1Ytho, an Arloedh a afydhyas y er a gewsis er agan pynn hag erbynn agan breusysi a vreusi Ysrael hag erbynn agan myghternedh hag erbynn agan pennsevigyon hag erbynn an dus a Ysrael ha Yuda. 2Yn-dann an nev oll, ny veu gwrys taklow a'n par ma dell wrug ev yn Yerusalem, herwydh an pyth yw skrifys yn lagha Moyses, 3may tyb'sen, an eyl kig y vab hag y gila kig y vyrgh. 4Hag ev re's delivras dhe vos gostydh dhe oll an gwlaskordhow usi a-dro dhyn, ha mewl hag ynyalder yn mysk oll an poblow yn agan kyrghynn, y'n tylleryow may hwrug an Arloedh aga skattra. 5Yndella tewlys dhe'n leur yth esens a-der drehevys yn-bann, drefenn ni dhe begha erbynn an Arloedh agan Duw rag ny woslowsyn orth y lev.

6Dhe'n Arloedh agan Duw yma ewnder, mes yma meth a'n fas ragon ni ha'gan tasow kepar dell eus y'n jydh hedhyw. 7Oll an drogow ma a wrug an Arloedh godros ragon re dheuth warnan. 8Hwath ny bysyn favour an Arloedh, ow treylya dhe-ves, peub ahanan, a-dhiworth prederow y golonn dhrog. 9Ha'n Arloedh a woelyas war an drogow, ha'n Arloedh re's dros warnan, rag an Arloedh yw gwiryon yn oll y oberow a worhemmynnis dhyn. 10Hwath, ny woslowsyn dh'y lev, dhe gerdhes yn ordenansow an Arloedh a settyas a-ragon.

Pysadow rag Delivrans

11Ha lemmyn, A Arloedh, Duw Ysrael, neb a dhros dha bobel yn-mes a bow Ejyp dre leuv grev ha gans toknys ha marthusyon ha gans galloes meur ha bregh ystynnys, ha re wrug dhis hanow kepar dell yw y'n jydh hedhyw, 12ni re beghas, ni re beu ongrassyes, ni re wrug kamm, A Arloedh agan Duw, erbynn oll dha ordenansow. 13Gas dha sorr dhe dreylya dhe-ves a-dhiworthyn, rag yth eson gesys, boghes agan niver, yn mysk an kenedhlow ma'gan skattrsys ynna. 14Klew, A Arloedh, agan pysadow ha'gan govynnadow hag a-barth dhis dha honan, delirv ni, ha gront dhyn favour yn wel an re re'gan hembronkas bys yn divroedh; 15rag may hwodhvo an norvys oll, ty dhe vos an Arloedh agan Duw, rag Ysrael ha'y henedh yw gelwys gans dha hanow.

16A Arloedh, mir war-woeles a-dhiworth dha drigva sans ha preder ahanan. Pleg dha skovarn, A Arloedh, ha klew; 17igor dha dhewlagas, A Arloedh, ha mir; rag an re tremenys usi y'n bedh, may feu aga enev kemmerys a-dhiworth aga horf, ny askrifons dhe'n Arloedh naneyl wormel nag ewnder, 18mes an enev yw grevys yn feur hag a wra mos a-derdro yn unn warrgromma ha gwann, ha'n lagas ow fyllel ha'n enev nownek, a askrif dhis gormel hag ewnder, A Arloedh.

19Rag, nyns yw drefenn oberow gwiryon pynag a'gan tasow po a'gan myghternedh y tren ni a-dheragos agan pysadow rag mersi, A Arloedh agan Duw. 20Rag ty re dhannvonas dha sorr ha'th konnar warnan, kepar dell gewssys dre dha wesyon an brofoesi, ow leverel: 21Yndellma y lever an Arloedh: Plegyowgh agas diwskoedh dhe servya myghtern Babylon, ha hwi a drig y'n tir a res dh'agas tasow. 22Mes, mar ny vynnowgh klewes lev an Arloedh dhe servya myghtern Babylon, 23my a wra dhe hedhi a-dhiworth sitys Yuda hag a-dhiworth an ranndir a-dro dhe Yerusalem, lev lowender ha lev joy, lev an gour pries ha lev an venyn bries, ha'n tir oll a vydh ynyalder heb annedhysi ynno.

24Mes ny obaysyn dha lev, dhe servya myghtern Babylon, ha ty re gompoesas dha eryow a gewssys dre dha wesyon an brofoesi, y fedha eskern a'gan myghternedh hag eskern a'gan tasow dres yn-mes a'ga bedh; 25hag otta, i re beu tewlys yn-mes dhe doemmder an jydh, ha dhe rew an nos, hag i a verwis yn anken meur, dre dhivoetter ha kledha ha pla. 26Ha'n chi henwys gans dha hanow, ty re'n gwrug kepar dell yw y'n jydh hedhyw, drefenn sherewynsi chi Ysrael ha chi Yuda.

Dedhewadyow Duw

27Hwath, ty re'gan dyghtyas, A Arloedh agan Duw, yn oll dha guvder, hag yn oll dha druedh meur, 28kepar dell leversys dre dha was Moyses y'n jydh ma'n gorhemmynnsys dhe skrifa dha lagha yn lok mebyon Ysrael, ow leverel, 29‘Mar ny obayowgh ow lev, an routh pur vras ma a vydh, yn hwir, treylys dhe niver byghan yn mysk an kenedhlow ma's skattrav ynna. 30Rag my a woer, na'm obayons, rag pobel kales hy hilbenn yns i. Mes yn tir aga divroedh, i a dheu dh'aga skians, 31hag i a woer ow bos an Arloedh aga Duw. My a re dhedha kolonn ha diwskovarn a woslow; 32hag i a'm gormel yn tir aga divroedh, ha perthi kov a'm hanow, 33ha treylya a-dhiworth aga gorthter ha'ga drogoberow, rag i a berth kov a fordhow a'ga thasow neb a beghas a-dherag an Arloedh. 34My a's dre arta dhe'n tir a des y ri dh'aga thasow, dhe Abraham ha dhe Ysak ha dhe Yakob, hag i a'n rewl, hag my a's ynkress ha ny vydhons tanowhes. 35My a wra kevambos bys vykken gansa dhe vos aga Duw hag i a vydh ow fobel ha nevra namoy ny removyav ow fobel Ysrael a-dhiworth an tir a ros vy dhedha.’