An Bras erbynn Daniel

1Da o gans Darius settya war an ruvaneth hwegh-ugens gwahalyeth, rag may fens der an ruvaneth oll,6:1 6:1-28 yw niverys 6:2-29 y'n tekst Aramaek hag y'n Septuagint. 2hag a-ughta tri lewydh, ha Daniel o onan anedha. Dhedha yth o res dhe'n wahalyethow ri derivas, rag na'n jeffa an myghtern koll. 3Ena an Daniel ma a dheuth ha bos meur y vri6:3 a dheuth ha bos meur y vri: Aramaek a splannas. dres an lewydhyon erell, ha dres an wahalyethow, drefenn bos ynno spyrys bryntin; ha'n myghtern a dybis y settya war an ruvaneth oll. 4Ena an lewydhyon ha'n wahalyethow a hwilas skila rag krodhvol war Daniel a-dro dhe'n ruvaneth; mes ny yllens kavoes skila rag krodhvol, na kammwul vyth, rag y vos len; ha ny veu kevys ynno na fowt na kammwul. 5Ena y leveris an wesyon na, ‘Ny wren kavoes skila rag krodhvol war Daniel, marnas ni dh'y havoes ow tochya lagha y Dhuw.’

6Ena an lewydhyon ha'n wahalyethow ma eth yn routh dhe'n myghtern, hag a leveris dhodho, ‘A vyghtern Darius, re vewi bys vykken! 7Oll lewydhyon an ruvaneth, an bennternedh ha'n wahalyethow, an gusulyadoryon ha'n wovernours, re omgusulyas may hwrello an myghtern dyllo ordenans ha gweythresa difenn krev: piwpynag a wrello pysadow dhe dhuw po dhe dhen a-ji deg dydhweyth warn ugens, marnas dhiso jy, A vyghtern, dhe vos tewlys yn fow a lewyon. 8Lemmyn, A vyghtern, dyllo an difenn ha sin an skrifenn, rag na allo bos chanjys, herwydh lagha an Medys ha'n Persianys, na yll bos daskelwys.’ 9Rakhenna, myghtern Darius a sinas an skrifenn ha'n difenn.

Daniel yn Fow an lewyon

10Pan wodhva Daniel bos sinys an skrifenn, yth eth dh'y ji. Y feu ynno fenestri y'n soler igor war-tu Yerusalem. Teyrgweyth pub dydh yth esa ev ow mos war benn-dewlin rag gul pysadow ha gormola a-rag y Dhuw, dell wrussa seuladhydh. 11Ena an wesyon na a dheuth yn routh ha kavoes Daniel ow kul pysadow ha govynnadow a-rag y Dhuw. 12I a dheuth nes, ha kewsel a-rag an myghtern a-dro dhe'n difenn ryel, ‘A ny wrussys sina difenn, piwpynag a wrello pysadow dhe dhuw po dhe dhen a-ji dhe dheg dydhweyth warn ugens, marnas dhiso jy, A vyghtern, dhe vos tewlys yn fow a lewyon?’ An myghtern a worthybis, ‘An mater a sev, herwydh lagha an Medys ha'n Persianys, na yll bos daskelwys.’ 13Ena i a worthybis ow leverel dhe'n myghtern, ‘Daniel, neb yw onan an dhivresow a Yuda, ny wra vri orthis, A vyghtern, nag orth an difenn sinys genes, mes ev a wra y bysadow teyrgweyth pub dydh.’

14Pan glewas an geryow ma, an myghtern a veu troblys meur, hag ervira delivra Daniel; ha bys pan sedhas an howl y hwila y sawya. 15Ena an wer na a dheuth yn routh dhe'n myghtern, ha leverel dhodho, ‘Godhvydh, A vyghtern, bos lagha an Medys ha'n Persianys, na yll difenn na ordenans dyllys gans an myghtern bos daskelwys.’

16Ena an myghtern a worhemmynnis, hag i a dhros Daniel ha'y dewlel yn fow an lewyon. Yn-medh an myghtern dhe Daniel, ‘Re wrello dha Dhuw, neb a servydh prest, dha dhelivra!’ 17Ha men a veu kyrghys, ha gorrys orth ganow an fow, ha'n myghtern a'n selyas gans y vysow-selya y honan, keffrys gans bysow-selya y arlydhi, rag na ve travyth chanjys ow tochya Daniel. 1819 Ena yth eth an myghtern dh'y balys, ha tremena an nosweyth heb dybri; nyns esa didhenyow dres a-dheragdho, ha kosk a deghas dhiworto.

Daniel Kemmerys Mes a'n Fow.

19Ena orth tardh an jydh, an myghtern a sevis ha mos toeth da dhe fow an lewyon. 20Pan dheuth nes dhe'n fow, ev a armas dhe Daniel gans lev troblys, ha leverel dhe Daniel, ‘A Daniel, gwas an Duw bew, a allas dha Dhuw, neb a servydh prest, dha dhelivra a'n lewyon?’ 21Ena y leveris Daniel dhe'n myghtern, ‘A vyghtern, re vewi bys vykken! 22Ow Duw a dhannvonas y el ha degea ganow an lewyon, ha ny wrens ow shyndya, drefenn ow bos kevys divlam a-ragdho; hag ynwedh a-ragos, A vyghtern, ny wrug drog vyth.’ 23Ena yth o an myghtern lowen dres eghenn ragdho, hag ev a worhemmynnis may fe Daniel tennys dhiworth an fow. Ytho Daniel a veu tennys dhiworth an fow, ha ny veu kevys pystik vyth warnodho, rag ev dhe drestya yn y Dhuw. 24Ha'n myghtern a erghis, ha'n wesyon na re guhudhsa Daniel a veu kyrghys ha tewlys yn fow an lewyon – i, aga mebyon, ha'ga gwragedh; ha kyns i dhe dhrehedhes dhe woeles an fow, an lewyon a's fethas ha terri oll aga eskern dhe demmyn.

25Ena myghtern Darius a skrifas dhe oll an poblow, kenedhlow ha tavosow trigys y'n norvys oll: ‘Pals re bo agas kres! 26Ordenans a wrav, yn pub arloetteth a'm ruvaneth, may hwrello tus krena ha kavoes own a-rag Duw Daniel,

Rag ev yw an Duw bew,

neb a dhur bys vykken;

nevra ny vydh y wlaskor distruys,

ha'y roweth a vydh bys y'n diwedh.

27Delivra ha sawya a wra,

ev a wra toknys hag anethow yn nev hag yn nor;

ev re sawyas Daniel dhiworth galloes an lewyon.’

28Ytho an Daniel ma a sewenis yn-dann reyn Darius ha reyn Kyrus an Persian.