Nessa Hunros Nebukadnessar

1Nebukadnessar an myghtern, dhe oll an poblow, an kenedhlow ha'n tavosow trigys y'n norvys oll: Pals re bo agas kres!4:1 Niveryans an gwersow omma a siw KJV. Y'n tekst Aramaek, 4:1-3 yw niverys 3:31-33, ha 4:4-37 yw niverys 4:1-34. Y'n Septuagint 4:1-3 yw niverys 3:98-100. 2Da yw genev diskwedhes an toknys ha'n anethow re wrug Duw Ughella ragov.

3Ass yw bras y toknys,

ass yw krev y anethow!

Y vyghternsys yw myghternsys a dhur bys vykken,

ha'y vestrynses a henedh dhe henedh.

4Yth esen vy, Nebukadnessar, attes y'm chi, hag ow floryshya y'm palys. 5Hunros a welis hag a wrug own dhymm; prederow war ow gweli ha gwelesigethow ow fenn a'm euthega. 6Rag hemma my a wrug ordenans may fe dres a-ragov oll an dus fur a Babylon, rag may tiskwetthens dhymm styr an hunros. 7Ena y teuth an hudoryon, an worhenysi, an Kaldeanys, ha'n goelyogyon; ha my a dherivas dhedha an hunros, mes ny yllens diskwedhes dhymm y styr. 8Ha wortiwedh y teuth a-ragov Daniel, henwys Belteshassar war-lergh hanow ow duw, mayth usi ynno spyrys an duwow sans; ha'n hunros a-ragdho a dherivis: 9‘A Belteshassar, mester an hudoryon, yth aswonnav bos ynnos spyrys an duwow sans, ha nag eus kevrin re gales ragos. Preder an pyth a welis y'm hunros, ha lavar dhymm y styr.

10An gwelesigethow y'm penn war ow gweli:

Yth esen ow mires, hag otta gwydhenn yn kres an dor,

ha meur o hy ughelder.

11An wydhenn a dheuth ha bos bras ha krev,

ha'y barr a dhrehedhas dhe nev,

hag yth o gweladow bys penn an norvys oll.

12Teg o hy del,

ha leun o hi a frut,

hag ynni yth esa boes rag peub-oll.

Yn-danni y hwre bestes gwyls kavoes skeus,

hag yth esa ydhyn an ebron trigys yn hy skorrow;

dhiworti y fedha megys pub kig.

13‘Yth esen war ow gweli ow mires orth gwelesigethow ow fenn, hag ottena goelyador, sans hogen, ow tiyskynna a nev. 14Ev a armas yn fen, ow leverel,

“Hakkewgh an wydhenn dhe'n leur,

ha treghewgh hy skorrow dhe-ves;

kryghyllewgh hy delyow kwit

ha skoellewgh hy frut;

fies an bestes a-dhanno,

ha'n ydhyn mes a'y skorrow.

15Mes gas kyf hy gwreydh y'n dor,

kelmys gans kyngel a horn ha brons,

yn gwels yr an gwel.

Gans gluth an nev re bo ev glybys,

ha re bo y rann gans an bestes

yn gwels an dor.

16Re bo treylys y vrys dhiworth brys den,

ha re bo res dhodho brys best;

ha re dremenno warnodho seyth seson.

17Dre ordenans an woelysi yw an vreus,

ha dre gows an syns yw an ervirans,

rag may konvettho an re vew

bos an Ughella rewler yn gwlaskor mab-den;

hag ev a's re dhe'n neb a vynn,

hag a sett warnedhi an isella a dus.”

18‘An hunros ma a welis vy, myghtern Nebukadnessar. Ty, A Belteshassar, deriv hy styr, rag na ylli oll an dus fur y'm ruvaneth diskwedhes dhymm hy styr; mes ty a yll, rag bos ynnos spyrys an duwow sans.’

