Galargan war Ysrael

1Klewewgh an ger ma a dhrehavav er agas pynn, galargan, A ji Ysrael:

2Koedhys yw, ny sev arta,

an wyrghes Ysrael;

forsakys war hy thir,

heb denvyth dh'y dassevel.

3Rag yndellma y lever an Arloedh Duw:

An sita mayth eth yn-mes anedhi mil

a's tevydh kans gesys,

ha'n sita mayth eth yn-mes anedhi kans,

a's tevydh deg gesys dhe ji Ysrael.

4Rag yndellma y lever an Arloedh dhe ji Ysrael:

Hwilewgh vy ha bewa,

5mes na hwilewgh Bethel,

ha na gewgh dhe Gilgal

na treusi dhe Beer-sheba;

rag mos a wra Gilgal yn divroedh

ha Bethel ny vydh 'vas dhe dravyth.

6Hwilewgh an Arloedh ha bewa,

ma na tartho avel tan yn chi Yosep,

dh'y dhevorya, heb denvyth dh'y dhifeudhi yn Bethel.

7A hwi neb a dreyl gwirvreus yn fuelenn,

ha tewlel ewnder dhe'n dor!

8Ev neb a wrug an Pleyades hag Orion

ha treylya tewlder down yn myttin,

ha tewlhe an jydh yn nos;

neb a elow war dhowrow an mor,

ha'ga diveri war enep an dor:

an Arloedh yw y hanow

9neb a wra dhe derroes tardha erbynn an dus krev,

ha terroes a dheu dhe'n kastell.

10Kasa a wrons an den a geredh y'n yet,

hag aborrya an den a gews an gwirder kowal.

11Rakhenna, drefenn hwi dhe stankya war an boghosek

ha kemmeres dhiworto trubyt a ys,

kyn trehevsowgh chiow a ven treghys,

ny wrewgh triga ynna;

hwi re blansas gwinlannow teg,

mes ny evowgh aga gwin.

12Rag my a woer agas kammweythresow pals,

ha'gas peghosow bras,

owth arvedh an den gwiryon, ow kemmeres falswober,

hag ow treylya a-denewen an edhommogyon y'n yet.

13Rakhenna, tewel a wra an den fur yn termyn a'n par na;

rag droktermyn yw.

14Hwilewgh dader, a-der droktra,

may fewewgh;

ena Arloedh an luyow a vydh genowgh,

poran kepar dell leversowgh.

15Kesewgh droktra, ha kerewgh dader,

ha fastyewgh gwirvreus y'n yet;

martesen an Arloedh, Duw an luyow,

a gemmer truedh a remenant Yosep.

16Rakhenna yndellma y lever an Arloedh, Duw an luyow, an Arloedh:

Yn plenys oll y fydh oelva,

hag y'n stretys oll i a lever ‘Ellas, ellas!’

Gelwel a wrons an tiek dhe gynvann,

ha dhe oelva an re a woer kyni.

17Hag y'n gwinlannow oll y fydh oelva

rag my dhe dremena der an kres ahanowgh,

yn-medh an Arloedh.

Dydh an Arloedh

18Go-i an re yw hwansek dhe dhydh an Arloedh!

Pandr'a vydh dydh an Arloedh dhy'hwi?

Tewlder vydh, ny vydh golow;

19kepar ha pan fia gour dhiworth lew,

hag ors ow tos er y bynn;

po mos yn chi ha poesa erbynn an paros gans y dhorn

ha bos brethys gans sarf.

20A nyns yw dydh an Arloedh tewlder a-der golow,

ha tewlder heb gwynnder vyth ynno?

21Kasa ha dispresya agas goelyow a wrav,

ha ny garav sawer agas kuntellesow solem.

22Ha kyn offrynnowgh dhymm agas offrynnow kowlleskys ha'gas offrynnow greun,

ny vynnav aga degemmeres;

hag offrynnow kres a'gas bestes peskys,

ny wrav vy mires warnedha.

23Kemmerewgh dhiworthiv an tros a'th kanow;

orth ton dha delynnow ny woslowav.

24Re wrello ewnder frosa yn-nans avel dowrow,

ha gwiryonedh kepar hag avon prest ow resek.

25A dhresowgh dhymm sakrifisow hag offrynnow dew-ugens blydhen y'n difeyth, A ji Ysrael? 26Doen a wrussowgh agas imajys, Sakkuth agas myghtern, ha Kaywan agas duw-sterenn, hag a wrussowgh dh'agas honan. 27Ytho my agas deg yn divroedh dres Damaskus, yn-medh an Arloedh, Duw an luyow y hanow.