Ny Vydh Marnas Unn Sentri

1An re ma yw an ordenansow ha'n breusow a wredh aga gwitha ha gul y'n tir a ros an Arloedh Duw dha dasow dhis12:1 dha, dhis: Unnplek. War-lergh an Septuagint agas, dhywgh. dh'y erita oll an dydhyow may fewowgh war an dor. 2Distruewgh glan oll an tylleryow may hwrug an kenedhlow esowgh ow kemmeres aga eretons servya aga duwow ena, war an menydhyow ha war an brennow hag yn-dann bub gwydhenn las. 3Terrewgh aga alteryow dhe'n dor, ha brewi aga feulveyn, ha leski aga Asherim gans tan; treghewgh dhe'n dor imajys gravys aga duwow, ha distrui aga hanow dhiworth an tyller na. 4Na wrewgh gordhya an Arloedh agas Duw yndella. 5Mes hwi a hwila an tyller a wra an Arloedh agas Duw y dhewis dhiworth oll agas loethow, dhe worra y hanow ena rag y drigva; ha ty a dheu di. 6Hwi a dhre di agas offrynnow leskys, ha'gas sakrifisow, ha'gas degedhow, hag offrynnow drehevys a'gas leuv, ha'gas ambosow, ha'gas offrynnow bolonjedhek, ha'n re kynsa-genys a'gas chatel ha'gas flokkys, 7hag ena hwi a dheber a-rag an Arloedh agas Duw, ha lowenhe yn pup-tra may hworrowgh agas leuv warnodho, hwi ha'gas tiogethyow, may hwrug an Arloedh dha Dhuw dha venniga dredho. 8Na wrewgh par dell wren ni omma hedhyw, pubonan ow kul pynagoll a vo ewn yn y dhewlagas y honan; 9drefenn na dheuvewgh hwath bys y'n bowesva, na dhe'n eretons a wra an Arloedh dha Dhuw y ri dhis. 10Mes pan dreusowgh an Yordan ha triga y'n tir a wra an Arloedh agas Duw y ri dhywgh dh'y erita, ha pan re powes dhywgh dhiworth oll agas eskerens a-derdro, hwi a drig yn sawder. 11Ha dhe'n tyller a wra an Arloedh agas Duw y dhewis rag gul dh'y hanow triga ena, dhodho y trowgh pup-tra a worhemmynnav dhywgh: agas offrynnow leskys, ha'gas sakrifisow, agas degedhow, ha'n offrynnow drehevys a'gas leuv, ha'n gwella a'gas offrynnow ambosel oll a ambosowgh dhe'n Arloedh. 12Hwi a lowenha a-rag an Arloedh agas Duw, hwi, ha'gas mebyon, ha'gas myrghes, ha'gas servysi, ha'gas maghtethyon, ha'n Levyas usi a-ji dh'agas yetys drefenn nag eus dhodho kevrenn nag eretons genowgh hwi. 13Kemmer with na offrynnowgh dha offrynnow leskys pub le a welydh. 14Unnsel y'n tyller a dhewis an Arloedh yn onan a'th loethow, ena ty a offrynn dha offrynnow leskys. Ena ty a wra pup-tra esov orth y worhemmynna dhis.

Boes a Yll Bos Dybrys

15Byttegyns war-lergh oll desir dha enev ty a yll ladha ha dybri kig, herwydh an vennath a ros an Arloedh dha Dhuw dhis, a-ji dhe oll dha yetys: an avlan ha'n glan a yll y dhybri, kepar ha pan ve ewik po karow. 16Saw unnsel an goes ny dhebrowgh; hwi a'n dinwa war an tir avel dowr. 17Ny yllydh dybri a-berth y'th yetys dega a'th ys na'th win, na'th oyl, na'n kynsa-genys a'th chatel ha'th flokk, na pynagoll a'th ambosow a ambossi na'th offrynnow bolonjedhek nag offrynn drehevys a'th leuv. 18Ty a'n deber a-rag an Arloedh dha Dhuw, y'n tyller a wra an Arloedh dha Dhuw y dhewis, ty ha'th vab ha'th vyrgh, ha'th was ha'th vaghteth, ha'n Levyas usi a-berth y'th yetys; ha hwi a lowenha a-rag an Arloedh dha Dhuw yn pup-tra may hworrydh dha leuv warnodho. 19Gwayt na forsakydh an Levyas hedre vewi war dha dir.

20Pan wra an Arloedh dha Dhuw moghhe dha or kepar dell gewsis genes, ty a lever, ‘My a vynn dybri kig’, rag bos dha enev ow tesirya dybri kig, ena ty a yll dybri kig war-lergh oll desir dha enev. 21Mar pydh an tyller a wrug an Arloedh dha Dhuw y dhewis dhe settya y hanow ena re bell dhiworthis, ty a sakrifi bestes a'th chatel hag a'th flokk a ros an Arloedh dhis kepar dell worhemmynnis dhis, ha ty a dheber a-berth y'th yetys war-lergh oll desir dha enev. 22Kepar dell yw dybrys an ewik ha'n karow, yndella ty a'n deber; kekeffrys an avlan ha'n glan a yll y dhybri. 23Saw bydh sur na dhybrydh an goes, rag an goes yw an enev, ha ny dhybrydh an enev gans an kig. 24Na wra y dhybri; ty a'n dinwa war an leur avel dowr. 25Na dheber ev rag may fo yn ta dhis ha dhe'th vebyon war dha lergh, pan wredh an pyth yw ewn a-wel dhe'n Arloedh. 26Byttegyns dha daklow sans a'th eus, ha'th ambosow, ty a's kemmer ha dos dhe'n tyller a wra an Arloedh y dhewis. 27Ty a wra dha offrynnow leskys, an goes ha'n kig, war alter an Arloedh dha Dhuw; ha goes dha sakrifisow a vydh dinewys war alter an Arloedh dha Dhuw, mes an kig y tybrydh. 28Gwayt obaya oll an geryow ma esov orth dha worhemmynna rag may fo yn ta dhis ha dhe'th vebyon war dha lergh bys vykken, pan wredh an pyth yw mas hag ewn a-wel dhe'n Arloedh dha Dhuw.

Gwarnyans erbynn Fals Dhuwow

29Rag an Arloedh dha Dhuw a dhistru a-ragos an kenedhlow mayth esos ow tos bys di dhe gemmeres aga eretons. Pan y's fesydh ha triga yn aga thiredh, 30kemmer with na vi maglennys war aga lergh, wosa i dhe vos distruys a-ragos, ha ma na wovynni a-dro dh'aga duwow, ha leverel, ‘Fatell serv an kenedhlow ma aga duwow? My keffrys a wra yndella.’ 31Na wra yndella dhe'n Arloedh dha Dhuw, rag i re wrug dh'aga duwow oll an taklow vil a wra an Arloedh aga hasa. I a lesk ynwedh aga mebyon ha'ga myrghes gans tan dh'aga duwow.

32Gwaytyewgh gul pup-tra esov orth y worhemmynna dhywgh; na geworr dhodho, ha na gemmer dhiworto.12:32 12:32 bys 13:18 yw niverys 13:1 bys 13:19 y'n Ebrow, an Septuagint ha'n Vulgat.