Salusyans

1Powl, abostol Krist Yesu dre vodh Duw, ha Timothi agan broder,

2Dhe'n syns ha dhe'n vreder lel yn Krist yn Kolosse:

Gras dhywgh hwi ha kres dhiworth Duw agan Tas.1:2 agan Tas: War-lergh re a'n dornskrifow agan Tas ha'n Arloedh Yesu Krist.

Grasyans Powl dhe Dhuw

3Ni a ras dhe Dhuw, Tas1:3 dhe Dhuw, Tas: War-lergh re a'n dornskrifow dhe Dhuw ha Tas. agan Arloedh Yesu Krist, pup-prys ow pysi ragowgh. 4Ni re glewas a'gas fydh yn Krist Yesu hag a'n kerensa usi genowgh troha'n syns oll, 5drefenn an govenek yw gwithys ragowgh y'n nevow, a glewsowgh kyns yn ger an gwir, an aweyl, 6a dheuth dhywgh hwi, kepar hag yn oll an bys hi a dheg frut ha tevi, kepar dell dyv ynnowgh hwi ynwedh, dhiworth an jydh may klewsowgh ha godhvos gras Duw yn gwirder; 7kepar dell dhys'sowgh gans Epafras agan keswas karadow, yw menyster lel a Grist ragowgh hwi, 8hag ev re dhiskwedhas dhyn dha gerensa y'n Spyrys.

Gnas hag Ober Krist

9Rakhenna ni ynwedh, dhiworth an jydh may klewsyn, ny hedhyn pysi ha govynn ragowgh, may fewgh lenwys a wodhvos a'y vodh yn pub furneth ha konvedhes spyrysel, 10dhe gerdhes gwiw dhe'n Arloedh, ow plegya yn tien, ow toen frut yn pub ober da hag ow tevi yn aswonnvos Duw, 11nerthys gans pub galloes war-lergh krevder y splannder dhe bub perthyans ha godhevyans; gans lowena 12ow krassa dhe'n Tas re'gas1:12 re'gas: War-lergh re a'n dornskrifow re'gan. gwrug gwiw dhe gavoes rann yn eretons an syns y'n golow. 13Ev a wrug agan delivra yn-mes a alloes an tewlder ha'gan gorra1:13 gorra yn gwlaskor: Greka treusperthi dhe wlaskor. yn gwlaskor y Vab karadow, 14yn neb y'gan beus daspren, gevyans peghosow.

15Imaj yw ev a'n Duw diwel, an kynsa-genys a greasyon oll; 16rag ynno ev y feu pup-tra gwrys y'n nevow ha war an nor, hewel ha diwel, tronys, dominasyons, prynsipatys po potestatys; pup-tra a veu gwrys dredho ev ha ragdho ev. 17Hag yma ev a-dherag pup-tra, ha pup-tra a syns war-barth ynno ev. 18Hag ev yw penn an korf, an eglos, neb yw an dalleth, an kynsa-genys dhiworth an re varow, rag may fo ev an kynsa yn pup-tra. 19Rag ynno pub leunder a Dhuw a veu plesys dhe driga, 20ha dredho dhe unnverhe pup-tra dhodho, po taklow war an nor po taklow y'n nevow, ow kul kres dre woes y grows.

21Ha hwi, ytho, re beu alyons kyns, hag eskerens y'n brys, dre dhrog wriansow; 22mes lemmyn ev re wrug unnverheans y'n korf a'y gig der y vernans, dh'agas profya sans, dinamm ha divlam a-dheragdho, 23mar kwrewgh pesya krev y'n fydh, grondys ha fyrv, heb bos removyes dhiworth govenek an aweyl a glewsowgh, pregewthys yn oll kreasyon yn-dann nev, ha my Powl, eth ha bos menyster anedhi.

Lavur Powl rag an Eglos

24Lemmyn my a lowenha y'm galarow ragowgh, ha my a gowlwra an taklow a fyll dhe baynys Krist y'm kig rag y gorf, yw an eglos. 25My eth ha bos menyster anedhi war-lergh charj Duw res dhymmo ragowgh hwi, dhe gollenwel ger Duw, 26an mysteri kudhys dhiworth an oesow ha'n henedhow, mes diskwedhys lemmyn dh'y syns, 27dhe neb Duw a vynnas diskudha pyth yw rychys splannder an mysteri ma yn mysk an Jentilys, yw Krist ynnowgh hwi, govenek an splannder. 28Ni a'n deriv, ow keski pub den ha dyski pub den yn pub furneth, may kwrellyn profya pub den perfydh yn Krist. 29Rag hemma, my a lavur, ow strivya gans y oberyans owth oberi ynnov gans nerth.