Terroes Ysrael

1Go-i an re usi attes yn Sion,

ha'n re a omsyns saw war venydh Samaria,

yw henwys kynsa an gwlasow,

ha dhedha y teu chi Ysrael!

2Tremenewgh dhe Kalne, ha gwelewgh,

hag alena kewgh dhe Hamath veur,

hag ena diyskynnewgh dhe Gath an Filistysi.

Yns i gwell ages an gwlaskordhow ma?

Po yw aga thiredh brassa ages agas tiredh hwi?

3A hwi a vynn delatya an drog dhydh, mes

hwi a dhre ogas an esedhva a arowder!

4An re usi a'ga growedh war weliow a dhans olifans

hag owth omystynna yn lows war aga gweliow-dydh;

ow tybri hordhes yowynk dhiworth an flokk,

ha leughi yn-mes a'n stall;

5neb a gan orth son an delynn,

hag avel Davydh ow tevisya dhedha daffar menestrouthi.

6I a yv gwin yn bollow

owth omuntya gans oylys a'n finna,

mes nyns yns i duwenhes drefenn terroes Yosep!

7Ytho lemmyn i a vydh an kynsa ow mos yn divroedh,

ha kevewi an re a omystynn yn lows a hedh.

8An Arloedh Duw re dos ren y enev y honan

(yn-medh an Arloedh, Duw an luyow):

Kas genev yw goeth Yakob,

ha kas genev yw y balesyow;

ha my a dhaskorr an sita ha pup-tra eus ynni.

9Mar pydh gesys deg den yn unn chi, i a verow. 10An ewnter a dhen, ev neb wra y leski, a'n drehav, dhe dhri an eskern yn-mes a'n chi, hag ev a lever dhe nebonan a-bervedh y'n chi, ‘Eus nebonan hwath genes?’ Ev a worthyp, ‘Nag eus’, hag ena ev a lever, ‘Taw! Res yw na vo menegys hanow an Arloedh.’

11Rag otta, an Arloedh a worhemmynn,

hag ev a wysk an chi bras yn magoryow,

ha'n chi byghan a vydh terrys dhe demmyn.

12A wra mergh poenya war garnek?

A wra den aras ena gans oghen?

Mes hwi re dreylyas ewnder yn kegis,

ha'n frut a wiryonedh yn fuelenn.

13Hwi a lowenha yn Lo-debar,

ow leverel, ‘A ny wrussyn gans agan nerth agan honan

kemmeres ragon Karnaym?’

14Rag otta, my a dhrehav kenedhel er agas pynn,

A ji Ysrael, yn-medh an Arloedh, Duw an luyow;

ha hi a wra agas gwaska a-dhiworth Lebo-hamath

bys yn syghnans Araba.