Rewlys rag Gwerrya

1Pan ewgh mes dhe'n gas erbynn dha eskar ha gweles mergh ha charettow, pobel moy agesos, na borth own anedha, drefenn an Arloedh dha Dhuw dhe vos genes, neb a'th tros yn-bann yn-mes a bow Ejyp. 2Pan dhewgh nes dhe'n gas, an oferyas a dheu nes ha kewsel orth an bobel. 3Y lever dhedha, ‘Klew, Ysrael, yth esowgh ow tos nes dhe'n gas erbynn agas eskerens. Na vedhewgh digolonnek, na berthewgh own, na fyskewgh dhe-ves yn euth, na vedhewgh dyegrys a-ragdha, 4rag yth yw an Arloedh agas Duw neb a gerdh genowgh dhe vatalyas ragowgh orth agas eskerens, dh'agas sawya.’ 5An soedhogyon ynwedh a gews orth an bobel, ow leverel, ‘Eus gour re dhrehevis chi nowydh ha ny wrug y sakra? Es ev ha dehweles dh'y ji, rag own ev dhe verwel y'n vatel ha gour arall dh'y sakra. 6Eus gour re blansas gwinlann ha ny wrug devnydh anodho? Es ev ha dehweles dh'y ji, rag own ev dhe verwel y'n vatel ha gour arall dhe wul devnydh anodho. 7Eus gour re beu ambosys dhe venyn ha ny wrug hy demmedhi? Es ev ha dehweles dh'y ji, rag own ev dhe verwel y'n vatel ha gour arall dh'y demmedhi.’ 8Ena an soedhogyon a gews dhe'n bobel arta ha leverel, ‘Eus gour a berth own ha digolonnek yw? Es ev ha dehweles dh'y ji, ma na wrello dhe golonn y vreder teudhi kepar ha'y golonn ev.’ 9Pan gowlwra an soedhogyon kewsel orth an bobel, i a sett kaslewydhyon orth penn an bobel.

10Pan dheudh nes dhe dre dhe vatalyas orto, prof dhedhi ambosow kres. 11Mar korthyp dhis gans kres hag igeri dhis hy yetys, ena oll an bobel yw kevys ynni a vydh gorrys dhe hwel krev, hag i a'th serv. 12Mar ny wra kres genes, mes hi a wra bresel er dha bynn, ena ty a omsett a-dro dhedhi. 13An Arloedh dha Dhuw a's re y'th leuv, ha ty a wysk pub gorreydh ynni gans min an kledha, 14mes an benynes ha'n fleghigyow ha'n chatel ha pup-tra eus y'n dre, oll an preydh anedhi, ty a byll ragos dha honan, ha dybri preydh dha eskerens a wrug an Arloedh dha Dhuw y ri dhis. 15Yndella y hwredh dhe oll an trevow pell dhiworthis, marnas an trevow a wra an kenedhlow yn ogas aga ferghenna. 16Saw a drevow an poblow ma a wra an Arloedh dha Dhuw aga ri dhis avel eretons, ny esydh yn few travyth a anell, 17mes ty a wra aga sakra dhe dhistruyans: an Hittysi ha'n Amorysi, an Kananysi, ha'n Perizzysi, an Hivysi, ha'n Yebusysi kepar dell worhemmynnis dhis an Arloedh dha Dhuw, 18rag na'gas dyskons dhe wul war-lergh oll an taklow kasadow a wrons rag aga duwow, ha hwi a begh erbynn an Arloedh agas Duw.

19Pan omsettydh lies dydh a-dro dhe dre, ow patalyas orti rag hy hemmeres, ny dhistruydh hy gwydh ow trehevel boel er aga fynn; rag ty a yll dybri frut anedha. Ytho na wra aga threghi; rag nyns yw gwydh an gwel mab-den, mayth omsettydh a-dro dhedha. 20Saw gwydhenn a wodhes nag yw gwydhenn boes, honna y hyllydh distrui ha treghi rag drehevel tommenn erbynn an dre a woestel bel er dha bynn, bys pan goettho.