1Ny sakrifiydh dhe'n Arloedh dha Dhuw ojyon po oen a'n jeves namm po neppyth drog, drefenn ev dhe vos pyth kasadow dhe'n Arloedh dha Dhuw.

2Mar kevir yn agas mysk, a-berth yn onan a'th yetys a wra an Arloedh dha Dhuw aga ri dhis, gour po benyn a wra drog a-wel dhe'n Arloedh dha Dhuw ha gul treuspass erbynn y gevambos, 3ha mos ha servya duwow erell, ha plegya dhe'n dor a-ragdha, po dhe'n howl po dhe'n loer po dhe oll lu an nev, pyth na wrugavy y worhemmynna; 4pan yw derivys dhis, ha ty a glew anodho, ena gwra y hwithra gans rach. Hag otta, mar pydh an dra fastys dhe wir, y feu an dra gasadow ma gwrys yn Ysrael, 5ena ty a dhre dhe-ves an gour na, po an venyn na, a wrug an dra dhrog ma, bys y'th yetys; ha hwi a labydh an gour po an venyn gans meyn, rag may ferwons. 6Orth ganow dew dhustunier po tri dustunier, an den dampnys dhe'n mernans a vydh ledhys. Ny vydh ledhys orth unn ganow. 7Leuv an dhustunioryon a vydh kynsa warnodho dh'y ladha, ha leuv oll an bobel a-wosa. Yndella ty a garth an drog yn-mes ahanowgh.

Rewlys rag Breusysi

8Mars yw mater re gales ragos dhe vreusi yntra goes ha goes, yntra ken ha ken, hag yntra strekys ha strekys17:8 yntra goes ha goes, yntra ken ha ken, hag yntra strekys ha strekys: Henn yw yntra sortow dihaval a dhenladh, a genyow lagha, hag a dhrogober garow. , materow a gontroversita a-berth y'th yetys, ena ty a sev hag yskynna dhe'n tyller a wra an Arloedh dha Dhuw y dhewis. 9Ty a dheu dhe'n oferysi leviek, ha dhe'n breusyas a serv y'n dydhyow na, ha govynn; hag i a dheriv dhis ervirans an vreus. 10Ena ty a wra war-lergh an ger a dherivons dhis dhiworth an tyller ma a wra an Arloedh y dhewis. Gwayt gul war-lergh pup-tra a dhyskons dhis. 11Ty a wra war-lergh an dyskans a dhyskons dhis, ha'n vreus a leverons dhis. Na dreyl a-denewen dhiworth an pyth a dherivons dhis, dyghow na kledh. 12An gour a lavas disobaya an oferyas neb a sev dhe venystra ena dhe'n Arloedh dha Dhuw, po an breusyas – an gour na a verow. Yndella ty a garth an drog dhiworth Ysrael. 13Oll an bobel a woslow ha perthi own, ha ny lavasons gul yndella namoy.

Rewlys rag an Myghtern

14Pan dheudh dhe'n tir a wra an Arloedh dha Dhuw y ri dhis ha'y erita ha triga ynno, ty a lever, ‘My a sett warnav myghtern kepar ha'n kenedhlow usi a-dro dhymm.’ 15Gwayt settya warnas myghtern a wra an Arloedh dha Dhuw y dhewis. Sett warnas myghtern dhiworth dha vreder. Ny yllydh ri warnas gour estren nag yw dha broder. 16Saw na geves dhodho y honan niver bras a vergh, ha na wres dhe'n bobel dehweles dhe Ejyp rag may kaffons mergh moy, rag an Arloedh re leveris dhywgh, ‘Na dhehwelewgh nevra y'n fordh ma arta.’ 17Na vedhes dhodho y honan benynes pals, ma na dreyl y golonn a-denewen; na kavoes dhodho y honan meur a arghans hag owr.

18Pan vydh esedhys war dron y ruvaneth, ev a skrif ragdho y honan dasskrif a'n lagha ma war lyver, dhiworth an lyver usi dhe'n oferysi leviek17:18 dhiworth an lyver usi dhe'n oferysi leviek: Po dhiworth an bennfenten usi dhe'n oferysi leviek, po yn golok an oferysi leviek.. 19Y fydh ganso, hag ev a red ynno oll dydhyow y vewnans, rag may tysko dhe berthi own a'n Arloedh y Dhuw, dhe waytyas gul oll geryow a'n lagha ma, ha'n ordenansow ma, 20rag na vo y golonn ughelhes a-ugh y vreder, ha rag na dreyllyo a-denewen dhiworth an gorhemmynn dyghow na kledh, ha rag may hirhaho y dhydhyow war y ruvaneth, ev ha'y vebyon, yn mysk Ysrael.