1Hi yw lyver ordenansow Duw,

ha'n lagha hag a dhur bys vykken.

Oll myns a's syns fast a vew,

ha'n re a's gas a verow.

2Treyl a Yakob, ha syns dalghenn ynni;

kerdh troha splannder hy golow.

3Na ro dha enor dhe dhen arall,

na'n taklow yw dhe'th les dhe genedhel alyon.

4A Ysrael, gwynn agan bys,

rag ni a woer an pyth yw plegadow dhe Dhuw.

Kennerth rag Ysrael

5Gwellhewgh agas cher, ow fobel,

a govadh Ysrael!

6Nyns o rag agas diswrians

y fewgh gwerthys dhe'n kenedhlow,

mes hwi a veu delivrys dhe'th eskerens

rag hwi dhe serri Duw.

7Rag hwi a'n sorras ev neb a'gas gwrug,

owth offrynna dhe dhywolow a-der dhe Dhuw.

8Hwi a ankovas an Duw bythkwethek, neb a'gas drehevis,

ha hwi re dhuwenas Yerusalem, neb a'gas magas.

9Rag pan welas hi an sorr a dheuth warnowgh a-dhiworth Duw,

hi a leveris:

Goslowewgh, hwi gentrevogyon Sion,

Duw re dhros tristyns meur warnav;

10rag my re welas divroedh ow mebyon ha myrghes,

a wrug an Duw a dhur bys vykken dri warnedha.

11Gans lowena my a's maga,

mes my a's dannvonas dhe-ves gans oelva ha tristyns.

12Na wres denvyth lowenhe warnav, gwedhwes

ha forsakys gans lies;

gesys dyegrys en vy drefenn peghosow ow fleghes,

drefenn i dhe dreylya dhe-ves a-dhiworth lagha Duw.

13Ny aswonnsons y ordenansow,

na kerdhes yn fordhow y worhemmynnow,

na trettya yn hynsyow a dhyskybleth yn y ewnder.

14Des kentrevogyon Sion;

perthewgh kov a gethneth ow mebyon ha myrghes,

a dhros an Bythkwethek warnedha.

15Rag ev re dhros er aga fynn kenedhel a-bell,

kenedhel diveth, a yeth astranj,

neb na'n jeva revrons rag kothwas,

na truedh rag flogh.

16I re dhug dhe-ves mebyon veurgerys an wedhwes, hag gasa an venyn dhigoweth heb myrghes.

17Mes my, fatell allav agas gweres?

18Rag ev neb a dhros an terroesow ma warnowgh

a wra agas delivra a-dhiworth dorn agas eskerens.

19Kewgh ow fleghes, kewgh;

rag my re beu gesys ynyal.

20My re dhiwiskas an dillas a gres

ha gwiska yskar ow fysadow;

my a arm dhe'n Bythkwethek oll ow dydhyow.

21Gwellhewgh agas cher, ow fleghes, germewgh dhe Dhuw,

hag ev a wra agas delivra a-dhiworth galloes ha dorn agas eskerens.

22Rag my re worras ow govenek y'n Bythkwethek dh'agas sawya,

ha lowena a dheuva dhymm

drefenn an tregeredh a dheu dhywgh skon

a-dhiworth agas Selwador bythkwethek.

23Rag my a'gas dannvonas yn-mes gans tristyns hag oelva,

mes Duw a'gas daskorr dhymm gans joy ha lowena bys vykken.

24Rag lemmyn dell re welas kentrevogyon Sion agas kethneth,

ytho, skon i a wel agas selwyans dhiworth Duw,

an pyth a dheu dhywgh gans glori meur

ha gans splannder a'n Bythkwethek.

25Ow fleghes, godhevewgh gans perthyans an sorr a dheuva warnowgh a-dhiworth Duw.

Dha eskar re'th helghyas,

mes skon ty a wel y dhistruyans

ha trettya war aga honna.

26Ow fleghes vedhel re vyajyas fordhow garow;

i a veu kemmerys dhe-ves kepar ha flokk degys dhe-ves gans eskerens.

27Gwellhewgh agas cher, ow fleghes, ha germewgh dhe Dhuw,

rag hwi a vydh kovhes ganso ev neb a dhros an taklow ma warnowgh.

28Rag kepar dell veu yn agas brys mos yn sowdhan dhiworth Duw,

dehwelewgh gans diwysykter degplek dh'y hwilas.

29Rag ev neb a dhros an terroesow ma warnowgh

a dhre dhywgh lowena heb diwedh gans agas selwyans.

Ambos Gweres rag Yerusalem

30Gwellha dha jer, a Yerusalem,

rag ev neb a'th henwis a'th konfort.

31Go-i neb a'th plagyas

ha lowenhe orth dha goedh.

32Go-i an sitys may servya dha fleghes avel kethyon;

go-hi an sita a dhegemmeras dha vebyon.

33Rag kepar dell lowenhas orth dha goedh,

hag o lowen a'th tistruyans,

yndella y fydh hi duwenys orth hy ynyalder hy honan.

34Rag my a gemmer dhe-ves hy heudhder yn hy foblans meur,

ha'y thonteth a vydh treylys dhe dhuwon.

35Rag tan a dheu warnedhi a-dhiworth an Bythkwethek rag lies dydh,

ha rag termyn hir, hi a vydh annedhys gans dywolow.

36A Yerusalem, mir troha'n est,

ha gwel an lowender usi ow tos dhis a-dhiworth Duw.

37Otta, yma dha vebyon ow tos, neb a dhannvensys dhe-ves;

ymons ow tos, kuntellys a-dhiworth howldrevel ha howlsedhes,

orth ger an Sans,

ow lowenhe yn glori Duw.