1Nebukadnessar an myghtern a wrug delow owrek, tri-ugens kevelin yn ughelder, ha hwegh kevelin yn les; ev a'n drehevis yn plen Dura, yn rannvro Babylon; 2ha Nebukadnessar an myghtern a dhannvonas rag kuntell an wahalyethow, an bennternedh, ha'n wovernours, an vreusysi, an alhwedhoryon, an gusulyadoryon, an justisyow hag oll soedhogyon an rannvro, rag dones dhe sakrans an delow a wrussa Nebukadnessar an myghtern y dhrehevel. 3Ena y feu kuntellys an wahalyethow, an bennternedh, ha'n wovernours, an vreusysi, an alhwedhoryon, an gusulyadoryon, an justisyow hag oll soedhogyon an rannvro, dhe sakrans an delow a wrussa Nebukadnessar an myghtern y dhrehevel; hag yth esens ow sevel a-rag an delow a wrussa Nebukadnessar y dhrehevel. 4Ha krier a grias yn fen, ‘Gorhemmynnys owgh hwi, A boblow, A genedhlow, A davosow, 5pan pynag y klewvowgh son an korn, an pib, an gyttrens, an krowd, an sowtri, an pibow-sagh ha pub sort a venestrouthi, y koedhowgh dhe'n leur ha gul gologhas dhe'n delow owrek a wrussa Nebukadnessar an myghtern y dhrehevel. 6Ha piwpynag na goettho dhe'n leur ha gul gologhas a vydh y'n keth eur na tewlys yn kres fornes a dan ow flammya.’ 7Ytho, dhe'n keth prys na, kettell glewas oll an poblow son an korn, an pib, an gyttrens, an krowd, an sowtri, an pibow-sagh ha pub sort a venestrouthi, oll an poblow, an kenedhlow ha'n tavosow a goedhas dhe'n leur ha gul gologhas dhe'n delow owrek a wrussa Nebukadnessar an myghtern y dhrehevel.

8Ytho rakhenna orth an prys ma, nebes gwer a Kaldea a dheuth nes, hag a guhudhas an Yedhewon. 9I a gewsis ha leverel dhe Nebukadnessar an myghtern, ‘A vyghtern, re vewi bys vykken! 10Ty, A vyghtern, a wrug gorhemmynn, dredho may hwra pub huni neb a glewvo son an korn, an pib, an gyttrens, an krowd, an sowtri, an pibow-sagh ha pub sort a venestrouthi, koedha dhe'n leur ha gul gologhas dhe'n delow owrek: 11ha piwpynag na goettho dhe'n leur ha gul gologhas a vydh tewlys yn kres fornes a dan ow flammya. 12Yma re a'n Yedhewon a wrussys apoyntya war venystrans rannvro Babylon: Shadrak, Meshak hag Abednego; an re ma, A vyghtern, ny wrussons vri ahanas; ny wrons servya dha dhuwow, na gul gologhas dhe'n delow owrek a wrussys y dhrehevel.’ 13Ena Nebukadnessar o serrys fest, hag ev a erghis may fe dres Shadrak, Meshak hag Abednego. Ena i a's dros a-rag an myghtern. 14Nebukadnessar a gewsis ha leverel dhedha, ‘Yw gwir, A Shadrak, Meshak hag Abednego, na wrewgh servya ow duwow, na gul gologhas dhe'n delow owrek a wrug vy y dhrehevel? 15Lemmyn, mars owgh hwi parys orth an keth prys na pan glewowgh an korn, an pib, an gyttrens, an krowd, an sowtri, an pibow-sagh ha pub sort a venestrouthi, dhe goedha dhe'n leur ha gul gologhas dhe'n delow a wrug vy, da yw hemma: mes mar ny wrewgh gologhas, y fydhowgh tewlys an keth eur na yn kres fornes a dan ow flammya; ha py par duw ywa a'gas delirv mes a'm dorn?’

