Dasserghyans an Re Varow

1‘Ha dhe'n prys na y sev Mighal, an pryns meur neb a skoedh mebyon dha bobel; hag y fydh seson a ankres, a'n par na veu a-dhia dhalleth an genedhel bys y'n eur na. Mes y'n eur na y hwra dha bobel skapya, pub huni neb a vydh kevys skrifys y'n lyver. 2Ha tus pals usi ow koska yn doust an dor a dhifun, re dhe vewnans heb diwedh, ha re dhe veth ha dhe vismer bys vykken. 3Ha'n re fur a wra splanna avel golowyjyon an fyrmament; ha'n re a dreyl lies dhe wiryonedh a vydh avel an ster bys vykken ha bynnari. 4Mes ty, A Daniel, kudh an geryow, ha sel an lyver bys prys an diwedh. Lies a boen a-derdro, dhe ynkressya godhvos.’

5Ena my, Daniel, a viras, hag otta, dew erell ow sevel, an eyl omma war lann ma an avon, ha'y gila war lann arall an avon. 6Ha leverys veu dhe'n gour gwiskys yn lien esa a-ugh dowrow an avon, ‘Pes termyn y fydh bys diwedh an anethow ma?’ 7Hag y klewis an gour gwiskys yn lien esa a-ugh dowrow an avon; ev a dhrehevis y dhorn dhyghow ha'y dhorn gledh war-tu ha'n nevow, hag ev a dos ti re Dhuw a vew bys vykken: ‘Wosa oes, dew oes ha hanter oes, pan vydh kowlwrys shyndyans nerth an bobel sans, oll an taklow ma a vydh kewerys.’ 8My a glewas, mes ny gonvedhis; ytho y leveris, ‘A'm arloedh, pandr'a vydh siwyans an taklow ma?’ 9Hag ev a leveris, ‘Ke, Daniel, rag y fydh an taklow ma gwithys yn-dann gel ha selys bys prys an diwedh. 10Lies a vydh purhes, ha kannyes, ha prevys, mes an debeles a bes ow kul drog. Nagonan a'n debeles ny gonvedh; mes an re fur a gonvedh. 11A-dhia'n prys may fydh kemmerys dhe-ves an offrynn pub-dydhyek, bys yn devedhyans pyth kasadow an difeythter, y fydh dewdhek kans deg dydh ha peswar-ugens. 12Gwynn y vys neb a worta ha drehedhes bys y'n trydhek kans pymthek dydh warn ugens. 13Ha ty, ke bys y'n diwedh, hag y hwredh powes, ha degemmeres dha rann orth diwedh an dydhyow.’12:13 Y'n Vulgat y siw omma Susanna ha'n Henavogyon (ch. 13) ha Bel ha'n Dhragon (ch. 14). Bel 1:1. Y'n Vulgat y siw chaptra 13 Susanna ha'n Henavogyon ha chaptra 14 Bel ha'n Dhragon. Y'n Septuagint Susanna a dheu kyns dalleth Lyver Daniel: Sus 1:1.