Gwelesigeth a Lokustes

1An Arloedh Duw a dhiskwedhas hemma dhymm, hag otta, yth esa ev ow formya hes a lokustes pan dhallethi an aswels tevi – an aswels wosa treghi goera an myghtern. 2Ha pan gowldhyb'sens losow an dor, yn-medhav,

‘A Arloedh Duw, gav, my a'th pys!

Fatell yll Yakob sevel?

rag byghan yw.’

3An Arloedh a gemmeras edrek a hemma:

‘Ny hwyrvydh’, yn-medh an Arloedh.

Gwelesigeth a Dan

4An Arloedh Duw a dhiskwedhas hemma dhymm: hag otta, yth esa an Arloedh Duw ow kelwel rag prov dre dan, ha'n tan a dhevoryas an islonk meur, hag a dhevoryas rann a'n tir. 5Ytho yn-medhav,

‘A Arloedh Duw, hedh, my a'th pys!

Fatell yll Yakob sevel?

rag byghan yw.’

6An Arloedh a gemmeras edrek a hemma:

‘Ny hwyrvydh hemma na hwath’, yn-medh an Arloedh Duw.

Gwelesigeth a Blemmik

7Ev a dhiskwedhas hemma dhymm, hag otta, yth esa an Arloedh ow sevel ryb fos gwrys dhe blemmik, plemmik yn y dhorn. 8Ha'n Arloedh a leveris dhymm, ‘Pandr'a welydh, Amos?’ Hag yn-medhav, ‘Plemmik.’ Ena an Arloedh a leveris,

‘Ottavy ow settya plemmik

yn mysk ow fobel Ysrael;

ny wrav aga sparya namoy.’

9Tylleryow ughel Ysak a vydh forsakys,

ha sentris Ysrael a vydh difeythys

ha my a sev erbynn chi Yeroboam gans an kledha.

Amos hag Amasia

10Ena Amasia, oferyas Bethel, a dhannvonas dhe Yeroboam myghtern Ysrael, ow leverel: ‘Amos re vrasas er agas pynn yn kres chi Ysrael; ny yll an tir godhav y eryow oll. 11Rag Amos re leveris hemma:

“Yeroboam a verow gans an kledha,

hag Ysrael a vydh divres yredi

yn-mes a'y dir.” ’

12Hag Amasia a leveris dhe Amos, ‘A goelyek, ke, fi dison dhe bow Yuda, ha dybri bara ena, ha profoesa ena; 13mes na brofoes namoy yn Bethel, rag y vos sentri an myghtern, ha'n chi ryel.’

14Ena Amos a worthybis dhe Amasia, ‘Nyns ov profoes, na mab a brofoes, mes bugel ov, ha dyghtyer frut sykaminwydh, 15ha'n Arloedh a'm kemmeras dhiworth holya an flokk, ha'n Arloedh a leveris dhymm: “Ke, gwra profoesa dhe'm pobel Ysrael.” 16Ha lemmyn, klew ger an Arloedh: Ty a lever,

“Na wra profoesa erbynn Ysrael,

ha na bredhek erbynn chi Ysak.”

17Rakhenna an Arloedh a lever hemma:

Hora vydh dha wreg y'n sita

ha'th vebyon ha'th vyrghes a goedh gans an kledha;

ha'th tir a vydh rynnys der an gordenn;

ty dha honan a verow yn tir avlan,

ha divres vydh Ysrael yn sur a-dhiwar y dhor.’