Styryans an Nessa Hunros

19Ena Daniel, henwys Belteshassar, a veu skruthys pols, ha'y brederow a'n ownhas. An myghtern a worthybis ow leverel, ‘A Belteshassar, na vydh ownhes gans an hunros ha'y styr.’ Belteshassar a worthybis ow leverel, ‘Ow arloedh, re bo an hunros rag an re a'th kas, ha'y styr rag dha eskerens! 20An wydhenn a welsys, hag a devis krev, ha'y barr a dhrehedhas dhe'n nevow, hag yth o gweladow y'n norvys oll, 21ha teg o hy del ha leun o hi a frut, hag ynni yth esa boes rag peub-oll, hag yn-danni y triga bestes gwyls ha war hy skorrow yth esedha ydhyn an ebron: 22ty yw, A vyghtern, neb yw tevys krev, ha dha veuredh re devis ha drehedhes dhe'n nevow, ha'th vestrynses bys finweth an norvys. 23Ha'n pyth re welas an myghtern, goelyador, sans hogen, ow tiyskynna a nev ha leverel, “Hakk an wydhenn dhe'n leur, ha'y distrui; mes gas kyf hy gwreydhyow y'n dor, kelmys gans kyngel a horn ha brons, yn gwels yr an gwel: gans gluth an nev re bo ev glybys, ha re bo y rann gans bestes gwyls erna dremenno warnodho seyth seson” – 24ottomma an styr, A vyghtern: ordenans an Ughella yth yw, hag yw devedhys erbynn ow arloedh an myghtern, 25may fi fesys pell dhiworth tus, ha'th annedh a vydh gans bestes gwyls, gwrys dhe dhybri gwels avel oghen, ha glybys gans gluth an nevow. Warnas y tremen seyth seson, bys pan gonvydhydh bos an Ughella rewler yn gwlaskor mab-den, hag y's re dhe neb a vynno. 26Ha dell o erghys gasa kyf gwreydhyow an wydhenn, y fydh dha ruvaneth sur ragos wosa ty dhe aswonnvos an rewl a nev. 27Ytho, A vyghtern, re bo ow husul degemmeradow dhis; daspren dha beghosow gans gwiryonedh, ha'th anewnder dre dhiskwedhes tregeredh dhe'n voghosogyon, rag may fo dha sewenyans martesen hirhes.’

28Oll hemma a goedhas war Nebukadnessar an myghtern. 29Orth penn dewdhek mis, yth esa ev ow kerdhes ev war do an palys ryel yn Babylon. 30An myghtern a gewsis ow leverel, ‘A nyns yw homma Babylon veur, hag a dhrehevis vy avel chi ryel dre nerth ow galloes, ha rag enor ow meuredh?’ 31Pan esa an geryow hwath yn ganow an myghtern, y koedhas lev a'n nevow: ‘Dhis y leverir, A Nebukadnessar an myghtern: gallas an ruvaneth dhiworthis, 32hag i a'th fes pell dhiworth tus, ha'th annedh a vydh gans an bestes gwyls, hag i a'th wra dhe dhybri gwels avel oghen; warnas y tremen seyth seson bys pan wodhvydhydh bos an Ughella rewler yn gwlaskor mab-den, hag ev a's re dhe neb a vynno.’ 33Y'n eur na an ger a veu kewerys rag Nebukadnessar. Fesys veu dhiworth tus, hag ev a dhybri gwels avel oghen; glybys o y gorf gans gluth an nevow, bys pan devis y vlew avel pluv eryon, ha'y ewines avel ewines ydhyn.

Nebukadnessar a wormel Duw

34Orth diwedh an dydhyow, my, Nebukadnessar, a dhrehevis ow dewlagas dhe nev, ha'm skians a dheuth arta dhymm.

My a vennigas an Ughella,

ha gul gormel ha gologhas dhe'n neb a vew bys vykken.

Rag y vestrynses yw mestrynses a bes vynitha,

ha'y wlaskor a dhur a henedh dhe henedh;

35ha pub annedhyas a'n norvys yw reknys avel mann;

kepar dell vynno y hwra yn mysk lu an nev,

hag yn mysk annedhysi an norvys;

ny yll denvyth lettya y dhorn

na leverel dhodho, ‘Pandr'a wredh?’

36Yn keth prys na y tehwelis dhymm ow skians; ha rag enor ow myghternsys, ow meuredh ha'm splannder a dhehwelis dhymm. Ow husulyoryon ha'm arlydhi a'm hwila, hag y feuv daskorrys y'm myghternsys, ha moy a veuredh a veu keworrys warnav. 37Lemmyn yth esov vy, Nebukadnessar, ow praysya, owth ughelhe hag owth enora Myghtern nev,

rag gwiryon yw oll y weythresow

hag ewn y hynsyow,

hag y hwoer iselhe

an re a gerdh yn goeth.