16Shadrak, Meshak hag Abednego a worthybis, ow leverel dhe vyghtern Nebukadnessar,3:16 Yndella an Septuagint. Tekst masoretek: ow leverel dhe'n myghtern, A Nebukadnessar. ‘Nyns yw bern genen dha worthybi y'n mater ma. 17Yndella mars yw yn few, agan Duw neb a servyn a yll agan delivra mes a'n fornes a dan ow flammya, hag ev a'gan delirv mes a'th torn. 18Mes hwath mar ny vynn gul yndella, bedhes godhvedhys dhis, A vyghtern, na servyn dha dhuwow, na gul gologhas dhe'n delow owrek a wrussys y dhrehevel.’

An Fornes Tanek

19Ena yth o Nebukadnessar leun a gonnar, ha semlans y vejeth a veu treylys erbynn Shadrak, Meshak hag Abednego; ytho ev a gewsis, hag erghi may fe an fornes poethhes seythkemmys moy ages dell vedha an us. 20Hag ev a erghis dhe'n kreffa gwer yn y lu-ervys may kelmens Shadrak, Meshak hag Abednego, ha'ga thewlel y'n fornes a dan ow flammya. 21Ena an wer ma a veu kelmys, hag i hwath yn aga lavrek, ha'ga lodrow, ha'ga thulyfant, ha'ga dillas erell, hag y fons tewlys yn kres an fornes a dan ow flammya. 22Yndella, rag bos mall gans arghadow an myghtern, ha rag bos an fornes toemm dres eghenn, flamm an tan a ladhas an wer neb a dhegi Shadrak, Meshak hag Abednego. 23Ha'n tri gour na, Shadrak, Meshak hag Abednego, a goedhas kelmys yn kres an fornes a dan ow flammya.3:23 Y'n Septuagint ha'n Vulgat, yma omma Pysadow Azaria ha Kan an Tri Mab Ktm 1:1.

24[91] Ena y feu marth dhe Nebukadnessar an myghtern, hag ev a sevis yn skon, ha leverel dh'y gusulyoryon, ‘A nyns esa tri gour a dewlsyn kelmys yn mysk an tan?’ I a worthybis dhe'n myghtern, ‘Yn hwir, A vyghtern.’3:24 Y'n Septuagint ha'n Vulgat 3:24-30 yw niverys 3:91-97. 25[92] Ev a worthybis, ‘Ottena, peswar gour a welav, digelmys, hag ow kerdhes yn mysk an tan, ha nyns yns shyndys; ha semlans an peswora yw haval dhe vab a'n duwow.’ 26[93] Ena Nebukadnessar a dheuth nes dhe daras an fornes a dan ow flammya, ha leverel: ‘A Shadrak, Meshak hag Abednego, hwi servysi a Dhuw Ughella, dewgh yn-mes, ha dewgh omma!’ Ena Shadrak, Meshak hag Abednego a dheuth yn-mes a gres an tan. 27[94] Ha'n wahalyethow, an bennternedh, ha'n wovernours, ha kusulyoryon an myghtern, neb a vedha kuntellys, a welas an wer ma; fatell ny'n jevia an tan galloes vyth war aga horf, nag o goleskys blewenn a'ga fenn, nag o treylys aga lavrek, nag esa fler an tan warnedha. 28[95] Ena Nebukadnessar a gewsis ow leverel, ‘Benniges re bo Duw Shadrak, Meshak hag Abednego, neb re dhannvonas y el, ha delivra y wesyon neb a drestya ynno, ha treylya ger an myghtern, ha ri aga horf rag na wrellons gologhas dhe dhuw vyth marnas dh'aga Duw i. 29[95] My a dhyllo gorhemmynn: pub pobel, pub kenedhel ha pub taves neb a gews erbynn Duw Shadrak, Meshak hag Abednego, a vydh hakkys dhe demmyn, ha'y ji a vydh treylys dhe vern teyl; rag nyns eus Duw nahen neb a yll delivra yndellna.’ 30Ena an myghtern a wrug dhe Shadrak, Meshak hag Abednego seweni yn rannvro Babylon.