1A Arloedh ollgalloesek, Duw Ysrael, an enev yn angoes ha'n spyrys moredhek a arm dhis. 2Klew, A Arloedh, ha kemmer mersi, rag ni re beghas a-dheragos. 3Rag ty a esedh y'th tron bys vykken, ha ni yw diswrys bys vykken. 4A Arloedh ollgalloesek, Duw Ysrael, klew lemmyn pysadow an re varow a Ysrael, ha mebyon an re a beghas a-dheragos, neb na woslowas orth lev agan Duw, may serghis terroesow dhyn. 5Na borth kov a dhrogoberow agan tasow, mes y'n termyn ma, porth kov a'th halloes ha'th hanow. 6Rag an Arloedh agan Duw osta, ha ni a'th wormel, A Arloedh. 7Rag ty re worras an own ahanas yn agan kolonn, rag may halwsen war dha hanow, ha ni a'th wormel yn agan divroedh, rag ni re worras dhe-ves a-dhiworth agan kolonn oll drogoberow agan tasow neb a beghas a-dheragos. 8Otta, yth eson ni hedhyw yn agan divroedh may hwrussys agan skattra dhe vos keredhys ha milligys ha kessydhys rag oll drogoberow agan tasow neb a forsakyas an Arloedh agan Duw.

Gormola Furneth

9Klew gorhemmynnow bewnans, a Ysrael,

goslowewgh ha dyskewgh konvedhes.

10Prag yth yw, a Ysrael, prag yth yw dha vos yn tir dha eskerens,

ty dhe vos ow kothhe yn pow astranj,

ty dhe vos defolys gans an re tremenys,

11ty dhe vos niverys yn mysk an re usi yn ifarn?

12Ty re forsakys an fenten a furneth.

13Rag, mar kerdhses yn fordh Duw

ty a via ow triga yn kres bys vykken.

14Dysk ple'ma doethter,

ple'ma nerth,

ple'ma konvedhes,

rag may hwodhvi, yn kettermyn,

ple'ma hirder a dhydhyow ha bewnans,

ple'ma golow rag an dhewlagas, ha kres.

15Piw re gavas hy le?

Ha piw re entras hy thresorvaow?

16Ple'ma pennsevigyon an kenedhlow

ha'n re yw arlydhi dres bestes an norvys;

17an re a sport gans ydhyn an ayr,

hag a with arghans hag owr ragdha aga honan,

may hwra tus fydhya ynna,

ha nyns eus penn dh'aga hovaytis;

18an re a dowl towl dhe gavoes arghans, hag yw prederus,

ha nyns eus ol a'ga oberow?

19Gyllys glan yns, gyllys yn-nans dhe ifarn,

ha re erell re dhrehevis yn aga le.

20Henedhow nowydh re welas an golow

ha re drigas war an norvys;

mes ny dhys'sons an fordh dhe skians,

21na konvedhes hy hynsyow

na settya dalghenn ynni.

Aga mebyon re wandras pell dhiworth aga fordh.3:21 aga fordh: Po amendyans war-lergh an Syriek hy fordh.

22Ny veu klewys son anedhi yn Kanan,

na ny veu hi gwelys yn Teman;

23mebyon Hagar neb a hwila konvedhes war an norvys,

marchons Merran ha Teman,

an rakkoryon ha'n re a hwila konvedhes,

ny dhys'sons an fordh dhe furneth,

na ri preder dh'y hynsyow.

24A Ysrael, ass yw meur chi Duw!

Hag ass yw efan an tiredh a bew ev!

25Meur yw, ha heb or,

ughel yw ha heb musur.

26An gewri a veu dineythys ena, neb o gerys-da a henys,

meur yn ughelder, konnyk yn bresel.

27Ny's dewisas Duw,

na ri dhedha an fordh dhe skians;

28ytho, i a veu distruys drefenn na's teva doethter,

i eth dhe goll dre aga foli.

29Piw res eth yn-bann yn nev ha'y hemmeres,

ha'y dri yn-nans a-dhiworth an kommol?

30Piw res eth a-dreus dhe'n mor ha'y havoes,

hag a's pren a owr pur?

31Denvyth ny woer hy fordh

na ny'n jeves bern a-dro dh'y hyns.

32Mes ev neb a woer pup-tra oll a's goer,

ev a's kavas dre y gonvedhes.

Ev neb a bareusis an norvys rag oll termyn,

a'n lenwis gans kreaturs peswar-troesek;

33ev neb a dhannvon yn-rag an golow, ha mos a wra,

ev a'n gelwis, hag ev a'n obayas ow krena;

34an ster a derlentris yn aga goelyow ha lowen ens;

ev a's gelwis hag i a leveris ‘Ottani!’

I a derlentris gans lowena ragdho ev neb a's gwrussa.

35Hemm yw agan Duw,

nagonan arall ny yll bos kehevelys dhodho.

36Ev a gavas an fordh dien dhe skians

ha'y ri dhe Yakob y was,

ha dhe Ysrael y veurgerys.

37A-wosa hi a omdhiskwedhas war an norvys

ha triga yn mysk mab-den.