Breus an Arloedh

1My a welas an Arloedh ow sevel ryb an alter, hag ev a leveris:

Gwask pennow an pilars erna grenno an treudhow,

ha'ga brewi war benn an bobel oll!

An rann yw gesys a ladhav gans an kledha;

denvyth ny fi dhe-ves,

denvyth ny skap.

2Kyn palons bys yn ifarn,

ow dorn a's kemmer alena;

kynth yskynnons dhe nev,

my a's dre yn-nans alena.

3Kynth omgudhons war wartha menydh Karmel,

my a's hwila alena ha'ga hemmeres;

ha kynth yns i kudhys a-dherag ow dewlagas yn goeles an mor,

ena my a worhemmynn dhe'n sarf, ha hi a's brath.

4Ha kynth ons yn kethneth dherag aga eskerens,

ena yth arghav dhe'n kledha, hag ev a's ladh;

ha my a worr ow dewlagas warnedha

rag drog, a-der rag da.

5An Arloedh, Duw an luyow –

ev a doch an tir ha teudhi a wra,

ha myns eus trigys ynno a gyn,

hag oll an tir a sev kepar ha'n Nil,

ha koedha arta, kepar ha'n Nil yn Ejyp;

6ev a dhrehav y'n nevow y jambouryow ughel

ha fondya y nen a-ugh an nor;

ev a elow dowrow an mor,

ha'ga dinewi war enep an nor –

an Arloedh yw y hanow.

7A nyns owgh hwi kepar ha mebyon an Ethiopysi dhymm, A

vebyon Ysrael? yn-medh an Arloedh.

A ny dhres vy Ysrael yn-mes a bow Ejyp,

ha'n Filistysi yn-mes a Kaftor, hag Aram yn-mes a Kir?

8Otta, yma dewlagas an Arloedh Duw war wlaskor an peghes,

ha my a's distru dhiwar enep an nor.

Mes ny gowldhistruav chi Yakob,

yn-medh an Arloedh.

9Rag otta, my a worhemmynn,

ha shakya chi Ysrael yn mysk an gwlasow,

kepar ha shakya kroeder,

ha ny goedh bilienn vyth dhe'n leur.

10Oll peghadoryon ow fobel a verow gans an kledha,

neb a lever, ‘Drog ny dheu nes dhyn, na ny dhrehedh dhyn.’

Dassevel Ysrael

11Y'n jydh na my a dhrehav

skovva Davydh yw koedhys

ha keas hy aswaow,

ha daswul hy magoryow,

ha'y drehevel kepar hag y'n dydhyow koth;

12may perghennons an remenant a Edom

ha'n kenedhlow oll may feu ow hanow gelwys warnedha,

yn-medh an Arloedh neb a wra hemma.

13Otta dydhyow ow tos, yn-medh an Arloedh,

may teu an aradror nes dhe'n myser,

ha trettyer an grappys dhe haser an has;

ha'n menydhyow a dhinwa sugen grappys,

ha teudhi a wra an brennow oll.

14Ha my a dreyl kethneth ow fobel Ysrael,

hag i a dhastrehav an sitys dhibobel ha triga ynna;

i a blans gwinlannow hag eva aga gwin,

hag i a wra lowarthyow ha dybri aga frut.

15My a wra aga flansa war aga thir,

ha ny vydhons diwreydhys namoy

dhiwar aga dor a res vy dhedha,

yn-medh an Arloedh dha Dhuw.