1Yndellma y lever an Arloedh:

Rag tri hammweythres a Moab,

ha rag peswar, ny wrav vy hepkorr an kessydhyans;

drefenn ev dhe leski dhe lim

eskern myghtern Edom.

2Ytho my a dhannvon tan war Moab

dhe dhevorya palesyow Kerioth;

ha Moab a verow yn mysk tervans,

yn mysk garm ha son an korn;

3ha my a dregh an breusyas yn-mes a-dhiworti,

ha ladha oll hy fennsevigyon ganso,

yn-medh an Arloedh.

4Yndellma y lever an Arloedh:

Rag tri hammweythres a Yuda,

ha rag peswar, ny wrav vy hepkorr an kessydhyans;

drefenn i dhe skonya lagha an Arloedh,

ha ny withsons y ordenansow,

mes aga fals dhuwow re wrug dhedha sowdhanas,

may kerdhas aga thasow war aga lergh.

5Ytho my a dhannvon tan war Yuda,

dhe dhevorya palesyow Yerusalem.

Breus Duw erbynn Ysrael

6Yndellma y lever an Arloedh:

Rag tri hammweythres a Ysrael,

ha rag peswar, ny wrav vy hepkorr an kessydhyans;

drefenn i dhe wertha an den gwiryon a arghans,

ha'n edhommek a dhiw eskis.

7I a drett yn-dann dreys2:7 I a drett yn-dann dreys: Ow siwya an Septuagint. Ebrow i a dhyen war-lergh. penn an voghosogyon yn doust dor;

ha treylya a-denewen fordh an dus uvel;

den ha'y das a y'n keth vowes

rag may fo disakrys ow hanow sans.

8War dhillas kemmerys yn goestel i a wrowedh

ryb pub alter;

ha gwin a'n re neb re beu spalys a evons

yn chi aga Duw.

9Byttegyns my a dhistruis an Amoryas a-dheragdha

may feu y ughelder kepar hag ughelder an kederwydh,

hag ev maga krev avel derow;

distrui a wrug vy y frut a-vann

ha'y wreydh a-woeles.

10Ha my a'gas dros yn-mes a bow Ejyp,

ha'gas hembronk dew-ugens blydhen y'n difeyth

rag perghenna bro an Amorysi;

11ha my a dhrehevis rann a'gas mebyon yn profoesi

ha rann a'gas tus yowynk yn nazirysi.

A nyns yw yndella, A vebyon Ysrael?

yn-medh an Arloedh.

12Mes hwi a wrug dhe'n nazirysi eva gwin,

ha gorhemmynna a wrussowgh dhe'n brofoesi,

ow leverel, ‘Na brofoesewgh!’

13Otta, my a'gas gwask y'n dor,

kepar dell yw gweskys y'n dor kert gorveghys gans vanalow.2:13 Styr an Ebrow yw ankler.

14Ny vydh tyller dhe fia dhodho rag an den skav,

ha'n den krev ny with y nerth,

na ny yll an kasor omsawya.

15Ny sev an den a syns an warak,

na ny skap an den skav y dreys,

na ny yll an marghek omsawya.

16Ha'n moyha kolonnek yn mysk an gasoryon

a fi noeth y'n jydh na,

yn-medh an Arloedh.