1Diwisk dillas dha dristyns hag anken, a Yerusalem,

ha gwisk bys vykken tekter an glori a-dhiworth Duw.

2Gwisk mantell an ewnder a-dhiworth Duw;

gorr war dha benn kurun glori an Bythkwethek.

3Rag Duw a dhiskwa dha splannder dhe bub bro yn-dann nev.

4Rag ty a vydh henwys bys vykken gans Duw

‘Kres ewnder, ha glori gordhyans Duw.’

5Omdhrehav a Yerusalem, ha sav y'n ughelder;

mir troha'n est,

ha gwel dha fleghes kuntellys a-dhiworth howlsedhes ha howldrevel,

orth ger an Sans,

ow lowenhe, Duw dhe berthi kov anedha.

6Rag i eth yn-mes ahanas war droes,

hembrenkys dhe-ves gans eskerens;

mes Duw a's dre dhis,

degys yn glori, kepar ha war dron ryel.

7Rag Duw re erghis, pub menydh ughel, ha'n breow a dhur bys vykken dhe vos gwrys isel,

ha'n nansow lenwys yn-bann, dhe wul dor leven,

may kertho Ysrael heb danjer yn glori Duw.

8An koesow ha pub gwydhenn hweg hy blas

re woskeusis Ysrael orth arghadow Duw.

9Rag Duw a hembronk Ysrael gans lowena,

yn golow y glori,

gans an mersi hag ewnder a dheu a-dhiworto.5:9 Y'n Vulgat ha Vershyon Myghtern Jamys Lyther Yeremia a siw omma avel Baruk chaptra 6. Y'n Septuagint yth yw lyver diblans.