1Mar sev yn agas mysk profoes po hunroser hunrosow hag a re dhis tokyn po marth, 2ha mar pydh kollenwys an tokyn po an marth a gewsis dhis, ow leverel, ‘Deun war-lergh duwow erell’ – na's aswonnsys – ‘ha servyn i’, 3na woslow orth geryow an profoes na, nag orth an hunroser na a hunrosow, rag an Arloedh agas Duw a wra agas previ, dhe wodhvos mar kerowgh an Arloedh agas Duw gans oll agas kolonn ha gans oll agas enev. 4Hwi a dal kerdhes war-lergh an Arloedh agas Duw, ha perthi own anodho, ha gwitha y worhemmynnow, hag obaya y lev, ha'y servya, ha glena orto. 5An profoes na, po an hunroser na a hunrosow, a vydh gorrys dhe'n mernans, rag ev dhe gewsel rebellyans erbynn an Arloedh agas Duw neb a'gas dros yn-mes a bow Ejyp ha dha dhasprena dhiworth an chi a gethneth, dhe'th tynya dhiworth an fordh a wrug an Arloedh dha Dhuw gorhemmynna dhis, dhe gerdhes ynni. Yndella ty a garth an drog yn-mes ahanowgh.

6Mara'th tynnyo yn-dann gel dha vroder, mab dha vamm, po dha vab, po dha vyrgh, po gwreg dha askra, po dha gothman yw kepar ha'th enev dha honan, ow leverel, ‘Deun ha servyn duwow erell’, na aswonnsys jy na'th tasow, 7duwow an poblow usi a-dro dhywgh, usi ogas dhis po pell dhiworthis, dhiworth unn penn an norvys bys yn penn arall an norvys, 8na assent dhodho ha na woslow orto, ha na wres dha lagas kemmeres pita anodho, ha na wra y sparya, na'y geles; 9mes ty a'n ladh devri; dha leuv a vydh an kynsa warnodho dh'y worra dhe'n mernans, ha leuv oll an bobel a-wosa. 10Labydh ev gans meyn may farwo, drefenn ev dhe hwilas dha dhynya dhiworth an Arloedh dha Dhuw neb a's dros yn-mes a bow Ejyp, dhiworth an chi a gethneth. 11Ena oll Ysrael a wra goslowes ha perthi own, ha ny wrons drog a'n par na yntredhowgh na fella.

12Mar klewydh y feu leverys a-dro dhe onan a'th trevow a wrug an Arloedh dha Dhuw aga ri dhis dhe driga ena, 13bos gwer bilyek sevys yntredhowgh, hag i re dhynyas trigoryon aga thre, ow leverel, ‘Deun ha servyn duwow erell’, na's aswonnsys, 14ena ty a hwither, ha hwilas, ha govynn yn ta; hag otta mars yw gwir ha sur an dra gasadow ma bos gwrys yn agas mysk, 15sur ty a wysk trigoryon an dre na gans min an kledha, orth hy sakra dhe dhistruyans, ha pup-tra eus ynni ha'y enyvales, gans min an kledha. 16Ty a dhre oll hy freydh war-barth bys yn plen an dre, ha leski an dre hag oll hy freydh gans tan, offrynn kowlleskys dhe'n Arloedh dha Dhuw, hag y fydh krug bynitha; ny vydh drehevys arta. 17Ny len orth dha leuv travyth dhiworth an difenn, rag may treyllyo an Arloedh dhiworth y sorr fers, ha may rollo dhis piteth, ha kemmeres truedh ahanas, ha'th kressya kepar dell dos dhe'th tasow, 18drefenn ty dhe woslowes lev an Arloedh dha Dhuw, dhe witha oll y worhemmynnow esov ow korhemmynna dhis hedhyw, dhe wul an pyth yw ewn a-wel dhe'n Arloedh dha Dhuw.