An Nessa Diw Leghenn

1Y'n termyn na an Arloedh a leveris dhymm, ‘Fols dhis diw leghenn a ven haval dhe'n kynsa hag yskynn dhymm war-tu ha'n menydh, ha gwra dhis argh a brenn. 2Ha my a skrif war an leghennow an geryow esa war an kynsa leghennow a derrsys. Ena ty a's gorr y'n argh.’ 3Ytho my a wrug argh prenn shittim ha folsa diw leghenn a ven haval dhe'n kynsa hag yth yskynnis war-tu ha'n menydh ha'n dhiw leghenn y'm dorn. 4Hag ev a skrifas war an leghennow avel an kynsa skrif, an deg ger a gewsis an Arloedh dhywgh war an menydh yn-mes a gres an tan yn dydh an kuntellyans; ha'n Arloedh a's ros dhymm. 5Ena my a dreylyas ha diyskynna dhiworth an menydh ha gorra an leghennow y'n argh a wrug vy, hag yth esons ena kepar dell worhemmynnis an Arloedh dhymm.

6(Mebyon Ysrael a omdennas dhiworth puthow Bene-yaakan dhe Mosera. Ena Aron a verwis hag y feu ynkleudhys ena, hag Eleazar y vab a servyas avel oferyas yn y le. 7Alena i eth yn-kerdh war-tu ha'n Gudgod,10:7 ha'n Gudgod: Gwel Niverow 33:33, Hor-haggidgad. ha dhiworth an Gudgod war-tu ha Yotbatha, tir goverow dowr. 8Y'n termyn na an Arloedh a dhibarthas loeth Levi dhe dhegi argh kevambos an Arloedh, dhe sevel a-rag an Arloedh dh'y servya ha dhe venniga yn y hanow bys y'n jydh hedhyw. 9Rakhenna ny veu dhe Levi rann nag eretons gans y vreder; an Arloedh yw y eretons kepar dell gewsis an Arloedh dha Dhuw dhodho.)

10My a sevis war an menydh avel an kynsa dew-ugens dydh ha dew-ugens nos, ha'n Arloedh a woslowas orthiv an weyth na ynwedh, ha ny vynnas an Arloedh dha dhistrui. 11Ena an Arloedh a leveris dhymm, ‘Sav ha ke y'th kerdh a-rag an bobel, rag mayth ellons hag erita an tir a des dh'aga thasow y ri dhedha.’

Own an Arloedh

12Ha lemmyn Ysrael, pandr'a wovynn an Arloedh orthis marnas perthi own a'n Arloedh dha Dhuw, kerdhes yn oll y fordhow, ha'y gara, ha servya an Arloedh dha Dhuw gans oll dha golonn ha gans oll dha enev, 13gwitha gorhemmynnow an Arloedh, ha'y ordenansow esov ow korhemmynna dhis hedhyw rag may fo yn ta dhis? 14Otta, an nev ha nev an nevow yw dhe'n Arloedh dha Dhuw, an norvys ha pup-tra eus ynno. 15Saw unnsel war dha dasow an Arloedh a settyas y gerensa, dh'aga hara, hag ev a dhewisas aga has war aga lergh, hwi a-ugh oll an poblow, kepar hag y'n jydh hedhyw. 16Trodreghewgh ytho kudhgenn agas kolonn, na vedhewgh kales agas kilbenn namoy. 17Rag an Arloedh agas Duw yw Duw a'n duwow hag Arloedh a'n arlydhi, an Duw bras ha krev hag euthyk, nag eus dhodho faverans, ha na gemmer falswober; 18ow kul gwirvreus dhe'n omdhivas ha'n wedhwes, hag ow kara an alyon, ow ri dhodho bara ha dillas. 19Kerewgh an alyon; rag hwi a veu alyons yn pow Ejyp. 20Porth own a'n Arloedh dha Dhuw ha gwra y servya. Glen orto, ha to ren y hanow. 21Ev yw dha wormel, hag ev yw dha Dhuw a wrug ragos an taklow bras hag euthyk ma a welas dha dhewlagas. 22Dha dasow eth yn-nans dhe Ejyp, deg ha tri-ugens enev; ha lemmyn an Arloedh dha Dhuw a'th settyas avel an ster a nev yn palster.