Sitys Meneghi

1Pan wra an Arloedh dha Dhuw treghi dhe-ves an kenedhlow may hwra an Arloedh dha Dhuw ri dhis aga thiredh, ha ty a gemmer aga eretons, ha triga yn aga threvow ha'ga chiow, 2ty a dhiberth ragos teyr thre yn mysk dha diredh, a wra an Arloedh dha Dhuw y ri dhis dh'y erita. 3Ty a bareus an fordh dhedha ragos, ha ranna yn teyr rann dha diredh a wra an Arloedh dha Dhuw y ri dhis dhe erita, rag may fio di pub ladher.

4Hemm yw an rewl rag an ladher neb a fi bys di rag may fewo, neb a weskis y gentrevek dre wall ha neb na'n kasas kyns: 5an den neb a ello gans y gentrevek y'n goeswik dhe dreghi prenn, hag ev a worr y leuv war an voel dhe dreghi an prenn ha'n penn hernyek a dheu ha bos distag dhiworth an dornla prennek ha kavoes y gentrevek hag ev a verow ev a fi dhe onan a'n trevow ma, ha bewa; 6ma na helghyo or an goes war-lergh an ladher yn gwres y sorr, ha dos bys dhodho wortiwedh, drefenn hirder an fordh, ha'y ladha kyn na dhervynnas an mernans, rag na'n kasas kyns. 7Rakhenna my a worhemmynn dhis, ow leverel: Teyr thre a dhiberthowgh ragos.

8Mar moghha an Arloedh dha Dhuw dha oryon kepar dell dos dhe'th tasow, ha ri dhis oll an tir a ambosas ri dhe'th tasow, 9mar kwithydh oll an gorhemmynn ma esov ow korhemmynna dhis hedhyw, orth y wul, dhe gara an Arloedh dha Dhuw, dhe gerdhes yn y fordhow pup-prys; ena ty a geworr ragos ken teyr thre war an teyr ma, 10ma na vo goes gwiryon skoellys y'th tir a wra an Arloedh dha Dhuw y ri dhis avel eretons, ha ty dhe vos kablus a skoellya goes.

11Mes mar kwra gour kasa y gentrevek, ha'y gontrewaytya ha sevel er y bynn ha'y weskel may farwo, hag ev a fi dhe onan a'n trevow ma, 12ena henavogyon y dre a'n kemmer alena, ha'y ri yn leuv dialor an goes, may farwo. 13Na gemmeres dha lagas pita anodho, mes karth kabel an goes gwiryon dhiworth Ysrael, may fo yn ta dhis.

Dileans Orveyn

14Na dhile orven dha gentrevek, a wrug dha ragresegydhyon y'th eretons a eritydh y'n tir a wra an Arloedh dha Dhuw y ri dhis dh'y bewa.

Fals Dhustunioryon

15Ny wra unn dustunier sevel erbynn gour a-dro dhe neb kammweyth po neb pegh, yn pegh pynag a wrello. Dre dhustuni dew dhustunier po dre dhustuni tri dustunier an dra a sev. 16Mar sev fals dhustunier erbynn gour ha'y guhudha a gammwrians, 17an dhew wour, a's teves an gedrynn, a sev a-rag an Arloedh, a-rag an oferysi ha'n vreusysi a serv y'n dydhyow na. 18An vreusysi a hwither yn ta, hag otta mars yw fals an dustunier neb a dhustunias erbynn y vroder, 19ena y hwrewgh dhodho ev kepar dell vynnas gul dh'y vroder. Yndella ty a garth an drog a-dhiworthowgh. 20An re erell a glew, ha perthi own, ha ny wrons arta kepar ha'n dra dhrog ma yntredhowgh. 21Na gemmeres dha lagas pita. Enev rag enev, lagas rag lagas, dans rag dans, leuv rag leuv, troes rag troes.