1Ytho mar pewgh drehevys gans Krist, hwilewgh an taklow usi war-vann, le mayth usi Krist owth esedha a dhyghow dhe Dhuw. 2Gwrewgh vri a'n taklow war-vann, a-der a'n taklow war an nor. 3Rag hwi re verwis, ha'gas bewnans yw kudhys gans Krist yn Duw. 4Pan vo diskwedhys Krist, agas3:4 agas: War-lergh re a'n dornskrifow agan. bewnans, ena hwi ynwedh a vydh diskwedhys ganso yn splannder.

5Ytho, gorrewgh dhe'n mernans an pyth ynnowgh usi a'n nor, fornikasyon, plosedhes, hwans dres eghenn, drog yeunes, ha krefni, yw gordhyans idolys, 6drefenn a'n re ma y teu sorr Duw war an vebyon a dhiwostytter.3:6 war an vebyon a dhiwostytter: Nyns usi an geryow ma yn re a'n dornskrifow. 7Ynna hwi ynwedh a gerdhi kyns, pan wrewgh bewa y'n taklow ma. 8Mes lemmyn gorrewgh dhe-ves hwi ynwedh pup-tra: sorr, konnar, atti, blasfemi, kows plos yn-mes a'gas ganow. 9Na wrewgh gowleverel an eyl dh'y gila, wosa diwiska an den koth gans y wriansow ev, 10ha wosa gwiska an den nowydh, daswrys yn godhvos war-lergh an imaj a neb a'n gwrug. 11Omma nyns eus Grek na Yedhow, trodreghyans nag antrodreghyans, den barbarus, Skythyas, kethwas, den rydh; mes Krist yw pup-tra, hag yn pup-tra yma ev.

12Ytho, avel tus dhewisys gans Duw, sans ha karadow, gwiskewgh truedh, kuvder, uvelder, klorder, perthyans, 13ow kodhav an eyl y gila, hag ow kava an eyl dh'y gila, mars eus krodhvol war nebonan. Kepar dell avas an Arloedh3:13 an Arloedh: War-lergh re a'n dornskrifow Krist. dhywgh, gwrewgh hwi yndella, ynwedh. 14Ha dres oll an taklow ma, gwiskewgh kerensa, yw an golmenn a berfydhder. 15Ha gwres kres Krist3:15 kres Krist: War-lergh re a'n dornskrifow kres Duw. rewlya yn agas kolonn, an kres mayth owgh hwi gelwys dhodho yn unn korf; ha godhvydhewgh gras. 16Triges ger Krist ynnowgh yn rych, ow tyski ha keski an eyl y gila yn pub furneth, ow kana salmow, hymnys ha kanow spyrysel gans gras yn agas kolonn dhe Dhuw.3:16 dhe Dhuw: War-lergh re a'n dornskrifow dhe'n Arloedh. 17Ha pup-tra oll a wrewgh yn ger po yn gwrians, gwrewgh pup-tra yn hanow an Arloedh Yesu, ow krassa dhe Dhuw an Tas3:17 dhe Dhuw an Tas: War-lergh re a'n dornskrifow dhe Dhuw ha'n Tas. dredho ev.

Rewlys rag Teyluyow

18A wragedh, bedhewgh gostydh dh'agas gour, dell yw gwiw y'n Arloedh. 19A wer, kerewgh agas gwreg, ha na vedhewgh hwerow orti.

20A fleghes, obayewgh dh'agas kerens yn pup-tra, rag hemm yw plegadow dhe'n Arloedh, 21A dasow, na brovokyewgh agas fleghes, na vons i digolonnek. 22A gethwesyon, obayewgh dh'agas arlydhi war-lergh an kig yn pup-tra, a-der gans gonis yw gwelys rag plegya dhe vab-den, mes gans glander kolonn, ow perthi own a'n Arloedh. 23Pypynag a wrewgh, gwrewgh y oberi a'n enev, kepar dell ve dhe'n Arloedh, a-der dhe vab-den, 24ow kodhvos hwi dhe dhegemmeres gober an eretons dhiworth an Arloedh. Hwi a serv3:24 Hwi a serv: Po Servyewgh. an Arloedh Krist. 25Rag neb a wra kamm a wra degemmeres kessydhyans an pyth a wrug ev kamm, ha nyns eus faverans.