Gwelesigeth a Frut an Hav

1An Arloedh Duw a dhiskwedhas hemma dhymm, hag otta, kanstellas a frut an hav. 2Hag ev a leveris, ‘Pandr'a welydh, Amos?’ Hag yn-medhav, ‘Kanstellas a frut an hav.’ Ena an Arloedh a leveris dhymm:

Devedhys yw gorfenn ow fobel Ysrael;

ny wrav aga sparya namoy.

3Kanow an tempel a dheu ha bos oelva y'n jydh na,

yn-medh an Arloedh Duw.

Y fydh meur a gorfow marow,

tewlys a-dro yn pub le: taw!

Tenkys Ysrael

4Klewewgh hemma, hwi neb a stank war an edhommek

ha diswul boghosogyon an tir,

5ow leverel, ‘P'eur fydh tremenys an loer nowydh,

may hyllyn gwertha greun?

ha'n sabot,

may hyllyn igeri marghas an ys’ –

ow lehe an efa, ow kressya an shekel,

hag ow toella gans fals vantolyow,

6dhe brena boghosogyon a arghans

ha'n edhommek a dhiw eskis,

ha gwertha us an gwaneth.

7An Arloedh re dos re woeth Yakob:

Yn sur, nevra ny ankovav travyth a'ga gweythresow!

8A ny gren an tir rakhemma

ha myns eus trigys ynno kyni?

Oll an tir a sev kepar ha'n Nil,

ha frosa ha koedha arta kepar ha'n Nil yn Ejyp.

9Hag y hwyrvydh y'n jydh na, yn-medh an Arloedh Duw,

my a wra an howl dhe sedhi y'n hanter-dydh,

ha tewlhe an dor yn lagas an howl.

10Treylya a wrav agas goelyow yn kynvann,

ha'gas kanow oll yn oelva;

my a worr yskar war an dhiwglun oll,

ha bloghter war bub penn;

my a's gwrav dhe gyni kepar dell ve war-lergh aga unn vab,

ha'n gorfenn anodho a vydh kepar ha dydh hwerow.

11Otta dydhyow ow tos, yn-medh an Arloedh Duw,

may tannvonav divoetter war an tir;

ny vydh divoetter a vara, na syghes a dhowr,

mes a glewes geryow an Arloedh.

12Gwandra a wrons a vor dhe vor,

hag a'n kledh bys y'n howldrevel;

ow kwandra a-dro dhe hwilas ger an Arloedh,

mes ny'n kevons.

13Y'n jydh na gwyrghesow teg ha gwer yowynk

a glamder gans syghes.

14An re a de re'n peghes a Samaria,

ha leverel, ‘Dell vew dha dhuw, A Dan!’

ha ‘Dell vew fordh Beer-sheba’,

a goedh, ha ny sevons arta.