LYTHER YEREMIA6:1 Y'n Septuagint an chaptra ma yw lyver diblans. Y'n Vulgat ha Vershyon Myghtern Jamys yth yw chaptra 6 a Lyver Baruk.

1Dasskrif a lyther a wrug Yeremia y dhannvon dhe'n re a vedha hembrenkys yn divroedh dhe Babylon gamans myghtern an Babylonianys, dhe dherivas dhedha an messaj par dell via erghys dhodho gans Duw.

Divroedh Hir a Vydh dhe'n Bobel

2Rag peghosow re wrussowgh a-dherag Duw, hwi a vydh hembrenkys yn divroedh dhe Babylon gans Nebukadnessar myghtern an Babylonianys. 3Rakhenna, wosa dos dhe Babylon hwi a drig ena lies blydhen, ha rag termyn hir, bys seyth henedh; ha wosa henna my a'gas dre dhe-ves alena yn kres. 4Lemmyn yn Babylon hwi a wel duwow gwrys a arghans hag owr ha prenn, usi degys war dhiwskoedh dus hag a wra dhe'n kenedhlow perthi own anedha. 5Ytho, gwaytyewgh na wryllowgh dos ha bos kammenn kepar ha'n estrenyon, na perthi own anedha, pan welowgh an routh a-dheragdha hag a-dryv dhedha, orth aga gordhya. 6Mes leverewgh yn agas kolonn, ‘Ty yw neb a res dhyn y wordhya.’ 7Rag yma ow el genowgh, hag yma ev ow kwitha war agas enevow.

Follneth Idolys

8Rag aga thaves yw levenhes gans an krefter, hag i aga honan yw gorlownys gans owr hag arghans; hwath fals yns ha ny's teves kewsel. 9Hag ow kemmeres owr, i a wra kurunyow rag pennow aga duwow, kepar dell ve rag mowes neb a gar bos afinys. 10Treweythyow ynwedh an oferysi a gemmer a-dhiworth aga duwow owr hag arghans, ha'y spena warnedha aga honan. 11Hag i a re nebes anodho dhe'n horys-tempel; hag i a's gwisk kepar ha tus gans dillasennow, an duwow ma a arghans hag owr ha prenn. 12Mes, ny yll an duwow ma omsawya aga honan a-dhiworth kesknians ha goedhanes, kyn fons gwiskys yn goenyow purpur. 13I a lanha aga fas dre reson a bolter an tempel, yw tew warnedha. 14Onan anedha a syns ternwelenn, par dell ve breusyas rannvro, mes ny yll gorra dhe'n mernans nagonan a wra y offendya. 15Ev a'n jeves ynwedh yn y leuv dhyghow dagyer ha boel: mes ny yll ev delivra y honan a-dhiworth bresel ha ladron. 16Ytho gans henna kler yw nag yns duwow: rakhenna na berthewgh own anedha.

17Rag kepar dell yw lester den diles pan yw terrys, yndella ynwedh yw gans aga duwow, wosa i dhe vos settys yn-bann y'n tempel. Aga dewlagas yw leun a bolter dre dreys an re a enter ynno. 18Kepar dell yw an yetys deges a bub tu war dhen neb re wrug kamm erbynn an myghtern, par dell ve dampnys dhe'n mernans, yn kepar maner an oferysi a fast aga themplow gans darasow, florennow ha barrys, ma na vons pyllys gans ladron. 19I a enow lugern, moy es dell wrons ragdha aga honan, kyn na yll aga duwow gweles nagonan anedha. 20Kepar hag onan a gebrow an tempel yns, mes y leverir bos aga holonn kniys gans an pryves a slynk yn-mes a'n dor; ha pan y's debrons, ha'ga dillasennow, ny wrons y attendya. 21Aga fas re beu duhes gans an mog hag a dheu yn-mes a'n tempel. 22War aga horf ha penn a esedh eskelli-kroghen, gwennili hag ydhyn, ha'n kathes ynwedh. 23Dre hemma hwi a woer nag yns duwow: rakhenna na berthewgh own anedha.

