falesyow.

11Yndellma y lever an Arloedh:

Rag tri hammweythres a Edom,

ha rag peswar, ny wrav vy hepkorr an kessydhyans;

drefenn ev dhe helghi y vroder gans kledha,

ha taga y druedh;

ha'y sorr a skwardyas bynitha,

hag ev a withas y gonnar bys vykken.

12Ytho my a dhannvon tan war Teman,

dhe dhevorya palesyow Bosra.

13Yndellma y lever an Arloedh:

Rag tri hammweythres a vebyon Ammon,

ha rag peswar, ny wrav vy hepkorr an kessydhyans;

drefenn i dhe skwardya gwragedh gans flogh yn Gilead,

mayth efannens aga amal.

14Ytho my a worr tan yn fos Rabba,

dhe dhevorya hy falesyow

gans garm yn dydh an gas,

gans annawel yn dydh an korwyns;

15ha mos a wra aga myghtern dhe dhivroedh,

ev ha'y bennternedh war-barth,

yn-medh an Arloedh.