Baruk ha'n Yedhewon yn Babylon

1An re ma yw geryow an lyver a wrug Baruk mab Neria mab Maaseya mab Sedekia mab Hasadia mab Hilkia aga skrifa yn Babylon, 2y'n pympes blydhen hag yn seythves dydh an mis, y'n termyn may kemmeras an Kaldeanys Yerusalem ha'y leski gans tan.

3Baruk a lennas geryow an lyver ma yn klewans Yekonia mab Yoakim, myghtern Yuda, hag yn klewans oll an dus neb a dheuth dhe glewes an lyver, 4hag yn klewans an ugheloryon ha mebyon an myghtern, hag yn klewans an henavogyon hag oll an dus, byghan ha bras, oll myns esa trigys yn Babylon ryb an avon Sud.

5Ena i a oelas ha penys ha pysi a-dherag an Arloedh; 6i a guntellas arghans, herwydh galloes pub den, 7hag i a'n dannvonas dhe Yerusalem dhe Yoakim an arghoferyas mab Hilkia mab Shallum ha dhe oll an oferysi ha dhe oll an dus a veu kevys ganso yn Yerusalem. 8Y'n kettermyn, war an degves dydh a Sivan, Baruk a gemmeras lestri chi an Arloedh re bia degys dhe-ves a'n tempel dh'aga daskorr dhe bow Yuda, an lestri a arghans re bia gwrys gans Sedekia mab Yosia myghtern Yuda, 9wosa Nebukadnessar myghtern Babylon dhe dhoen dhe-ves Yekonia ha'n bennsevigyon ha'n gethyon ha'n ugheloryon ha tus an tir a-dhiworth Yerusalem ha'ga dri dhe Babylon.

Lyther dhe Yerusalem

10Yn-medhons: Otta, ni re dhannvonas dhywgh arghans, ytho prenewgh ragowgh offrynnow leskys hag offrynnow pegh hag ynkys, ha pareusewgh offrynnow greun, ha'ga offrynna war alter an Arloedh agan Duw; 11ha pysewgh rag bewnans Nebukadnessar ha rag bewnans Belshassar y vab, may fo aga dydhyow war an nor kepar ha dydhyow nev. 12An Arloedh a re dhyn nerth, ha golowi agan dewlagas, ha ni a drig yn-dann skeus Nebukadnessar myghtern Babylon, hag yn-dann skeus Belshassar y vab, ha ni a's serv rag lies dydh ha kavoes favour yn aga golok. 13Pysewgh ragon ni ynwedh dhe'n Arloedh agan Duw, rag ni re beghas erbynn an Arloedh agan Duw, ha bys y'n jydh hedhyw konnar an Arloedh ha'y sorr ny dreylyas dhe-ves ahanan. 14Ha ty a lenn an lyver ma a dhannvensyn dhis, dh'y dhyllo yn chi an Arloedh war dhy'goelyow ha dydhyow apoyntys.

An Dhivresow a Gonfess aga Feghosow

15Ha ty a lever: Dhe'n Arloedh agan Duw yma ewnder, mes ragon ni yma meth a'n fas, kepar hag y'n jydh hedhyw, dhe dus Yuda, ha dhe annedhysi Yerusalem, 16ha dh'agan myghternedh, ha'gan pennsevigyon, ha'gan oferysi, ha'gan profoesi, ha'gan tasow. 17Rag ni re beghas a-dherag an Arloedh, 18ha'y dhisobaya, ha ny woslowsyn orth lev an Arloedh agan Duw dhe gerdhes y'n y ordenansow a settyas a-ragon. 19A-dhia'n jydh may tros an Arloedh agan tasow yn-mes a bow Ejyp bys y'n jydh hedhyw, ni re beu diwostydh dhe'n Arloedh agan Duw, ha ni re beu logh, rag ny glewen ni y lev. 20Ytho, bys y'n jydh hedhyw terroesow re serghis dhyn ha'n volleth a wrug an Arloedh hy ordena dre Moyses y was y'n termyn may tros ev agan tasow yn-mes a bow Ejyp dhe ri dhyn tir a dhinwa leth ha mel kepar dell yw y'n jydh hedhyw. 21Byttegyns ny goslowsyn orth lev an Arloedh agan Duw herwydh oll geryow an brofoesi a dhannvonas dhyn. 22Mes pub ahanan re holyas bodh y golonn dreus dre servya duwow erell hag ow kul an pyth yw drog yn golok an Arloedh agan Duw.