24Yn despit dhe'n owr a wiskons rag tekter, ny yllons terlentri marnas nebonan a lanha dhe-ves an wossen, rag hwath pan esens ow pos teudhys ny wrens y attendya. 25An taklow ma yw prenys na fors an kost, mes nyns eus anall ynna. 26Ymons i degys war dhiwskoedh tus, drefenn na's teves treys, yndellma i a dhiskudh dhe vab-den aga bos koeg. 27Ha'n re a's serv yw methek, rag mar koedhons dhe'n leur nep-prys, ny yllons sevel arta dredha aga honan; na ny yllons gwaya aga honan mara's settyer a'ga sav; na ny yllons sevel a'ga sav dredha aga honan. Ha mars yns i disevys, ny yllons omsettya kompes. I a worr rohow a-dheragdha kepar dell ve a-dherag an re varow. 28Aga oferysi a werth an taklow offrynnys dhedha, hag usya an mona ragdha i aga honan. Yn kepar maner aga gwragedh a gyfeyth rann anodho yn hoelan; mes dhe'n voghosogyon ha'n re diweres, ny rons travyth anodho. 29Benynes yn aga amseryow misyek ha benynes yn gwelivos a yll tochya aga offrynnow. Hwi a woer dre an taklow ma nag yns duwow; na berthewgh own anedha.

30Rag fatell yllons bos gelwys duwow? Benynes a sett boes a-dherag an duwow a arghans hag owr ha prenn; 31ha'n oferysi a esedh yn aga thempel, gans aga dillas skwardys, ha blew aga fenn ha barv treghys dhe-ves, ha travyth war aga fenn. 32I a vedhygel ha garma a-dherag aga duwow kepar dell wra tus orth goel ynkleudhyans rag den marow. 33Ha'n oferysi ynwedh a gemmer rann a dhillas aga duwow dhe dhillasa aga gwragedh ha fleghes. 34Mars usi gwrys dhedha po drog po da, ny yllons y attyli: ny yllons settya myghtern yn-bann na'y worra dhe'n leur. 35Yn kepar maner, ny yllons ri rychys nag arghans: kyn hwrello den ambos dhedha ha ny'n gwith, ny yllons y hwilas dhiworto. 36Ny yllons sawya den dhiworth mernans na delivra an den gwann dhiworth an den krev. 37Ny yllons daswul gwel dhe'n dall, na gweres den neb usi yn ahwer. 38Ny yllons kemmeres truedh a wedhwes, na gul da dhe omdhivas. 39Aga duwow a brenn hag usi gorlownys gans owr ha gans arghans, yw haval dhe veyn dhiworth an menydh: ha'n re neb a's gordh a berth meth. 40Fatell yll den tybi ha leverel aga bos duwow, pan wra an Kaldeanys aga honan aga disenora?

Follneth Gordhya Idolys

41Rag pan welons den avlavar na'n jeves kewsel, i a'n dre ha pysi war Bel may kewsso an den, kepar ha pan alla konvedhes. 42Hwath ny yllons konvedhes hemma aga honan, ha'ga gasa; rag ny's teves skians. 43Ha'n benynes gans kerdyn yn aga hyrghynn owth esedha y'n skochfordhow, a lesk talgh rag ynkys; mes mar kwrella onan anedha, hembrenkys dhe-ves gans neb tremenyas, growedha ganso, hi a wra ges a'n venyn rybdhi, drefenn nag o hi mar dennvosek avelli hi hy honan, na ny veu hy hordenn terrys. 44Pypynag yw gwrys ragdha yw fals; ytho fatell yllir tybi po leverel aga bos duwow?

