Laghys rag an Vlydhen Sabotek

1Dhe benn seyth blydhen y hwredh gevyans a gendon. 2Hemm yw gis an gevyans: pub kresysor a reless an kendon a ros dh'y gentrevek; ny arwask y gentrevek, y vroder, drefenn gevyans an Arloedh re beu gelwys. 3Ty a yll govynn talas dhiworth an estren, mes an pyth yw dhis gans dha vroder ty a wra y relessya. 4Mes ny vydh yntredhowgh boghosek, rag an Arloedh a'th vennik yn sur y'n tir a wra an Arloedh dha Dhuw y ri dhis avel eretons dh'y bewa, 5unnweyth mar koslowi gans rach orth lev an Arloedh dha Dhuw, ow kwitha hag ow kul oll an gorhemmynn ma esov ow korhemmynna dhis hedhyw. 6Rag an Arloedh dha Dhuw a'th vennik kepar dell gewsis dhis, ha ty a re war woestel dhe lies kenedhel ha ny jevisydh jy; ty a rewl lies kenedhel, mes ny wrons dha rewlya jy.

7Mars eus yntredhowgh boghosek a onan a'th vreder yn onan a'th yetys y'th tir a wra an Arloedh dha Dhuw y ri dhis, na galesha dha golonn ha na dhege dha leuv dhiworth dha vroder boghosek, 8mes igor dha leuv a-les dhodho ha ro prestenn hel dhodho lowr rag y edhomm, pynag a vo. 9Kemmer with na vo drokpreder y'th kolonn, ow leverel, ‘An seythves blydhen re dheuth nes, blydhen an gevyans’, ha rakhenna dha lagas a vydh drog erbynn dha vroder boghosek, ha ny redh dhodho; hag ev a elow er dha bynn war an Arloedh, hag y fydh peghes ynnos. 10Ty a re dhodho yn surredi, ha na vedhes dha golonn drok-pes pan redh dhodho; ena rag an dra ma, an Arloedh dha Dhuw a'th vennik yn oll dha ober hag yn pup-tra may hworrydh dha leuv warnodho. 11Rag an boghosek ny hedh yn-mes a'n tir. Rakhenna my a worhemmynn dhis, ‘Igor dha leuv a-les dhe'th vroder, dhe'th edhommek ha dhe'th voghosek y'th tir.’

12Mars yw dha vroder Ebrow po benyn Ebrow gwerthys dhis, hag a'th serv hwegh blydhen, ena y'n seythves blydhen ty a'n dannvon dhiworthis rydh. 13Ha pan y'n dannvenydh dhiworthis rydh, ny'n dannvenydh dhe-ves gwag y dhiwla. 14Ty a brovi yn hel dhodho15:14 Ty a brovi yn hel dhodho: Ebrow ty a worr a-dro dh'y gonna. dhiworth dha flokk, ha dhiworth dha leur-drushya, ha dhiworth dha winwask; dell wrug an Arloedh dha Dhuw dha venniga, yndella ty a re dhodho. 15Kovha y feus keth yn pow Ejyp, ha'n Arloedh dha Dhuw a'th tasprenas. Rakhenna yth esov ow korhemmynna dhis an dra ma hedhyw. 16Mes mar lever dhis, ‘Nyns av dhiworthis’, rag ev a'th kar, ty ha'th chi, drefenn bos yn ta dhodho genes, 17ena ty a gemmer mynowes ha'y worra der y skovarn bys y'n daras, hag ev a vydh keth dhis bys vykken. Ha rag dha vaghteth ynwedh ty a wra yndella. 18Ny vydh kales y'th wel pan y'n dannvenydh dhiworthis rydh, rag ev a'th servyas hwegh blydhen, ha dhodho dewblek an dalvosogeth a arvethesik. Ena an Arloedh dha Dhuw a'th vennik yn pup-tra a wredh.

Lagha a-dro dhe Vestes Kynsa-genys

19Pub kynsa-genys gorow a vo genys y'th gre hag y'th flokk ty a saker dhe'n Arloedh dha Dhuw. Ny wonedhydh gans kynsa-genys dha oghen, na knyvyas kynsa-genys dha flokk. 20Ty a'n deber a-rag an Arloedh dha Dhuw blydhen wosa blydhen y'n tyller a wra an Arloedh y dhewis, ty ha'th teylu. 21Mars eus ynno namm, mars yw evredhek po dall, po neb drog namm arall, ny wredh y sakrifia dhe'n Arloedh dha Dhuw. 22Ty a'n deber a-berth y'th yetys. An den avlan ha'n den glan keffrys a yll y dhybri, kepar ha pan ve ewik po karow. 23Saw y woes ny dhybrydh; ty a'n dinwa war an gweres avel dowr.