Rewlys rag Oferysi ha Levysi

1Ny vydh dhe'n oferysi leviek, loeth Levi oll, kevrenn nag eretons gans Ysrael. I a dheber an offrynnow dre dan dhe'n Arloedh, yw aga eretons. 2Ny'n jevydh eretons yn mysk y vreder; an Arloedh yw y eretons, kepar dell leveris dhodho. 3Hemma a vydh dever dhe'n oferysi dhiworth an bobel, dhiworth an re a sakrifi sakrifis, kyn fo ojyon po oen: an riyas a re dhe'n oferyas an skoedh, an dhiwvogh, ha'n agenn. 4Kynsa frut dha ys, dha win, ha'th oyl, ha'n kynsa a gnew dha flokk a redh dhodho. 5Rag an Arloedh dha Dhuw re'n dewisas yn-mes a'th loethow oll, dhe sevel ha dhe servya yn hanow an Arloedh, ev ha'y vebyon bys vykken.

6Mar teffo Levyas dhiworth onan a'th yetys yn-mes a Ysrael oll, usi ow kodriga ena, ha dos yn oll desir y enev dhe'n tyller a wra an Arloedh y dhewis, 7ev a serv yn hanow an Arloedh y Dhuw kepar hag oll y vreder an Levysi neb a sev ena a-rag an Arloedh. 8I a dheber kevrennow kehaval, war-barth gans an prow dhiworth gwerth eretons y dasow.

Rewlys erbynn Dewinieth

9Pan dheudh jy dhe'n tir a wra an Arloedh dha Dhuw y ri dhis, ny dhyskydh gul war-lergh taklow kasadow an kenedhlow na. 10Ny vydh kevys yntredhowgh nebonan a offrynn y vab po y vyrgh gans tan, na neb a wra dewinieth, na koelyek, na gorhenyas, na pystrier, 11na huder, na mayn, na koelyek, na nygromonser. 12Rag pubonan a wra an taklow ma yw kasadow dhe'n Arloedh, ha drefenn an taklow kasadow ma, yma an Arloedh dha Dhuw orth aga fesya a-ragos. 13Ty a goedh bos divlam a-rag an Arloedh dha Dhuw. 14An kenedhlow ma, esos orth aga ferghenna, a woslow orth koelyogyon hag orth an re a wra dewinieth. Mes an Arloedh dha Dhuw ny re dhis kummyas dhe wul yndella.

Profoes Nowydh

15An Arloedh dha Dhuw a dhrehav profoes ragos yn-mes ahanas, dhiworth dha vreder, haval dhymm. Orto ev hwi a woslow. 16Hemm yw herwydh pup-tra a wovynnsys dhiworth an Arloedh dha Dhuw orth Horeb yn dydh an kuntellyans, ow leverel, ‘Na as vy dhe glewes lev an Arloedh ow Duw byth moy, na weles an tan bras ma arta, ma na verwiv.’ 17Ha'n Arloedh a leveris dhymm ‘Da yw an pyth a gowssons. 18My a dhrehav ragdha yn-mes a'ga breder profoes yw haval dhis. My a worr ow geryow yn y anow, hag ev a gews dhedha pup-tra a worhemmynnav. 19An gour neb na woslow orth ow geryow a gews y'm hanow, my a rekwir akont anodho. 20Byttegyns an profoes neb a lavas kewsel geryow y'm hanow na worhemmynnis dhodho aga hewsel, po neb a gews yn hanow duwow erell, an profoes na a verow.’ 21Mar leverydh y'th kolonn, ‘Fatell aswonnyn an ger na wrug an Arloedh y gewsel?’ 22Pan gews an profoes yn hanow an Arloedh, ha ny hwyrvydh an ger, na ny dheu dhe geweras, henn yw ger na wrug an Arloedh y gewsel. An profoes a'n gewsis gans bolder. Na borth own anodho.