45Gwrys gans seri prenn hag owroryon yns; ny yllons bos travyth saw unnsel an pyth a vynn an kreftwas aga bos. 46Hag i aga honan neb a's gwrug yn sur ny vewons pur hir; rakhenna fatell yll an taklow gwrys gansa bos duwow? 47Rag i re asas gowyow ha keredhyow rag an re a dheu a-wosa. 48Rag pan dheu bresel po pla warnedha, an oferysi a omgusul war-barth a-dro dhe'n tyller may hallons kudha aga honan ha'ga duwow gansa. 49Ytho prag y fyll tus dhe weles nag yns duwow, rag ny yllons sawya aga honan dhiworth bresel na dhiworth pla? 50Rag pan welir nag yns saw a brenn, ha gorlownys gans arghans hag owr, y fydh konvedhys alemma rag aga bos fals. 51Hag y fydh apert dhe oll an kenedhlow ha'n vyghternedh nag yns duwow, mes ober diwla tus, ha nag eus ober Duw ynna. 52Piw ytho, a yll fyllel dhe wodhvos nag yns duwow?

53Rag ny yllons settya myghtern yn-bann y'n tir na ri glaw dhe dus. 54Ny yllons breusi aga hen aga honan, na delivra den may feu kamm gwrys dhodho; rag ny's teves galloes; i yw kepar ha brini yntra nev ha nor. 55Pan goedh tan war ji an duwow a brenn, po gorlownys gans owr po gans arghans, aga oferysi a fi dhe'n fo ha skapya; mes an duwow aga honan a vydh kowlleskys kepar ha kebrow. 56Ny yllons sevel orth myghtern vyth po eskerens. Fatell yllir tybi po leverel aga bos duwow?

57Ny yll duwow a brenn, ha gorlownys gans arghans hag owr, skapya dhiworth naneyl ladron na robbyoryon. 58Aga owr, hag arghans, ha dillas may mons i dillasys ynna, an re neb yw krev a's kemmer ha mones dhe-ves gansa, ha ny yllons gweres aga honan. 59Rakhenna gwell yw bos myghtern neb a dhiskwa y golonnekter, po lester dhe les yn chi, a serv edhomm y berghenn, ages bos an fals dhuwow ma; gwell hwath bos daras yn chi hag a with saw an taklow usi ynno, ages fals dhuwow a'n par na; gwell ynwedh koloven a brenn yn palys, ages an fals dhuwow ma.

60Rag howl, loer, ha ster, ow terlentri ha dannvemollethek nys dhe wul aga gonisyow, yw gostydh. 61Yn kepar maner an lughesenn, pan lughes, yw es dhe weles; hag y'n keth vaner an gwyns a hwyth yn pub bro. 62Ha pan worhemmynn Duw an kommol dhe vones dres an bys oll, i a wra kepar dell yw erghys dhedha. 63Ha'n tan dannvenys a-wartha dhe dhistrui breow ha koesow a wra kepar dell yw erghys dhodho. Mes nyns yw an idolys ma haval dhedha naneyl yn semlans na galloes. 64Rakhenna, ny yll bos naneyl tybys na leverys aga bos duwow, rag ny yllons breusi ken, na gul da dhe dus. 65Ytho rag hwi dhe wodhvos nag yns duwow, na berthewgh own anedha.

66Rag ny yllons mollethi na benniga myghternedh. 67Ny yllons diskwedhes toknys y'n nevow yn mysk an kenedhlow, na splanna kepar ha'n howl, na ri golow kepar ha'n loer. 68An bestes yw gwell agessa; rag i a yll fia yn-dann woskes, ha gweres aga honan. 69Ytho nyns yw apert dhyn kammenn aga bos duwow; rakhenna na berthewgh own anedha.

70Rag kepar ha boekka yn lowarth kukumbrow na with travyth, yndella yw aga duwow a brenn, gorlownys gans owr hag arghans. 71Y'n keth vaner aga duwow a brenn, gorlownys gans arghans hag owr, yw haval dhe spernenn yn lowarth, mayth esedh pub ydhyn warnedhi; ynwedh haval yw dhe gorf marow tewlys y'n tewlder. 72Ha hwi a woer nag yns duwow dre an purpur ha'n sendal splann ow pedri warnedha; hag i aga honan wortiwedh a vydh dybrys, hag a vydh mewl y'n tir. 73Gwell rakhenna yw den gwiryon na'n jeves idolys vyth, rag ev a vydh pell a-dhiworth mewl.