Pella Dyskans

1A vestrysi, rewgh dh'agas kethwesyon an dyghtyans yw ewn hag ekwal, rag hwi a woer bos Mester genowgh hwi ynwedh yn nev.

2Gwrewgh pesya yn pysadow, ow koelyas ynno gans grasyans; 3pysewgh y'n keth termyn ragon ni ynwedh, mayth igorro Duw dhyn daras rag an ger dhe gewsel mysteri Krist, mayth esov yn kolmow ragdho, 4ma'n diskwetthiv, dell goedh dhymm kewsel.

5Yn furneth kerdhewgh troha'n re usi a-ves, ow kul devnydh a'n termyn. 6Bedhes agas lavar pup-prys grassyes, sawrys gans hoelan, dhe wodhvos fatell goedh dhywgh gorthybi dhe bubonan.

Dynnarghow Diwettha

7Y hwra Tyghikus, an broder karadow ha menyster lel ha keswas y'n Arloedh, derivas dhywgh a-dro dhymm, 8neb re dhannvenis dhywgh rag an keth tra ma, may hwodhvowgh a-dro dhyn, ha may kennertho agas kolonn, 9gans Onesimus an broder lel ha karadow yw onan ahanowgh. I a wra derivas dhywgh a bup-tra omma.

10Aristarghus, ow hesprisner a'gas dynnergh, ha Mark, kenderow Barnabas: hwi re dhegemmeras arghadowyow a-dro dhodho; mar teu ev dhywgh, salusewgh ev; 11ha Yesu, henwys Yustus; nyns eus marnas an re ma a'n trodreghyans yw ow hesoberoryon rag gwlaskor Duw, hag i re beu konfort dhymmo. 12Epafras a'gas dynnergh, onan ahanowgh, kethwas Krist Yesu, ow strivya pup-prys ragowgh yn y bysadow, may seffowgh perfydh ha surhes yn tien y'n bolonjedh oll a Dhuw. 13Rag my a dheg dustuni anodho, bos meur a lavur dhodho ragowgh ha'n re usi yn Laodikea ha'n re yn Hierapolis. 14Luk, an medhek karadow ha Demas a'gas dynnergh. 15Salusewgh an vreder yn Laodikea, ha Nymfas ha'n eglos yn y ji.4:15 Nymfas ha'n eglos yn y ji: War-lergh re a'n dornskrifow Nymfa ha'n eglos yn hy chi; po Nymfas ha'n eglos yn aga chi. 16Ha pan vo redys an lyther ma a-dheragowgh, gwrewgh may fo redys ynwedh yn eglos tus Laodikea, ha hwi ynwedh redyewgh an lyther dhiworth Laodikea. 17Ha leverewgh dhe Arghippus, ‘Mir dhe'th oberenn a dhegemmersys y'n Arloedh, ma's kollenwi hi.’

18An dynnargh dre'm dorn ow honan, Powl. Perthewgh kov a'm kolmow. Gras genowgh hwi.4:18 War-lergh re a'n dornskrifow yma dhe dhiwedh an wers Amen.