Marthusyon an Arloedh

1Ytho ty a gar an Arloedh dha Dhuw ha gwitha y jarj ha'y ordenansow ha'y vreusow ha'y worhemmynnow pub termyn. 2Godhvydhewgh hedhyw, na veu agas mebyon, neb na aswonnis na weles dyskybleth an Arloedh agas Duw, y veuredh, y dhorn grev ha'y vregh ystynnys, 3ha'y toknys, ha'y wriansow a wrug yn Ejyp, dhe Faro myghtern Ejyp, ha dhe oll y bow; 4ha'n pyth a wrug dhe lu Ejyp, dh'aga mergh ha'ga charettow, fatell wrug dhe dhowrow an Mor Rudh liva dresta pan esens owth helghya war agas lergh, ha'n Arloedh a's distruis bys y'n jydh hedhyw; 5ha ny welsons an pyth a wrug ragowgh y'n gwylvos bys pan dheuthewgh dhe'n tyller ma; 6an pyth a wrug dhe Dathan ha dhe Abiram, mebyon Eliab mab Rewben, fatell igoras an dor y anow, ha'ga howllenki, gans aga thiogethyow, ha'ga thyldow, ha pub tra vew a veu dhedha yn mysk Ysrael oll. 7Mes y feu agas dewlagas hwi a welas oll oberow bras an Arloedh, a wrug.

8Gwithewgh oll an gorhemmynn esov ow korhemmynna dhis hedhyw rag may fewgh krev ha dos hag erita an tir esowgh ow treusi bys di dh'y erita, 9rag may hirhahowgh agas dydhyow war an tir a dos an Arloedh dh'agas tasow y ri dhedha, ha dh'agas has, tir a dhinwa leth ha mel. 10Ynwedh, an tir mayth esos ow tos di dh'y erita, nyns yw haval dhe bow Ejyp, le may teuthewgh yn-mes alena, le may hessys dha has ha'y dhowrhe gans dha droes, avel losowek. 11Mes an tir mayth esos ow treusi di dh'y erita yw tiredh menydhyow ha nansow a yv dowr dhiworth glaw nev; 12tiredh yw bern dhe'n Arloedh dha Dhuw; yma dewlagas an Arloedh dha Dhuw warnodho pup-prys, dhiworth dalleth an vlydhen bys yn diwedh an vlydhen.

13Mar koslewowgh devri ow gorhemmynnow esov ow korhemmynna dhywgh hedhyw, dhe gara an Arloedh agas Duw ha dh'y servya gans oll agas kolonn ha gans oll agas enev, 14ena y rov glaw rag agas tiredh yn y dermyn, an glaw a-varr ha'n glaw diwedhes, rag may kuntelli dha ys ha'th win ha'th olew. 15My a re gwels y'th wel rag dha jatel, may typpri ha bos gwalghys. 16Kemmerewgh with, ma na vo agas kolonn toellys, ha hwi a dreyl dhe denewen ha servya duwow erell ha plegya dhe'n dor a-ragdha, 17hag ena sorr an Arloedh a dhew er agas pynn, hag ev a dhege an ebron ha ny vydh glaw, ha ny dhre an tir y askorr, ha hwi a verow yn skon dhiwar an tir da usi an Arloedh ow ri dhywgh.

18Settyewgh ow geryow ma war agas kolonn ha war agas enev, ha kelmewgh i avel tokyn war agas leuv, hag y fydhons soenelligow yntra dha dhewlagas. 19Dyskewgh i dhe'th vebyon, ow kewsel anedha pan os esedhys y'th chi, ha pan esos ow kerdhes y'n fordh, ha pan wrowedhydh, ha pan sevydh. 20Skrif i war bost-daras dha ji, ha war dha yetys, 21rag mayth ynkressyo agas dydhyow ha dydhyow agas mebyon war an tir a dos an Arloedh dh'agas tasow y ri dhedha, kepar ha dydhyow an ebron a-ugh an norvys. 22Rag mar kwitthowgh teg oll an gorhemmynn ma esov ow korhemmynna dhywgh dh'y wul, dhe gara an Arloedh agas Duw, dhe gerdhes yn oll y fordhow, ha dhe lena orto, 23ena an Arloedh a jas yn-mes oll an kenedhlow ma a-ragowgh, ha hwi a erit dhiworth kenedhlow brassa ha kreffa agesowgh. 24Pub le may trett agas godhen warnodho a vydh dhywgh: dhiworth an gwylvos ha Lebanon, dhiworth an avon, an avon Ewfrates, bys yn mor an howlsedhes, y fydh agas or. 25Denvyth ny yll sevel er agas pynn. An Arloedh agas Duw a re euth ahanas hag own ahanas war enep oll an tir may trettyowgh warnodho, kepar dell gewsis orthowgh.

26Mir, my a sett a-ragowgh hedhyw bennath ha molleth: 27an vennath mar koslewowgh gorhemmynnow an Arloedh agas Duw esov orth aga gorhemmynna dhywgh hedhyw, 28an volleth mar ny woslewowgh gorhemmynnow an Arloedh agas Duw, ha treylya dhiworth an fordh esov orth hy gorhemmynna dhywgh hedhyw, ow kerdhes war-lergh duwow erell na's aswonnsowgh. 29Pan wra an Arloedh dha Dhuw dha dhri bys y'n tir mayth esos ow tos di dh'y erita, ty a re an vennath war menydh Gerizim, ha'n volleth war venydh Ebal. 30A nyns esons i dres an Yordan, a'n west dhe'n fordh troha'n howlsedhes, yn tiredh an Kananysi usi trigys y'n Araba, a-dal Gilgal ryb derwenn11:30 derwenn: Ow siwya an Septuagint. Ebrow derow. More? 31Rag hwi a vydh ow treusi an Yordan dhe dhos dhe erita an tir a wra an Arloedh agas Duw y ri dhywgh, ha hwi a wra y berghenna, ha triga ynno. 32Gwaytyewgh gul oll an ordenansow ha'n breusow esov orth aga ri a-ragowgh hedhyw.