Kevewi Belshassar

1Belshassar an myghtern5:1 Belshassar an myghtern: Lesruw, mab Nabonidus a wrug kevewi bras rag mil a'y arlydhi, hag eva gwin a-rag an mil.

2Pan dastyas an gwin, Belshassar a worhemmynnis may fe dres an lestri owr hag arghans a gemmersa Nebukadnessar y das yn-mes a'n tempel yn Yerusalem, rag dhiworta mayth effa an myghtern ha'y arlydhi, y wragedh, ha'y iswragedh. 3Ena y feu dres an lestri owr re biens kemmerys yn-mes a'n tempel a ji Duw yn Yerusalem; ha dhiworta yth evas an myghtern ha'y arlydhi, y wragedh, ha'y iswragedh. 4I a evas gwin, ha gormel an duwow a owr hag arghans, brons, horn, prenn ha men.

An Skrif war an Fos

5Desempis yth omdhiskwedhas bysies dorn den, ow skrifa war blaster fos palys an myghtern, a-dal an kantoler; ha'n myghtern a welas palv an dhorn ow skrifa. 6Ena liw an myghtern a dreylyas, y brederow a'n troblas, mellow y dhiwglun a omlowsyas, ha'y dhewlin a gnoukyas an eyl orth y gila. 7An myghtern a armas yn ughel rag dri an worhenysi, an Kaldeanys, ha'n goelyogyon. Ev a leveris dhe'n dus fur a Babylon, ‘Seul a rettyo an skrif ma, hag a dhiskwettho dhymm y styr, a vydh gwiskys yn purpur, gans kadon owr a-dro dh'y gonna, hag a vydh an tressa rewler y'n ruvaneth.’ 8Ena y teuth oll tus fur an myghtern, mes ny wodhyens redya an skrif na, na diskwedhes y styr dhe'n myghtern. 9Ena y feu myghtern Belshassar troblys dres eghenn, hag y liw a dreylyas; ha'y arlydhi o ankombrys.

10An vyghternes, dre reson geryow an myghtern ha'y arlydhi, a dheuth a-ji dhe hel an kevewi. Ha'n vyghternes a leveris, ‘A vyghtern, bys vykken re vewi! Na wrello dha brederow dha drobla, ha na wrello dha liw treylya: 11yma y'th ruvaneth gour hag ynno spyrys an duwow sans. Yn dydhyow dha das y feu kevys ynno golow, skians ha furneth, avel furneth an duwow. Myghtern Nebukadnessar, dha das, a'n gwrug penn an hudoryon, an worhenysi, an Kaldeanys, ha'n goelyogyon; 12rag y feu kevys spyrys bryntin, godhvos, ha skians dhe styrya hunrosow, dhe glerhe kevrinyow ha dhe dhigelmi kudynnow ynno – yn Daniel, neb o henwys Belteshassar gans an myghtern. Lemmyn re bo Daniel gelwys, hag ev a wra diskwedhes an styr.’

Styryans an Skrif

13Ena Daniel a veu dres a-rag an myghtern. Ha'n myghtern a leveris dhe Daniel, ‘Osta Daniel, onan a'n dhivresow a Yuda, neb a veu dres a Yuda gans ow thas, an myghtern? 14Re glewis ahanas bos ynnos spyrys an duwow sans, hag yma kevys ynnos golow ha skians ha furneth bryntin. 15Lemmyn an dus fur, an worhenysi a veu dres a-ragov rag redya an skrif ma ha diskwedhes dhymm y styr; mes ny wodhyens diskwedhes styr an mater. 16Mes my re glewas ahanas, ty dhe wodhvos ri styryow ha digelmi kudynnow. Ytho mar kyllydh redya an skrif ha diskwedhes dhymm y styr, y fydhydh gwiskys yn purpur, gans kadon owr a-dro dhe'th konna, hag y fydhydh an tressa rewler y'n ruvaneth.’

17Ena Daniel a worthybis a-rag an myghtern, ‘Dha rohow re bons ragos jy dha honan, ha ro dha bewasow dhe gen dhen; byttegyns my a red an skrif dhe'n myghtern, ha diskwedhes dhodho y styr. 18A vyghtern, an Duw Ughella a ros dhe'th tas Nebukadnessar myghternsys ha meuredh hag enor ha splannder; 19ha drefenn an meuredh na hag a veu res dhodho, oll an poblow, kenedhlow ha tavosow a grena ha kavoes own a-ragdho. Neb a vynna, ev a ladha; ha neb a vynna, ev a synsi yn few; neb a vynna, ev a ughelhi; ha neb a vynna, ev a iselhi. 20Mes pan veu ughelhes y golonn ha kaleshes y spyrys, may tyghtyas gans goeth, y feu tennys a'y dron ryel, ha'y enor a veu degemmerys dhiworto. 21Ev a veu herdhys pell a vab-den, ha'y vrys a veu gwrys avel best, ha'y annedh o gans an asenes gwyls; i a ros dhodho gwels dhe dhybri avel oghen, ha glyb o y gorf gans gluth a nev, bys pan gonvedhas bos an Duw Ughella ow rewlya gwlaskor mab-den, hag a sett warnodho neb a vynn. 22Ha ty, y vab, Belshassar, ny wrussys iselhe dha golonn jy kyn hwodhves oll hemma, 23mes ty a omughelhas erbynn Arloedh an nevow. Lestri y ji re beu dres a-ragos, ha ty ha'th arlydhi, dha wragedh, ha'th iswragedh re evas gwin dhiworta; ha ty re wormolas an duwow a arghans hag owr, brons, horn, prenn ha men, neb na welons na klewes na godhvos; mes an Duw mayth usi dha anall yn y dhorn, hag oll dha hynsyow, ny wrussys y enora.

24‘Rakhenna dhiworto y feu dannvenys palv an dhorn, hag y feu gwrys an skrif ma. 25Ottomma an skrif a veu gwrys: MENE, MENE, TEKEL ha PARSIN.5:25 Parsin yw liesplek; yn 5.28 an ger yw unnplek, Peres. 26Ottomma styryans an mater: MENE, Duw re niveras dha ruvaneth, ha gorra gorfenn warnedhi; 27TEKEL, ty re beu poesys y'n vantol ha kevys re skav; 28PERES, dha ruvaneth yw rynnys ha res dhe'n Medys ha dhe'n Persianys.’

29Ena Belshassar a worhemmynnis, hag i a wiskas Daniel gans purpur, gans kadon owr a-dro dh'y gonna, hag i a wrug gwarnyans yn y gever, may fedha an tressa rewler y'n ruvaneth.

30An keth nos na y feu ledhys Belshassar, myghtern an Kaldeanys, 31ha Darius an Med a dhegemmeras an ruvaneth, hag ev a-dro dhe dhew vloedh ha tri-ugens.5:31 An wers ma yw niverys 6:1 y'n tekst ebrow hag y'n Septuagint.