Gwarnyans erbynn Devosow Pagan

1Hwi yw mebyon dhe'n Arloedh agas Duw: ny omhakkyowgh, na ny wrewgh bloghter ynter agas dewlagas rag den marow. 2Rag pobel sans os dhe'n Arloedh dha Dhuw, ha'n Arloedh re'th tewisas dhe vos dhodho pobel arbennik dhodho y honan yn-mes a'n poblow oll usi war enep an norvys.

Bestes Glan hag Avlan

3Ny dhybrydh travyth vil. 4An re na yw an bestes a yllydh aga dybri: an ojyon, an dhavas, an aver, 5an karow, an ewik, an yorgh, an aver-wyls, an bual, an avrewik, ha'n dhavas-venydh. 6Pub best folsys y garn, gans karn rynnys dhe dhew, hag a dhaskni, yn mysk an bestes oll, ty a yll aga dybri. 7Byttegyns, ny dhebrowgh a'n re ma yn mysk an re a dhaskni, hag yn mysk an re folsys an karn: an kowrvargh, ha'n skovarnek, ha'n konin; rag i a dhaskni, mes an karn nyns yw folsys; avlan yns i dhywgh. 8Ynwedh an hogh, rag an karn yw folsys mes ny dhaskni: avlan yw dhywgh; ny dhebrowgh aga hig, na tochya aga haryn.

9Hwi a dheber hemma a bup-tra eus y'n dowr; hwi a yll dybri pup-tra a'n jeves eskelli-pysk ha skans. 10Mes pup-tra na'n jeves eskelli-pysk ha skans ny dhebrowgh; avlan yw dhywgh.

11Hwi a dheber pub edhen lan. 12Mes an re na ny yllowgh dybri anedha: an er, an vultur barvus, hag er an mor, 13an skowl rudh, an skowl du, ha skowles a bub eghenn; 14ha marghvrini a bub eghenn, 15an strus, hok an nos, an woelann, ha falghunes a bub eghenn; 16an oula kornek, an ibis, an oula gwynn, 17an oula kornek, an vultur, an vorvran, 18an hwibon, an kerghydhyon a bub eghenn, an houpou, ha'n ughsommys. 19Ynwedh pup-tra owth hesya hag ow nija yw avlan dhywgh; ny vydhons dybrys. 20Mes hwi a yll dybri pub edhen lan.

21Ny dhebrowgh karyn vytholl. Ty a yll y ri dhe'n alyon usi a-ji dhe'n yetys hag ev a'n deber; po ty a yll y wertha dhe estren, rag ty dhe vos pobel sans dhe'n Arloedh dha Dhuw. Ny wre'ta bryjyon mynn yn leth y vamm.

22Bydh sur may tegeffi oll askorr dha has a dheu yn-mes a'n gwel blydhen wosa blydhen. 23Ty a dheber a-rag an Arloedh dha Dhuw, y'n tyller a wra y dhewis dhe wul dh'y hanow triga ena, dega dha ys, ha'th win ha'th olew, ha kynsa-genys dha jatel ha'th flokk, rag may tyski dhe berthi own a'n Arloedh dha Dhuw pub dydh oll. 24Mars yw an fordh re bell ragos, ma na yllydh y dhoen, rag bos re bell ragos an tyller a wra an Arloedh dha Dhuw y dhewis dhe settya y hanow ynno, pan wra an Arloedh dha Dhuw dha venniga, 25ena ty a'n chanj yn mona, ha kelmi an mona y'th leuv, ha mos dhe'n tyller a wra an Arloedh dha Dhuw y dhewis. 26Ty a spen an mona war-lergh oll desir dha enev, rag chatel, ha rag deves, ha rag gwin, ha rag korev, ha rag pynag a wovynno dha enev; ty a dheber ena a-rag an Arloedh dha Dhuw, ha lowenhe, ty ha'th teylu. 27Ha'n Levyas usi a-ji dhe'th yetys, ny wredh y forsakya, rag nyns eus dhodho kevrenn nag eretons genes.

28Dhe benn teyr blydhen ty a dhre oll dega dha askorr y'n vlydhen na, ha'y worra a-berth y'th yetys; 29ha'n Levyas (na'n jeves kevrenn nag eretons genes), ha'n alyon, ha'n omdhivas, ha'n wedhwes usi y'th yetys a yll dos ha dybri ha bos lenwys, rag ma'th vennikko an Arloedh dha Dhuw yn pub lavur a'th leuv a wredh.