1My a vynn hwi dhe wodhvos pygemmys yw an strivyans usi genev ragowgh hwi, ha rag an re usi yn Laodikea, ha peub na welas ow fas vy y'n kig, 2may fons kennerthys yn aga holonn, ow pos junys war-barth yn kerensa hag y'n rychys oll a'n surheans leun a gonvedhes, rag aswonnvos a'n mysteri a Dhuw, a Grist;2:2 a Dhuw, a Grist: War-lergh re a'n dornskrifow a Dhuw ha'n Tas ha Krist. 3yn neb yma kudhys pub tresor a furneth ha godhvos. 4Hemma a lavarav, ma na'gas toello denvyth gans fekyl lavarow. 5Rag mar nyns esov vy omma y'n korf, byttegyns y'n spyrys yth esov genowgh, ow lowenhe ha gweles aray da ha krevder agas fydh yn Krist.

Leunder Bewnans Krist

6Rakhenna, dell dhegemmersowgh Krist Yesu an Arloedh, gwrewgh kerdhes ynno, 7gwreydhys ha drehevys ynno, ha kennerthys y'n fydh dell dhys'sowgh, ow palshe yn grasyans.2:7 ow palshe yn grasyans: War-lergh re a'n dornskrifow ow palshe ynni yn grasyans.

8Bedhewgh war na wrello denvyth agas kemmeres yn keth dre filosofi ha toell gwag, war-lergh hengov mab-den, war-lergh elvennow an bys, a-der war-lergh Krist; 9rag ynno ev y trig pub leunder a'n Duwsys, yn korfek. 10Ha hwi re beu kollenwys ynno neb yw penn pub prynsipata ha potestas. 11Ynno ev ynwedh y fewgh trodreghys gans trodreghyans na veu gwrys gans leuv, ow ti'ska korf an kig yn trodreghyans Krist. 12Ynkleudhys vewgh ganso yn besydhyans may fewgh drehevys ynwedh ganso dre oberyans Duw, neb a'n drehevis dhiworth an re varow. 13Ha hwi neb a veu marow yn kammweythresow ha heb trodreghyans a'gas kig, ev a wrug dhywgh bewa war-barth ganso, ow kava dhyn2:13 ow kava dhyn: War-lergh re a'n dornskrifow ow kava dhywgh. an kammweythresow oll, 14ow tefendya an akont-skrif esa er agan pynn, gans y ordenansow, hag ev a'n kemmeras dhe-ves, orth y gentra orth an grows; 15ev a dhestryppyas an prynsipatys ha'n potestatys, ha'ga gul ensampel yn apert, orth aga hembronk yn keskerdh trygh dredhi hi.2:15 dredhi hi: Po dredho ev.

16Ytho, na wres denvyth agas breusi a-dro dhe dhybri nag eva, nag y'n mater a dy'goel na loer nowydh na sabot, 17hag yw skeus a daklow a dheu, mes an substans2:17 substans: Greka korf. yw a Grist. 18Na wres denvyth kemmeres dhiworthowgh agas gober, ow kovynn uvelder ha gordhyans eledh, ow teskrifa an manylyon a daklow na welas2:18 a daklow na welas: War-lergh re a'n dornskrifow a daklow a welas., omhwythys yn euver dre vrys y gig, 19heb synsi an penn, a neb an korf oll, skoedhys ha junys war-barth der an giow ha'n skennys, a dyv gans tevyans Duw.

An Bewnans Nowydh yn Krist

20Mar kwrussowgh merwel gans Krist dhiworth elvennow an bys, prag yth owgh hwi gostydh dhe rewlys, kepar ha pan vewgh ow pewa y'n bys? 21‘Na wra handla, na wra tastya, na wra tochya.’ 22An re ma yw taklow oll a wra pedri pan yns i usys; yth yns i war-lergh gorhemmynnow ha dyskansow mab-den. 23An taklow ma dhe wir y's teves semlans furneth, gans gordhyans omgemmerys der an bolonjedh, hag uvelder, ha dyghtyans kales a'n korf, heb talvosogeth mann erbynn hwansow an korf.